- ಎಂ. ನಂಜುಂಡಸ್ವಾಮಿ, ಸದ್ಯವೇ ಪ್ರಧಾನಿ ನರೇಂದ್ರ ಮೋದಿ ಅವರ ಯಶೋಗಾಥೆಯನ್ನು ಯಕ್ಷಗಾನದಲ್ಲಿಯೂ ಕಾಣಬಹುದು. ಗುಜರಾತ್ ಮುಖ್ಯಮಂತ್ರಿ ಆದಾಗಿನಿಂದ ಹಿಡಿದು ಎರಡು ಬಾರಿ ಪ್ರಧಾನಿ ಹುದ್ದೆ ಅಲಂಕರಿಸಿದ ಮೋದಿ ಅವರ ಆಡಳಿತಾವಧಿಯನ್ನು ಯಕ್ಷಗಾನದಲ್ಲಿ ಪ್ರದರ್ಶಿಸಲು ಸಿದ್ಧತೆ ನಡೆದಿದೆ. ಮೋದಿ ಅವಧಿಯ ಸರ್ಜಿಕಲ್ ಸ್ಟ್ರೈಕ್, ಬಾಲಕೋಟ್ ದಾಳಿ ಹಾಗೂ ಆಡಳಿತಾತ್ಮಕ ಸುಧಾರಣೆಗಳ ಹೂರಣ ಯಕ್ಷಗಾನ ಪ್ರಸಂಗದಲ್ಲಿ ಇರಲಿದೆ. ಶಿವಮೊಗ್ಗ ಜಿಲ್ಲೆ ತೀರ್ಥಹಳ್ಳಿಯ ಯಕ್ಷಗಾನ ಅವರು ‘ನರೇಂದ್ರ ವಿಜಯ’ ಎಂಬ ಯಕ್ಷಗಾನ ಪ್ರಸಂಗದ ಪುಸ್ತಕ ರಚಿಸಿದ್ದಾರೆ. ಇನ್ನೊಂದು ತಿಂಗಳಲ್ಲಿ ತಮ್ಮದೇ ತಂಡದ ಮೂಲಕ ಆ ಕೃತಿಯನ್ನು ಯಕ್ಷಗಾನ ಪ್ರಸಂಗವನ್ನಾಗಿ ಪ್ರದರ್ಶಿಸಲು ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಮೋದಿ ಅವರ ಜೀವನ ಚರಿತ್ರೆಯನ್ನು ಯಕ್ಷಗಾನಕ್ಕೆ ಸರಿಹೊಂದುವಂತೆ ‘ನರೇಂದ್ರ ವಿಜಯ’ ಕೃತಿಯನ್ನಾಗಿ ಜ್ಯೋತಿ ಶಾಸಿ ರಚಿಸಿದ್ದಾರೆ. ಆ ಪುಸ್ತಕವನ್ನು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಮೈಸೂರಿನಲ್ಲಿ ಬಿಡುಗಡೆಗೊಳಿಸಿದರು. ಶಿವಮೊಗ್ಗದ ತೀರ್ಥಹಳ್ಳಿಯಲ್ಲಿ ಗಾಯಿತ್ರಿ ಮಹಿಳಾ ಯಕ್ಷಗಾನ ತಂಡ ಸ್ಥಾಪಿಸಿರುವ ಜ್ಯೋತಿ ಅವರು ತಮ್ಮ ತಂಡದ ಕಲಾವಿದರೊಂದಿಗೆ ಮತ್ತಷ್ಟು ಕಲಾವಿದರನ್ನು ಹುಡುಕುತ್ತಿದ್ದಾರೆ. 2.30 ಗಂಟೆ ಕಾಲದ ಪ್ರಸಂಗ ಇದಾಗಿದ್ದು, ಪದ್ಯ, ನಾಟ್ಯವನ್ನು ಒಳಗೊಂಡಿದೆ. 40 ಪುಟವಿರುವ ಈ ಪುಸ್ತಕವು ನರೇಂದ್ರ ಮೋದಿ ಗುಜರಾತ್ ಮುಖ್ಯಮಂತ್ರಿಯಾಗುವ ಸಂದರ್ಭದಿಂದ ಆರಂಭಗೊಳ್ಳುತ್ತದೆ. ಅಲ್ಲಿಂದ 2ನೇ ಬಾರಿಗೆ ಪ್ರಧಾನಿಯಾಗಿ ಕೈಗೊಂಡ ಸುಧಾರಣೆ ಕ್ರಮವನ್ನು ಈ ಪುಸ್ತಕದಲ್ಲಿ ಸೇರಿಸಲಾಗಿದೆ. ನೋಟ್ ಬ್ಯಾನ್, ಏರ್ ಸ್ಟ್ರೈಕ್, ಬಾಲಕೋಟ್ ದಾಳಿ ಮತ್ತು ಕಾಶ್ಮೀರಕ್ಕೆ ನೀಡಲಾಗಿದ್ದ ಆರ್ಟಿಕಲ್ 370 ತೆರವು ಮತ್ತು ಚಂದ್ರಯಾನ-2 ಸೇರಿದಂತೆ ಪ್ರಮುಖ ಘಟ್ಟಗಳಿವೆ. ಪ್ರಸಂಗದಲ್ಲಿ 12ಕ್ಕೂ ಹೆಚ್ಚು ಪಾತ್ರ ಬರಲಿದ್ದು, ಗೃಹ ಸಚಿವ ಅಮಿತ್ ಶಾ ಪಾತ್ರ ಪ್ರಮುಖವಾಗಿದೆ. ಮೋದಿ ವಿಶ್ವ ನಾಯಕರು. ಹಾಗಾಗಿ ಅವರ ಯಶೋಗಾಥೆ ಯಕ್ಷಗಾನ ಕ್ಷೇತ್ರದಲ್ಲೂ ಅಜರಾಮರವಾಗಲೆಂದು ನರೇಂದ್ರ ವಿಜಯ ಯಕ್ಷಗಾನ ಪುಸ್ತಕ ಬರೆದಿದ್ದೇನೆ. ಇನ್ನೊಂದೆರಡು ತಿಂಗಳಲ್ಲಿ ಇದರ ಪ್ರಸಂಗ ಪ್ರದರ್ಶನಗೊಳ್ಳಲಿದೆ. - ಜ್ಯೋತಿ ಶಾಸ್ತ್ರಿ, ಪ್ರಸಂಗಕರ್ತರು
from India & World News in Kannada | VK Polls https://ift.tt/33oy2mo
