ಮುಂಬಯಿ: ಅಮೆರಿಕದ ಅತ್ಯಂತ ಜನಪ್ರಿಯ ನ್ಯಾಷನಲ್ ಅಸೋಸಿಯೇಷನ್ (ಎನ್ಡಿಎ) ಲೀಗ್ ಭಾರತಕ್ಕೆ ಭರ್ಜರಿ ದಾಪುಗಾಲನ್ನಟ್ಟಿದೆ. ಇತ್ತೀಚೆಗಷ್ಟೇ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಯುಎಸ್ ಸಂದರ್ಶನದ ವೇಳೆಯಲ್ಲಿ ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್, ಭಾರತ ಪ್ರವೇಶವನ್ನು ಅಧಿಕೃತವಾಗಿ ಘೋಷಿಸಿದ್ದರು. ಅಮೆರಿಕ ಹಾಗೂ ಕೆನಡಾದಲ್ಲಿ ಅತಿ ಹೆಚ್ಚು ಸದ್ದು ಮಾಡಿರುವ ಪುರುಷ ವೃತ್ತಿಪರರ ಬಾಸ್ಕೆಟ್ಬಾಲ್ ಲೀಗ್ ಇದಾಗಿದೆ. ಇದರಂತೆ ಮುಂಬಯಿಯಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಇಂಡಿಯಾನಾ ಪೇಸರ್ಸ್ ತಂಡವು ಸ್ಯಾಕ್ರಮೆಂಟೊ ಕಿಂಗ್ಸ್ ವಿರುದ್ಧ 132-131ರ ಅಂತರದ ರೋಚಕ ಗೆಲುವು ದಾಖಲಿಸಿದೆ. ಇದು ನೆರೆದಿದ್ದ ಪ್ರೇಕ್ಷಕರಿಗೆ ರಸದೌತಣ ನೀಡಿತ್ತು. ಮುಂಬರುವ ಆವೃತ್ತಿಗಾಗಿ ನಡೆದ ಮೊದಲ ಪೂರ್ವಭಾವಿ ಪಂದ್ಯ ಇದಾಗಿತ್ತು. ನಿಗದಿತ ಅವಧಿಯ ವೇಳೆಯಲ್ಲಿ ಇತ್ತಂಡಗಳು 118-118 ಅಂಕಗಳ ಸಮಬಲ ಸಾಧಿಸಿತ್ತು. ಬಳಿಕ ಹೆಚ್ಚುವರಿ ಐದು ನಿಮಿಷಗಳ ಅವಧಿಯಲ್ಲಿ ಇಂಡಿಯಾನಾ ತಂಡವು ಎದುರಾಳಿಗಳ ಮೇಲೆ ರೋಚಕ ಗೆಲುವು ದಾಖಲಿಸಿತು. ಇಂಡಿಯಾನಾ ಪರ ಒಟ್ಟಾರೆ 30 ಅಂಕ ಕಲೆ ಹಾಕಿದ ಟಿ ವ್ಯಾರೆನ್ ಗೆಲುವಿನ ರೂವಾರಿ ಎನಿಸಿದರು. ಎನ್ಬಿಎ ಟೂರ್ನಿಯಲ್ಲಿ ಒಟ್ಟು 30 ತಂಡಗಳು ಭಾಗವಹಿಸುತ್ತದೆ. ಇದರಲ್ಲಿ ಅಮೆರಿಕದಿಂದ 29 ಹಾಗೂ ಒಂದು ತಂಡ ಕೆನಡಾದಿಂದ ಸೇರಿದೆ. 1949ನೇ ಇಸವಿಯಲ್ಲಿ ನ್ಯೂಯಾರ್ಕ್ ಸಿಟಿಯಲ್ಲಿ ಆರಂಭವಾದ ಎನ್ಬಿಎ ಬಾಸ್ಕೆಟ್ಬಾಲ್ ಲೀಗ್ ವಿಶ್ವದ್ಯಾಂತ ತನ್ನದೇ ಆದ ಛಾಪನ್ನು ಬೀರಿದೆ. ಆರಂಭದಲ್ಲಿ ಬಾಸ್ಕೆಟ್ಬಾಲ್ ಆಸೋಸಿಯೇಷನ್ ಆಫ್ ಅಮೆರಿಕ ಎಂಬ ಹೆಸರಿನಲ್ಲಿದ್ದು, ಬಳಿಕ ನ್ಯಾಷನಲ್ ಬಾಸ್ಕೆಟ್ಬಾಲ್ ಲೀಗ್ ವಿಲೀನದೊಂದಿಗೆ 1949ರಲ್ಲಿ ಎನ್ಬಿಎ ಎಂದು ಮರು ನಾಮಕರಣಗೊಂಡಿತ್ತು. ವಿಶ್ವ ಕ್ರೀಡೆಯಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ಆಟಗಾರರಲ್ಲಿ ಎನ್ಬಿಎ ತಾರೆಗಳು ಮುಂಚೂಣಿಯಲ್ಲಿ ಗುರುತಿಸಿಕೊಂಡಿದ್ದಾರೆ. ಇದು ಎನ್ಬಿಎ ಯಶಸ್ಸಿಗೆ ಕೈಗನ್ನಡಿಯಾಗಿದೆ. ಟೊರಂಟೊ ರಾಪ್ಟರ್ಸ್ 2019ನೇ ಸಾಲಿನಲ್ಲಿ ಎನ್ಬಿಎ ಕಿರೀಟ ಎತ್ತಿ ಹಿಡಿದಿತ್ತು. ಮಿನ್ನಿಯಾಪೋಲಿಸ್ / ಲಾಸ್ ಏಂಜಲೀಸ್ ಲೇಕರ್ಸ್ ಅತಿ ಹೆಚ್ಚು 31 ಬಾರಿ ಕಿರೀಟವನ್ನು ಗೆದ್ದಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2VgJL3H
