ವಿಶಾಖಪಟ್ಟಣ: ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಬಲಗೈ ಆರಂಭಿಕ ಬ್ಯಾಟ್ಸ್ಮನ್ ಚೊಚ್ಚಲ ದ್ವಿಶತಕ ಸಾಧನೆ ಮಾಡಿದ್ದಾರೆ. 371 ಎಸೆತಗಳನ್ನು ಎದುರಿಸಿದ ಮಯಾಂಕ್ 23 ಬೌಂಡರಿ ಹಾಗೂ 6 ಸಿಕ್ಸರ್ ನೆರವಿನಿಂದ 212 ರನ್ ಗಳಿಸಿದರು. ಅದರಲ್ಲೂ28 ವರ್ಷದ ಕರ್ನಾಟಕದ ಬಲಗೈ ಬ್ಯಾಟ್ಸ್ಮನ್ ಮಯಾಂಕ್ ಚೊಚ್ಚಲ ಶತಕವನ್ನು ದ್ವಿಶತಕವಾಗಿ ಪರಿವರ್ತಿಸಿದ ಭಾರತದ ನಾಲ್ಕನೇ ಬ್ಯಾಟ್ಸ್ಮನ್ ಎಂಬ ಹಿರಿಮೆಗೆ ಭಾಜನರಾದರು. 5ನೇ ಟೆಸ್ಟ್ ಆಡುತ್ತಿರುವ ಮಯಾಂಕ್, ಮೊದಲ ವಿಕೆಟ್ಗೆ ರೋಹಿತ್ ಶರ್ಮ ಜತೆ 317 ರನ್ಗಳ ದಾಖಲೆ ಜತೆಯಾಟದಲ್ಲಿಯೂ ಭಾಗಿಯಾದರು. ಇದರೊಂದಿಗೆ ಆರಂಭಿಕರಾಗಿ 300ಕ್ಕೂ ಅಧಿಕ ರನ್ ಪೇರಿಸಿದ ಭಾರತದ ಮೂರನೇ ಜೋಡಿ ಎಂಬ ಗೌರವಕ್ಕೆ ಮಯಾಂಕ್ ಮತ್ತು ರೋಹಿತ್ ಪಾತ್ರರಾದರು. ಬಿಸಿಸಿಐ ಟಿವಿಯಲ್ಲಿ ಟೆಸ್ಟ್ ಉಪನಾಯಕ ಅಜಿಂಕ್ಯ ರಹಾನೆ ಸಂದರ್ಶನ ವೇಳೆಯಲ್ಲಿ ಮಯಾಂಕ್ ಅಗರ್ವಾಲ್ ಗೇಮ್ ಪ್ಲ್ಯಾನ್ ಬಗ್ಗೆ ವಿವರಿಸಿದ್ದಾರೆ. ಮೊದಲ ದಿನದ ಪ್ರಥಮ ಅವಧಿಯಲ್ಲಿ ಹೊಸ ಚೆಂಡಿಗೆ ವಿಕೆಟ್ ನೀಡದೇ ಇರುವುದು ನಮ್ಮ ಗುರಿಯಾಗಿತ್ತು. ಬಳಿಕ ಎದುರಾಳಿಗಳ ಮೇಲೆ ಒತ್ತಡ ಹೇರುವ ಪ್ರಯತ್ನ ಮಾಡಿದೆವು. ಕಗಿಸೋ ರಬಡ ಹಾಗೂ ವೆರ್ನಾನ್ ಪಿಲಾಂಡರ್ ನಿಖರ ದಾಳಿ ಸಂಘಟಿಸಿದರು. ಆದರೆ ನಾನು ಹಾಗೂ ರೋಹಿತ್ ಎಚ್ಚರದಿಂದ ಬ್ಯಾಟಿಂಗ್ ನಡೆಸಿದೆವು ಎಂದರು. ಕೋಚ್ ರವಿಶಾಸ್ತ್ರಿ ಕೂಡಾ ಇದನ್ನೇ ಸೂಚಿಸಿದ್ದರು. ಉತ್ತಮ ಆರಂಭವನ್ನು ದೊಡ್ಡ ಮೊತ್ತವಾಗಿ ಪರಿವರ್ತಿಸುವುದು ನನ್ನ ಇರಾದೆಯಾಗಿತ್ತು. ಒಮ್ಮೆ ಅರ್ಧಶತಕದ ಗಡಿ ದಾಟಿದಾಗ ನರ್ವಸ್ ಆಗಿದ್ದೆ ಎಂದು ಸೇರಿಸಿದರು. ಮಳೆಯಿಂದಾಗಿ ಮೊದಲ ದಿನದಾಟ ಟೀ ವಿರಾಮದ ವೇಳೆಗೆ ನಿಲುಗಡೆಯಾಗಿತ್ತು. ಭಾರತ ವಿಕೆಟ್ ನಷ್ಟವಿಲ್ಲದೆ 202 ರನ್ ಗಳಿಸಿತ್ತು. ಮಯಾಂಕ್ 84 ರನ್ ಗಳಿಸಿ ಅಜೇಯರಾಗುಳಿದರು. ಒಂದೆರಡು ಸಲ ಆಸ್ಟ್ರೇಲಿಯಾ ಹಾಗೂ ವಿಂಡೀಸ್ನಲ್ಲಿ 70ರ ಅಸುಪಾಸಿನಲ್ಲಿ ಔಟಾಗಿದ್ದರಿಂದ ನರ್ವಸ್ ಆಗಿದ್ದೆ. ಎರಡನೇ ದಿನದಾಟದಲ್ಲಿ ನಿದ್ರೆಯಿಂದ ಬೇಗನೇ ಎದ್ದುಕೊಂಡೆ. ಮನಸ್ಸಲ್ಲಿ ಇದೇ ಚಿಂತೆಯಿತ್ತು. ಹಾಗಾಗಿ ಮೊದಲ ಶತಕಕ್ಕಾಗಿ ತುಂಬಾನೇ ಎಚ್ಚರಿಕೆ ವಹಿಸಿದೆ ಎಂದರು. ವೈಯಕ್ತಿಕ ಮೈಲಿಗಲ್ಲು ತುಲುಪಿದಾಗ ಎರಡನೇ ಹೊಸ ಚೆಂಡನ್ನು ಎದುರಾಳಿಗಳು ಪಡೆದರು. ಈ ಸಂದರ್ಭದಲ್ಲಿ ಮಗದೊಂದು ವಿಕೆಟ್ ಬಿಟ್ಟುಕೊಡದೆ ಎದುರಾಳಿಗಳ ಮೇಲೆ ಆಕ್ರಮಣಕಾರಿಯಾಗಿ ಆಡುವ ತಂತ್ರಗಾರಿಕೆಯನ್ನು ಅನುಸರಿಸಿದೆ. ಒಟ್ಟಾರೆಯಾಗಿ ದ್ವಿಶತಕದ ಬಗ್ಗೆ ಅತೀವ ಖುಷಿಯಿದೆ ಎಂದರು. ಅತೀವ ಉಷ್ಣಾಂಶದ ನಡುವೆಯೂ ಗರಿಷ್ಠ ಫಿಟ್ನೆಸ್ ಕಾಯ್ದುಕೊಂಡಿರುವ ಮಯಾಂಕ್, ಅಮೋಘ ದ್ವಿಶತಕದ ಮೂಲಕ ತಮ್ಮ ಸ್ಥಾನವನ್ನು ಸುಭ್ರದ್ರಗೊಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2AIGBfI
