ಮೆಲ್ಬೋರ್ನ್: ಆತಿಥೇಯ ಆಸ್ಟ್ರೇಲಿಯಾದ ಬಲಿಷ್ಠ ಬೌಲರ್‌ಗಳ ಎದುರು ಭಯಮುಕ್ತವಾಗಿ ಬ್ಯಾಟ್‌ ಬೀಸಿದ ಯುವ ಓಪನರ್‌ ಶುಭಮನ್ ಗಿಲ್ ಕೇವಲ 5 ರನ್‌ಗಳ ಅಂತರದಲ್ಲಿ ತಮ್ಮ ಚೊಚ್ಚಲ ಅರ್ಧಶತಕದಿಂದ ವಂಚಿತರಾದರೂ ಕೂಡ ಎಲ್ಲರ ಗಮನ ಸೆಳೆಯುವಲ್ಲಿ ಸಫಲರಾಗಿದ್ದಾರೆ. ಈ ಬಗ್ಗೆ ಮಾತನಾಡಿದ ಭಾರತ ತಂಡದ ಮಾಜಿ ವೇಗದ ಬೌಲರ್‌ ಅಜಿತ್ ಅಗರ್ಕರ್, ಪಂಜಾಬ್‌ ಮೂಲದ ಯುವ ಪ್ರತಿಭೆ ಎರಡು ವರ್ಷಗಳ ಹಿಂದೆಯೇ ಭಾರತ ತಂಡದ ಪರ ಟೆಸ್ಟ್‌ ಕ್ರಿಕೆಟ್ ಆಡಬೇಕಿತ್ತು ಎಂದು ಗುಣಗಾನ ಮಾಡಿದ್ದಾರೆ. ಇಲ್ಲಿನ ಎಂಸಿಜಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಬಾರ್ಡರ್-ಗವಾಸ್ಕರ್‌ ಟ್ರೋಫಿ ಟೆಸ್ಟ್‌ ಸರಣಿಯ 2ನೇ ಟೆಸ್ಟ್‌ ಪಂದ್ಯದ ಮೊದಲ ದಿನದಾಟದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ಕೆ ಮಾಡಿದ್ದ ತಂಡವನ್ನು 195ಕ್ಕೆ ಆಲ್ಔಟ್ ಮಾಡುವಲ್ಲಿ ಭಾರತ ಯಶಸ್ವಿಯಾಯಿತು. ಬಳಿಕ ಬ್ಯಾಟಿಂಗ್‌ ಆರಂಭಿಸಿದ ಪರ ದಿನದಾಟದ ಅಂತ್ಯಕ್ಕೆ 38 ಎಸೆತಗಳಲ್ಲಿ 28 ರನ್‌ ಗಳಿಸಿದ ಗಿಲ್ ತಂಡಕ್ಕೆ 36/1 ರನ್‌ ತಂದುಕೊಟ್ಟಿದ್ದರು. ಬಳಿಕ ಎರಡನೇ ದಿನದಾಟದಲ್ಲೂ ತಮ್ಮ ಆಕ್ರಮಣಕಾರಿ ಬ್ಯಾಟಿಂಗ್‌ ಮುಂದುವರಿಸಿ 65 ಎಸೆತಗಳಲ್ಲಿ 8 ಫೋರ್‌ನೊಂದಿಗೆ 45 ರನ್‌ ಗಳಿಸಿದ್ದರು. ಆದರೆ, ಪ್ಯಾಟ್‌ ಕಮಿನ್ಸ್‌ ಬೌಲಿಂಗ್‌ನಲ್ಲಿ ಕೊಂಚ ಮೈಮರೆತ ಕಾರಣ ಪದರ್ದಾಣೆಯ ಪಂದ್ಯದಲ್ಲೇ ಅರ್ಧಶತಕ ಬಾರಿಸುವ ಅವಕಾಶದಿಂದ ವಂಚಿತರಾದರು. " 2 ವರ್ಷ ಹಿಂದೆಯೇ ಭಾರತ ತಂಡದ ಪರ ಟೆಸ್ಟ್‌ ಕ್ರಿಕೆಟ್ ಆಡಬೇಕಿತ್ತು. ಬಲಿಷ್ಠ ಆಟ ಅವರದ್ದಾಗಿದೆ. ಅಂತಾರಾಷ್ಟ್ರೋಯ ಮಟ್ಟದಲ್ಲಿ ರನ್‌ ಗಳಿಸುವ ಸಾಮರ್ಥ್ಯ ಅವರಲ್ಲಿದೆ ಎಂಬುದನ್ನು ಸ್ಪಷ್ಟವಾಗಿ ಕಾಣಬಹುದಾಗಿದೆ," ಎಂದು ಸೋನಿ ಸ್ಪೋರ್ಟ್ಸ್‌ನ ಎಕ್ಸ್‌ಸ್ಟ್ರಾ ಇನಿಂಗ್ಸ್‌ ಕಾರ್ಯಕ್ರಮದಲ್ಲಿ ಗಿಲ್ ಹೇಳಿದ್ದಾರೆ. ಪಂದ್ಯದಲ್ಲಿ ಅದೃಷ್ಟ ಕೂಡ ಗಿಲ್ ಕೈ ಹಿಡಿದಂತ್ತಿತ್ತು. ಏಕೆಂದರೆ 5 ರನ್‌ ಗಳಿಸಿದ್ದಾಗ ಎದುರಾಳಿ ಫೀಲ್ಡರ್‌ಗಳು ಕ್ಯಾಚ್‌ ಕೈಚೆಲ್ಲಿದ ಪರಿಣಾಮ ಜೀವದಾನ ಪಡೆದಿದ್ದರು. ಜೊತೆಗೆ ಮಿಚೆಲ್‌ ಸ್ಟಾರ್ಕ್ ಮತ್ತು ಪ್ಯಾಟ್‌ ಕಮಿನ್ಸ್‌ ಬೌಲಿಂಗ್‌ ಎದುರು ಹಲವು ಬಾರಿ ಬೀಟನ್‌ ಆಗಿದ್ದರು. ಪಂದ್ಯದ ಮೊದಲ ದಿನ ಆರಂಭದಲ್ಲೇ ಮಯಾಂಕ್ ಅಗರ್ವಾಲದ (0) ವಿಕೆಟ್‌ ಕಳೆದುಕೊಂಡ ಭಾರತ ತಂಡಕ್ಕೆ ಚೇತರಿಕೆ ನೀಡಿದ ಗಿಲ್, 2ನೇ ವಿಕೆಟ್‌ಗೆ ಅನುಭವಿ ಬ್ಯಾಟ್ಸ್‌ಮನ್‌ ಚೇತೇಶ್ವರ್ ಪೂಜಾರ (17) ಅವರೊಟ್ಟಿಗೆ ಅರ್ಧಶತಕದ ಜೊತೆಯಾಟವಾಡಿದರು. ಈ ಜೋಡಿ 127 ಎಸೆತಗಳಲ್ಲಿ 61 ರನ್‌ಗಳ ಮನಮೋಹಕ ಜೊತೆಯಾಟವಾಡಿತು. "ದಿನದಾಟದ ಕೊನೆಯ ಅವಧಿಯಲ್ಲಿ ಬ್ಯಾಟ್‌ ಮಾಡುವುದು ಅಷ್ಟು ಸುಲಭವಲ್ಲ. ಆದರೆ ಪ್ರತಿ ಎಸೆತವನ್ನು ಎದುರಿಸುತ್ತಿದ್ದಂತೆಯೇ ಗಿಲ್ ಅವರಲ್ಲಿ ಆತ್ಮವಿಶ್ವಾಸ ಹೆಚ್ಚಾಯಿತು. ಅವಕಾಶ ಸಿಕ್ಕಿದೆ ಜೊತೆಗೆ ಅದೃಷ್ಟವೂ ಕೈ ಹಿಡಿದಿದೆ. ಈ ಸಂದರ್ಭದಲ್ಲಿ ಇದರ ಅಗತ್ಯವೂ ಇದೆ. ಸಿಕ್ಕ ಅವಕಾಶ ಮತ್ತು ಕೈಹಿಡಿದ ಅದೃಷ್ಟದ ಸಂಪೂರ್ಣ ಲಾಭ ಪಡೆಯಲಿ ಎಂಬುದಷ್ಟೇ ಆಶಯ," ಎಂದು ಅಜಿತ್ ಅಗರ್ಕರ್ ಹೇಳಿದ್ದಾರೆ. ಸಂಕ್ಷಿಪ್ತ ಸ್ಕೋರ್‌ ಆಸ್ಟ್ರೇಲಿಯಾ: ಮೊದಲ ಇನಿಂಗ್ಸ್‌ 72.3 ಓವರ್‌ಗಳಲ್ಲಿ 195 ಆಲ್ಔಟ್ (ಮ್ಯಾಥ್ಯೂ ವೇಡ್‌ 30, ಮಾರ್ನಸ್‌ ಲಾಬುಶೇನ್ 48, ಟ್ರಾವಿಸ್‌ ಹೆಡ್‌ 38, ನೇಥನ್ ಲಯಾನ್ 20; ಜಸ್‌ಪ್ರೀತ್‌ ಬುಮ್ರಾ 56ಕ್ಕೆ 4, ಆರ್‌ ಅಶ್ವಿನ್ 35ಕ್ಕೆ 3, ಮೊಹಮ್ಮದ್ ಸಿರಾಜ್ 40ಕ್ಕೆ 2). ಭಾರತ: ಮೊದಲ ಇನಿಂಗ್ಸ್‌ 72 ಓವರ್‌ಗಳ ಅಂತ್ಯಕ್ಕೆ 214/5 (ಶುಭಮನ್ ಗಿಲ್ 45, ಚೇತೇಶ್ವರ್ ಪೂಜಾರ 17, ಅಜಿಂಕ್ಯ ರಹಾನೆ 70*, ಹನುಮ ವಿಹಾರಿ 21, ರಿಷಭ್ ಪಂತ್ 29; ಮಿಚೆಲ್‌ ಸ್ಟಾರ್ಕ್ 49ಕ್ಕೆ 2, ಪ್ಯಾಟ್‌ ಕಮಿನ್ಸ್‌ 51ಕ್ಕೆ 2, ನೇಥನ್ ಲಯಾನ್ 43ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3ppVlaH
