ಬೆಂಗಳೂರು: ವಿಶ್ವ ಮನರಂಜನಾ ಕುಸ್ತಿ (WWE) ಕ್ರೀಡೆಯ ಹೆಸರಾಂತ ಹಾಗೂ ಮಾಜಿ ಡೀವಾ ಚಾಂಪಿಯನ್ ಭಾರತ ಪ್ರವಾಸದಲ್ಲಿದ್ದು, ಉದ್ಯಾನ ನಗರಿ ಬೆಂಗಳೂರಿಗೂ ಆಗಮಿಸಿದ್ದಾರೆ. ಮೊದಲಿಗೆ ಮುಂಬೈಗೆ ಭೇಟಿ ನೀಡಿದ್ದ ಅಮೆರಿಕದ ಜಟ್ಟಿ ಶಾರ್ಲೊಟ್, ಬಾಲಿವುಡ್ ನಟ ಅವರೊಟ್ಟಿಗೆ ಸಿನಿಮಾ ಹಾಡಿಗೆ ನೃತ್ಯ ಮಾಡಿಯೂ ಗಮನ ಸೆಳೆದಿದ್ದಾರೆ. ಎಲ್ಲಕ್ಕಿಂತಲೂ ಮಿಗಿಲಾಗಿ ಬೆಂಗಳೂರಿಗೂ ಭೇಟಿ ನೀಡಿ, ತಾವೇ ಖುದ್ದಾಗಿ ಸೀರೆಯುಡುವುದನ್ನು ಕಲಿತುಕೊಂಡಿರುವುದಾಗಿ ತಮ್ಮ ಸೋಷಿಯಲ್ ಮೀಡಿಯಾ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಬೆಂಗಳೂರಿನಲ್ಲಿ ಮಕ್ಕಳ ದಿನಾಚರಣೆಯ ಅಂಗವಾಗಿ ನಡೆದ ಡಬ್ಲ್ಯುಡಬ್ಲ್ಯುಇ ಕುಸ್ತಿಯ ಪ್ರಚಾರ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಯುವ ಅಭಿಮಾನಿಗಳೊಟ್ಟಿಗೆ ಕೆಲ ಕಾಲ ಸಮಯ ಕಳೆದ 33 ವರ್ಷದ ಕುಸ್ತಿಪಟು, ಇದೇ ವೇಳೆ ನೇರಳೆ ಬಣ್ಣದ ಸೀರೆಯುಟ್ಟು ಅಪ್ಪಟ ಭಾರತೀಯಳಂತೆ ಪೋಸ್ ಕೊಟ್ಟಿದ್ದಾರೆ. ಸೀರೆಯಲ್ಲಿ ಮಿಂಚುತ್ತಿರುವ ಶಾರ್ಲೊಟ್ ಫ್ಲೇರ್ ಅವರ ಫೋಟೊಗಳಿಗೆ ಸೋಷಿಯಲ್ ಮೀಡಿಯಾದಲ್ಲಿ ಸಹಸ್ರಾರು ಲೈಕ್ಸ್ಗಳು ಕೂಡ ಹರಿದುಬಂದಿದೆ. ಒಟ್ಟಾರೆ ತಮ್ಮ ಚೊಚ್ಚಲ ಭಾರತ ಪ್ರವಾಸದಲ್ಲಿ ಹಲವು ಹೊಸತನ್ನು ಕಲಿತು ಮೈಗೂಡಿಸಿಕೊಂಡ ಮನರಂಜನಾ ಕುಸ್ತಿಯ ದಿಗ್ಗಜ ಕುಸ್ತಿಪಟು ರಿಕ್ ಫ್ಲೇರ್ ಅವರ ಪುತ್ರಿ ಆಗಿರುವ ಶಾರ್ಲೊಟ್ ಫ್ಲೇರ್, ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ ಮತ್ತು ಟ್ವಿಟರ್ ಖಾತೆಯಲ್ಲಿ ಭಾವನಾತ್ಮಕ ಸಂದೇಶವೊಂದನ್ನೂ ಅಭಿಮಾನಿಗಳಿಗೆ ರವಾನಿಸಿದ್ದಾರೆ. ಭಾರತದ ಮೇಲೆ ಪ್ಯಾರ್ಗೆ ಆಗ್ಬಿಟೈತೆ! "ನನಗೆ ಭಾರತದ ಮೇಲೆ ಪ್ರೀತಿ ಬಂದಿದೆ. ಇಲ್ಲಿ ಕೌಟುಂಬಿಕ ವಾತಾವರಣ ಬಲಿಷ್ಠ ಬಾಂಧವ್ಯ, ಪ್ರೀತಿ, ಸಂಭ್ರಮಾಚರಣೆ ಹಾಗೂ ಜನರ ಔದಾರ್ಯತೆಗೆ ಮನ ಸೋತಿದ್ದೇನೆ. ನನ್ನ ಭಾರತ ಪ್ರವಾಸವನ್ನು ವಿಶೇಷವನ್ನಾಗಿಸಿದ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ಬಾಲಿವುಡ್ ಹಾಡಿಗೆ ಡ್ಯಾನ್ ಮಾಡಿದ್ದು, ಖುದ್ದಾಗಿ ಸೀರೆಯುಡುವುದನ್ನು ಕಲಿತದ್ದು ಎಲ್ಲವೂ ವಿಶೇಷ ನೆನಪುಗಳು. ನನ್ನ ಜೀವನುದ್ದಕ್ಕೂ ಈ ಸವಿನೆನಪನ್ನು ಉಳಿಸಿಕೊಳ್ಳಲಿದ್ದೇನೆ," ಎಂದು ಶಾರ್ಲೊಟ್ ಭಾವನಾತ್ಮಕ ಸಂದೇಶ ಬರೆದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2CSrj9x
