ಕೋಲ್ಕೊತಾ: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧ ನಡೆಯುತ್ತಿರುವ ಪಂದ್ಯದಲ್ಲಿ ಭಾರತದ ವಿಕೆಟ್ ಕೀಪರ್ ವೃದ್ಧಿಮಾನ್ ಸಹಾ ಸೂಪರ್ ಮ್ಯಾನ್ ತರಹನೇ ಡೈವ್ ಹೊಡೆದು ಕ್ಯಾಚ್ ಹಿಡಿಯುವ ಮೂಲಕ ಗಮನ ಸೆಳೆದಿದ್ದಾರೆ. ಕೋಲ್ಕೊತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ನಡೆಯುತ್ತಿರುವ ಐತಿಹಾಸಿಕ ಗುಲಾಬಿ ಚೆಂಡಿನ ಪಂದ್ಯದಲ್ಲಿ ವಿಕೆಟ್ ಹಿಂದುಗಡೆ ಸಹಾ ಅದ್ಭುತ ಕೌಶಲ್ಯವನ್ನು ಪ್ರದರ್ಶಿಸಿದರು. ಭಾರತೀಯ ತ್ರಿವಳಿ ವೇಗಿಗಳು ಮಾರಕ ದಾಳಿ ಸಂಘಟಿಸುವ ಮೂಲಕ ಬಾಂಗ್ಲಾ ಬ್ಯಾಟ್ಸ್ಮನ್ಗಳನ್ನು ಹೆಡೆಮುರಿ ಕಟ್ಟಿದರು. ಇದಕ್ಕೆ ತಕ್ಕಂತೆ ವಿಕೆಟ್ ಹಿಂದುಗಡೆ ವೃದ್ಧಿಮಾನ್ ಸಹಾ ವೃತಿಪರತೆಯನ್ನು ಮೆರೆಯುವ ಮೂಲಕ ಮೆಚ್ಚುಗೆಗೆ ಪಾತ್ರವಾದರು. ಇದೇ ಮೊದಲ ಬಾರಿಗೆ ಭಾರತ ಪಂದ್ಯವನ್ನು ಆಡುತ್ತಿದೆ. ಅಲ್ಲದೆ ಭಾರತೀಯ ವೇಗಿಗಳ ದಾಳಿಯು ವ್ಯಾಪಕ ಸ್ವಿಂಗ್ಗಳನ್ನು ಪಡೆಯುತ್ತಿದ್ದವು. ಆದರೆ ಚಾಣಾಕ್ಷ್ಯ ರೀತಿಯಲ್ಲಿ ಚೆಂಡನ್ನು ಕಲೆಕ್ಟ್ ಮಾಡಿರುವ ಸಹಾ ಮಿಂಚಿನ ಆಟ ಪ್ರದರ್ಶಿಸಿದರು. ಈ ನಡುವೆ ಇಶಾಂತ್ ಶರ್ಮಾ ದಳಿಯಲ್ಲಿ ಮಹಮುದುಲ್ಲಾ ಬ್ಯಾಟ್ಗೆ ತಗುಲಿದ ಚೆಂಡನ್ನು ಸೂಪರ್ ಮ್ಯಾನ್ ತರಹನೇ ತನ್ನ ಬಲ ತುದಿಗೆ ಡೈವ್ ಹೊಡೆದು ಅದ್ಭುತ ಕ್ಯಾಚ್ ಹಿಡಿದರು. ಅಷ್ಟೇ ಯಾಕೆ ಟೆಸ್ಟ್ ಕ್ರಿಕೆಟ್ನಲ್ಲಿ 100 ಡಿಸ್ಮಿಸಲ್ಗಳನ್ನು ಮಾಡಿದ ದಾಖಲೆಗೆ ಭಾಜನವಾದರು. ಇದರೊಂದಿಗೆ 100 ಡಿಸ್ಮಿಸಲ್ ಮಾಡಿದ ಭಾರತದ ಐದನೇ ವಿಕೆಟ್ ಕೀಪರ್ ಎನಿಸಿಕೊಂಡರು. ಇದರಲ್ಲಿ 89 ಕ್ಯಾಚ್ ಹಾಗೂ 11 ಸ್ಟಂಪಿಂಗ್ಗಳು ಸೇರಿಕೊಂಡಿದೆ. ಒಟ್ಟಾರೆಯಾಗಿ ವಿಕೆಟ್ ಹಿಂದುಗಡೆ ಅಧ್ಭುತ ನಿರ್ವಹಣೆ ನೀಡಿರುವ ಲೋಕಲ್ ಬಾಯ್ ವೃದ್ಧಿಮಾನ್ ಸಹಾ, ಎಲ್ಲ ವಿಭಾಗದಿಂದಲೂ ಶ್ಲಾಘನೆಗೆ ಪಾತ್ರವಾದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/37uZRfS
