ಹೊಸದಿಲ್ಲಿ: ಜಮ್ಮು-ಕಾಶ್ಮೀರ ಹಾಗೂ ಲಡಾಖ್ ಕೇಂದ್ರಾಡಳಿತ ಪ್ರದೇಶಗಳ ಹೊಸ ರಾಜಕೀಯ ನಕ್ಷೆಯಲ್ಲಿ ಪಾಕ್ ಆಕ್ರಮಿತ ಕಾಶ್ಮೀರದ ಪ್ರದೇಶಗಳನ್ನೂ ಸೇರಿಸಲಾಗಿದ್ದು, ಮುಂದಿನ ಉಪಕ್ರಮದ ಸುಳಿವ ನೀಡಲಾಗಿದೆ. 370ನೇ ವಿಧಿ ರದ್ದತಿ ಬಳಿಕ ಉಕ್ಕಿನ ಮನುಷ್ಯ ಖ್ಯಾತಿಯ ಸರ್ದಾರ್ ವಲ್ಲಭಭಾಯಿ ಪಟೇಲರ ಜನ್ಮದಿನವಾದ ಅ.31ರಂದು ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ಕೇಂದ್ರಾಡಳಿತ ಪ್ರದೇಶಗಳಾಗಿ ಅಸ್ತಿತ್ವಕ್ಕೆ ಬಂದಿವೆ. ಇದರ ಬೆನ್ನಲ್ಲೇ ಗೃಹ ಸಚಿವಾಲಯ ದೇಶದ ಹೊಸ ರಾಜಕೀಯ ನಕ್ಷೆ ಬಿಡುಗಡೆ ಮಾಡಿದ್ದು ಅದರಲ್ಲಿ ಪಿಒಕೆಯ ಮುಜಫರಾಬಾದ್ ಮತ್ತು ಮೀರ್ಪುರ ಪ್ರದೇಶಗಳನ್ನು ಜಮ್ಮು-ಕಾಶ್ಮೀರದ ಭಾಗವಾಗಿ ಮತ್ತು ಗಿಲ್ಗಿಟ್, ಬಲ್ಟಿಸ್ತಾನ್ವನ್ನು ಲಡಾಖ್ ಗಡಿಯೊಳಗೆ ಗುರುತಿಸಲಾಗಿದೆ. ಇದರೊಂದಿಗೆ ಪಿಒಕೆಯೂ ಭಾರತದ ಮುಕುಟಮಣಿ ಜಮ್ಮು-ಕಾಶ್ಮೀರದ ಅವಿಭಾಜ್ಯ ಅಂಗ ಎಂಬ ಸಂದೇಶ ರವಾನಿಸಿದೆ. 1947ರಲ್ಲಿ ಜಮ್ಮು-ಕಾಶ್ಮೀರವು ಕಥುವಾ, ಜಮ್ಮು, ಉಧಂಪುರ, ರಿಯಾಸಿ, ಅನಂತನಾಗ್, ಬಾರಾಮುಲ್ಲಾ, ಪೂಂಛ್, ಮೀರ್ಪುರ, ಮುಜಫರಾಬಾದ್, ಲೇಹ್, ಲಡಾಕ್, ಗಿಲ್ಗಿಟ್, ಗಿಲ್ಗಿಟ್ ವಜರತ್, ಚಿಲಾಸ್ ಮತ್ತು ಬುಡಕಟ್ಟು ಪ್ರದೇಶ ಎಂಬ 14 ಜಿಲ್ಲೆಗಳನ್ನು ಹೊಂದಿತ್ತು. 2019ರ ಹೊತ್ತಿಗೆ ಹಿಂದಿನ ರಾಜ್ಯ ಸರಕಾರವು ರಾಜ್ಯ ಪುನರ್ವಿಂಗಡಣೆ ಮಾಡಿ ಕುಪ್ವಾರ, ಬಂಡಿಪೋರಾ, ಗಂದೇರ್ಬಾಲ್, ಶ್ರೀನಗರ, ಬುದ್ಗಾಂ, ಪುಲ್ವಾಮಾ, ಶೋಪಿಯಾನ್, ಕುಲ್ಗಾಂ, ರಾಜೌರಿ, ರಾಂಬಾನ್, ದೋಡಾ, ಕಿಶ್ತವಾರ್, ಸಾಂಬಾ ಮತ್ತು ಕಾರ್ಗಿಲ್ಗಳನ್ನು ಹೊಸ ಜಿಲ್ಲೆಗಳನ್ನಾಗಿಸಿ ಒಟ್ಟು 28 ಜಿಲ್ಲೆಗಳನ್ನು ರಚಿಸಿತ್ತು. ಈಗ ಹೊಸ ಮ್ಯಾಪ್ನಲ್ಲಿ ಜಮ್ಮು- ಕಾಶ್ಮೀರ ಕೇಂದ್ರಾಡಳಿತ ಪ್ರದೇಶ 22 ಜಿಲ್ಲೆಗಳನ್ನು ಹೊಂದಿದ್ದರೆ, ಲಡಾಖ್ ಕೇಂದ್ರಾಡಳಿತ ಪ್ರದೇಶವು ಲೇಹ್ ಮತ್ತು ಕಾರ್ಗಿಲ್ ಜಿಲ್ಲೆಗಳನ್ನು ಹೊಂದಿದೆ. ಆದರೆ ಈ ಎರಡೂ ಜಿಲ್ಲೆಗಳ ವ್ಯಾಪ್ತಿಯಲ್ಲಿ ಈಗ ಜಮ್ಮು-ಕಾಶ್ಮೀರದ ಇತರ ಕೆಲ ಭಾಗಗಗಳು ಹಾಗೂ ಪಿಒಕೆಯ ಗಿಲ್ಗಿಟ್, ಬಲ್ಟಿಸ್ತಾನ್ ಕೂಡ ಸೇರಿದೆ.
from India & World News in Kannada | VK Polls https://ift.tt/2ra2Jye
