ಬೆಂಗಳೂರು: ರಾಜಕಾರಣದಲ್ಲಿ ಇತ್ತೀಚೆಗೆ ಸಿಡಿ ಬಿಡುಗಡೆ, ವಿಡಿಯೋ ಬಿಡುಗಡೆ, ಆಡಿಯೋ ಬಾಂಬ್ ಸ್ಫೋಟ! ಕಾಮನ್ ಆಗಿಬಿಟ್ಟಿದೆ. ಕೆಲವು ದಿನಗಳ ಕಾಲ ಈ ಸಿಡಿ, ವಿಡಿಯೋ, ಆಡಿಯೋ ಭಾರೀ ಸುದ್ದಿಯಲ್ಲಿರುತ್ತವೆ. ದಿನಕಳೆದಂತೆ ತಣ್ಣಗಾಗಿಬಿಡುತ್ತವೆ. ಇದೀಗ ಇಂಥದ್ದೇ ಒಂದು ‘ಆಡಿಯೋ ಬಾಂಬ್’ ಭಾರೀ ಸದ್ದು ಮಾಡ್ತಿದೆ. ಮೀಡಿಯಾಗಳಲ್ಲಿ ಸದ್ದು ಮಾಡ್ತಿರುವ ಆಡಿಯೋ, ನ್ಯಾಯಾಲಯದಲ್ಲೂ ಸಾಕ್ಷಿಯಾಗುತ್ತಾ? ಇದೀಗ ಸುಪ್ರೀಂ ಮೆಟ್ಟಿಲೇರಿರುವ ಮಾತನಾಡಿದ್ದಾರೆ ಎನ್ನಲಾದ ಆಡಿಯೋ, ಅನರ್ಹ ಶಾಸಕರ ಕುರಿತಾದ ಸುಪ್ರೀಂ ತೀರ್ಪಿನ ಮೇಲೇ ಪರಿಣಾಮ ಬೀರುತ್ತಾ? ಈ ಎಲ್ಲಾ ಪ್ರಶ್ನೆಗೆ ಇಲ್ಲಿದೆ ಉತ್ತರ! ನ್ಯಾಯಾಲಯದಲ್ಲಿ ‘ಆಡಿಯೋ’ ಸಾಕ್ಷಿಯಾಗಬಲ್ಲದೇ? ಇವತ್ತಿನ ಗ್ಯಾಜೆಟ್ ಯುಗದಲ್ಲಿ ಪ್ರತಿಯೊಂದನ್ನೂ ಅತ್ಯಂತ ಸುಲಭವಾಗಿ ರೆಕಾರ್ಡ್ ಮಾಡಿಬಿಡಬಹುದು. ಆದ್ರೆ, ಈ ಧ್ವನಿ ನಿಖರವೇ ಅನ್ನೋದೇ ದೊಡ್ಡ ಪ್ರಶ್ನೆ. ಈ ನಿಖರತೆಯ ಪತ್ತೆಗೆ ಕಾನೂನು ಪ್ರಕಾರ ಹಲವು ಮಾನದಂಡಗಳನ್ನು ಅನುಸರಿಸಲಾಗುತ್ತೆ. 1 - ಕೋರ್ಟ್ನಲ್ಲಿ ದಾಖಲಾಗಿರುವ ಪ್ರಕರಣಕ್ಕೂ ಈ ಆಡಿಯೋ ಧ್ವನಿ ಮುದ್ರಿಕೆಗೂ ಸಂಬಂಧವಿದೆಯೇ? 2 - ಆಡಿಯೋ ಎಲ್ಲಿ ಸಂಗ್ರಹಿಸಲಾಗಿದೆ? 3 - ಯಾವುದೇ ಒಂದು ಎಲೆಕ್ಟ್ರಾನಿಕ್ ಉಪಕರಣದಲ್ಲಿ ಎಷ್ಟು ಕಾಲದಿಂದ ಈ ಆಡಿಯೋ ಧ್ವನಿಮುದ್ರಿಕೆ ಸಂಗ್ರಹಿಸಿ ಇಡಲಾಗಿತ್ತು? ಈ ‘ವಿದ್ಯುನ್ಮಾನ ದಾಖಲೆ’ಯನ್ನು ತಿರುಚಲು ಸಾಧ್ಯವಾಗುವಂಥಾ ಅಂಶಗಳಿವೆಯೇ? ಏನಿದು ವಿದ್ಯುನ್ಮಾನ ದಾಖಲೆ? ಮಾಹಿತಿ ಮತ್ತು ತಂತ್ರಜ್ಞಾನ ಕಾಯ್ದೆಯನ್ವಯ ‘ವಿದ್ಯುನ್ಮಾನ ದಾಖಲೆ ಅಂದರೆ ದತ್ತಾಂಶ. ದಾಖಲೆ ಅಥವಾ ದತ್ತಾಂಶ ಸೃಷ್ಟಿ, ಚಿತ್ರ ಅಥವಾ ಧ್ವನಿ ಸಂಗ್ರಹ, ವಿದ್ಯುನ್ಮಾನ ಮಾದರಿಯಲ್ಲಿ ಸ್ವೀಕರಿಸಿದ ಅಥವಾ ಕಳಿಸಿದ ದಾಖಲೆ, ದೃಶ್ಯ ಅಥವಾ ಕಂಪ್ಯೂಟರ್ ನಿರ್ಮಿತ ದಾಖಲೆಗಳೆಲ್ಲವೂ ವಿದ್ಯುನ್ಮಾನ ದಾಖಲೆ ಎನಿಸಿಕೊಳ್ಳುತ್ತೆ. ಹೀಗಾಗಿ ಆಡಿಯೋ ಧ್ವನಿ ಮುದ್ರಿಕೆ ಕೂಡಾ ವಿದ್ಯುನ್ಮಾನ ದಾಖಲೆ ವ್ಯಾಪ್ತಿಗೆ ಬರುತ್ತದೆ. ಪೊಲೀಸ್ ಅಧಿಕಾರಿಯೊಬ್ಬರು ಎಲೆಕ್ಟ್ರಾನಿಕ್ ಉಪಕರಣ ಬಳಸಿ ಏನಾದ್ರೂ ರೆಕಾರ್ಡ್ ಮಾಡಿಕೊಂಡರೂ ಕೂಡಾ ಭಾರತೀಯ ಕಾಯ್ದೆ ಪ್ರಕಾರ, ಪೊಲೀಸ್ ಬಳಿ ಇರುವ ವಿದ್ಯನ್ಮಾನ ದಾಖಲೆ ಕೂಡಾ ಸಾಕ್ಷ್ಯವಾಗುತ್ತೆ. ಒಂದು ವೇಳೆ ಯಾವುದಾದ್ರೂ ಒಂದು ಅತಿ ದೊಡ್ಡ ಎಲೆಕ್ಟಾನಿಕ್ ದಾಖಲೆಯಲ್ಲಿ ಕೋರ್ಟ್ಗೆ ಕೇವಲ ಒಂದು ಸಣ್ಣ ಭಾಗ ಮಾತ್ರ ಬೇಕಿದ್ದಲ್ಲಿ, ಕಕ್ಷಿದಾರರು ಪೂರ್ಣ ದಾಖಲೆಯನ್ನೇ ನೀಡಬೇಕು. ಉದಾಹರಣೆಗೆ ಯಾವುದೋ ಒಬ್ಬ ರಾಜಕೀಯ ನಾಯಕ ಮತ್ತೊಬ್ಬ ನಾಯಕನ್ನು ಅವಾಚ್ಯ ಶಬ್ಧದಿಂದ ನಿಂದಿಸಿದ್ದರೆ, ಕೇವಲ ಅವಾಚ್ಯ ಶಬ್ಧವನ್ನು ಆಡುವ ಭಾಗವನ್ನು ಮಾತ್ರ ತುಂಡರಿಸಿ ನೀಡಬಾರದು. ಸಂಪೂರ್ಣ ವಿಡಿಯೋ ಅಥವಾ ಆಡಿಯೋ ನ್ಯಾಯಾಲಯಕ್ಕೆ ಸಲ್ಲಿಕೆಯಾಗಬೇಕು. ಅವಾಚ್ಯ ಶಬ್ಧ ಬಳಸುವ ಮುನ್ನ ಹಾಗೂ ನಂತರದ ಪೂರ್ಣ ಹೇಳಿಕೆಯನ್ನು ನ್ಯಾಯಾಲಯ ಗಮನಿಸುತ್ತದೆ. ಯಾವ ಕಾಯ್ದೆಯಡಿ ವಿದ್ಯುನ್ಮಾನ ದಾಖಲೆ ಬರುತ್ತದೆ? ಭಾರತೀಯ ಸಾಕ್ಷ್ಯ ಕಾಯ್ದೆಯ ಸೆಕ್ಷನ್ 65ಬಿ ಅಡಿ ವಿದ್ಯುನ್ಮಾನ ದಾಖಲೆ ಪ್ರಸ್ತಾಪ ಬರುತ್ತದೆ. ಇದಕ್ಕೆ ಸಾಕಷ್ಟು ನಿಬಂಧನೆಗಳೂ ಇವೆ. ಅವುಗಳನ್ನು ಕೋರ್ಟ್ ಪರಿಶೀಲನೆ ನಡೆಸುತ್ತೆ.
- ಸಾಕ್ಷ್ಯ ಸಂಗ್ರಹವಾಗಿದ್ದ ಕಂಪ್ಯೂಟರ್ನಲ್ಲಿ ಮಾಹಿತಿ ತಿರುಚಲಾಗಿತ್ತೇ?
- ಕಂಪ್ಯೂಟರ್ನಲ್ಲಿ ಸಂಗ್ರಹವಾಗಿರುವ ಮಾಹಿತಿ ಸಹಜವಾಗಿಯೇ ಸಂಗ್ರಹವಾಗಿದೆಯೋ, ಉದ್ದೇಶ ಪೂರ್ವಕವೋ?
- ಸಾಕ್ಷ್ಯ ಸಂಗ್ರಹವಾಗಿರುವ ಸಂದರ್ಭದಲ್ಲಿ ಸದರಿ ಕಂಪ್ಯೂಟರ್ ಕಾರ್ಯನಿರತವಾಗಿತ್ತೇ? ಇಲ್ಲವೇ?
- ಮೊದಲಿಗೆ ಈ ಆಡಿಯೋ ಮಾತುಕತೆ ತಮ್ಮ ಪ್ರಕರಣಕ್ಕೆ ಅನ್ವಯ ಆಗುತ್ತೋ ಇಲ್ಲವೋ ಅನ್ನೋದನ್ನು ಪರಿಶೀಲಿಸುತ್ತಾರೆ
- ನಂತರ ಆಡಿಯೋದಲ್ಲಿರುವ ಧ್ವನಿಯನ್ನು ಪರಿಶೀಲಿಸುತ್ತಾರೆ
- ಅಂತಿಮವಾಗಿ ಆಡಿಯೋ ಧ್ವನಿ ಮುದ್ರಿಕೆಯ ನಿಖರತೆ ಹಾಗೂ ಅಸಲಿತನದ ಪರೀಕ್ಷೆ ನಡೆಯುತ್ತದೆ.
- ಆಡಿಯೋದಲ್ಲಿರುವ ವ್ಯಕ್ತಿಯ ಧ್ವನಿ, ಅದೇ ವ್ಯಕ್ತಿಯ ಧ್ವನಿಗೆ ಹೊಂದಾಣಿಕೆಯಾಗಬೇಕು
- ಒಂದು ವೇಳೆ ಆಡಿಯೋದಲ್ಲಿರುವ ಧ್ವನಿ ತನ್ನದಲ್ಲ ಎಂದು ಆರೋಪಿ ಹೇಳಿದರೆ ಮರು ಪರೀಕ್ಷೆ ನಡೆಸಬೇಕು
- ಆಡಿಯೋ ಧ್ವನಿ ಮುದ್ರಿಸಿದ ವ್ಯಕ್ತಿಯೇ ಸೂಕ್ತ ದಾಖಲೆ ಸಮೇತ ಧ್ವನಿಯ ನಿಖರತೆ ಬಗ್ಗೆ ಮಾಹಿತಿ ನೀಡಬೇಕು
from India & World News in Kannada | VK Polls https://ift.tt/33eIOwd
