ಕೋಲ್ಕೊತಾ: ಭಾರತದ ಚೊಚ್ಚಲ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವಣ ಮೊದಲ ಟೆಸ್ಟ್ ಪಂದ್ಯವು ಕೋಲ್ಕೊತಾದ ಈಡನ್ ಗಾರ್ಡನ್ ಮೈದಾನದಲ್ಲಿ ನವೆಂಬರ್ 22ರಂದು ಆರಂಭವಾಗಲಿದೆ. ಇದರಂತೆ ಟೀಮ್ ಇಂಡಿಯಾ ನಾಯಕ ಹಾಗೂ ಉಪನಾಯಕ ಅಜಿಂಕ್ಯ ರಹಾನೆ ನವೆಂಬರ್ 19 ಮಂಗಳವಾರ ಬೆಳಗ್ಗೆಯೇ ನಗರವನ್ನು ತಲುಪಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಭಾರತೀಯ ಆಟಗಾರರ ಪೈಕಿ ಕೊಹ್ಲಿ ಹಾಗೂ ರಹಾನೆ ಮೈದಾನವನ್ನು ಪ್ರವೇಶಿಸುವ ಮೊದಲಿಗರಾಗಲಿದ್ದಾರೆ. ಇತರೆ ಆಟಗಾರರು ಬ್ಯಾಚ್ಗಳಾಗಿ ಆಗಮಿಸಲಿದ್ದಾರೆ. ರೋಹಿತ್ ಶರ್ಮಾ ಹಾಗೂ ಮೊಹಮ್ಮದ್ ಶಮಿ ಕೊನೆಯದಾಗಿ ಟೀಮ್ ಇಂಡಿಯಾ ಕ್ಯಾಂಪ್ ಸೇರಿಕೊಳ್ಳಲಿದ್ದು, ಬುಧವಾರದಂದು ತಂಡವನ್ನು ಸೇರಿಕೊಳ್ಳಲಿದ್ದಾರೆ. ಇಶಾಂತ್ ಶರ್ಮಾ ಮಂಗಳವಾರ ರಾತ್ರಿಯ ವೇಳೆಗೆ ನಗರವನ್ನು ತಲುಪಲಿದ್ದಾರೆ. ಇತರೆಲ್ಲ ಆಟಗಾರರು ಬಾಂಗ್ಲಾದೇಶ ತಂಡದ ಜತೆಗೆ ಮಂಗಳವಾರ ಅಪರಾಹ್ನದ ವೇಳೆ ತಲುಪಲಿದ್ದಾರೆ. ಹಾಗಿದ್ದರೂ ಮಂಗಳವಾರ ವಿಶ್ರಾಂತಿಯ ದಿನವಾಗಿದ್ದು, ಯಾವುದೇ ರೀತಿಯ ಅಭ್ಯಾಸಗಳು ನಿಗದಿಯಾಗಿಲ್ಲ. ಇಂದೋರ್ನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ಇನ್ನಿಂಗ್ಸ್ ಹಾಗೂ 130 ರನ್ ಅಂತರದ ಭರ್ಜರಿ ಗೆಲುವು ದಾಖಲಿಸಿತ್ತು. ಕರ್ನಾಟಕದ ಮಯಾಂಕ್ ಅಗರ್ವಾಲ್ ಭರ್ಜರಿ ದ್ವಿಶತಕ (243) ಮಾಡಿದ್ದರು. ಇದೀಗ ಇತ್ತಂಡಗಳು ಐತಿಹಾಸಿಕ ಡೇ ನೈಟ್ ಟೆಸ್ಟ್ ಪಂದ್ಯಕ್ಕೆ ಸಿದ್ಧತೆ ನಡೆಸುತ್ತಿದೆ. ಇಂದೋರ್ ಪಂದ್ಯವನ್ನು ಮೂರು ದಿನಗಳಲ್ಲೇ ಗೆಲುವು ಬಾರಿಸಿದ ಟೀಮ್ ಇಂಡಿಯಾ, ಬಳಿಕ ಅಲ್ಲೇ ಉಳಿದುಕೊಂಡು ಹೊನಲು ಬೆಳಕಿನಲ್ಲಿ ಗುಲಾಬಿ ಚೆಂಡಿನಲ್ಲಿ ಅಭ್ಯಾಸದಲ್ಲಿ ಭಾಗವಹಿಸಿತ್ತು. ವಿಶ್ವ ಕ್ರಿಕೆಟ್ನಲ್ಲಿ ಇದುವರೆಗೆ ಆಡಲಾಗಿರುವ 11 ಟೆಸ್ಟ್ ಪಂದ್ಯಗಳಲ್ಲಿ ಫಲಿತಾಂಶಗಳು ದಾಖಲಾಗಿದ್ದವು. ಇದೀಗ ಕೋಲ್ಕೊತಾ ಡೇ ನೈಟ್ ಟೆಸ್ಟ್ನಲ್ಲೂ ಫಲಿತಾಂಶ ದಾಖಲಾಗುವುದು ಖಚಿತವೆನಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2OnlMgk
