ಭುವನೇಶ್ವರ: ಮುಂದಿನ ವರ್ಷ ನಡೆಯಲಿರುವ ಒಲಿಂಪಿಕ್ಸ್ಗಾಗಿ ನಡೆಯುತ್ತಿರುವ ಅರ್ಹತಾ ಸುತ್ತಿನ ಪಂದ್ಯಗಳಲ್ಲಿ ಭಾರತೀಯ ಪುರುಷ ಹಾಗೂ ಮಹಿಳಾ ಹಾಕಿ ತಂಡಗಳ ಜಯಭೇರಿ ಬಾರಿಸಿದೆ. ಭಾರತದ ವನಿತೆಯರ ಹಾಕಿ ತಂಡ ಹಾಕಿ ಟೆಸ್ಟ್ ಪಂದ್ಯದ ಮೊದಲ ಚರಣದಲ್ಲಿ ಪ್ರವಾಸಿ ಯುಎಸ್ ತಂಡವನ್ನು 5-1 ಗೋಲುಗಳ ಅಂತರದಲ್ಲಿ ಸೋಲಿಸಿ, ಒಲಿಂಪಿಕ್ ಅರ್ಹತಾ ಸುತ್ತಿಗೇರುವ ಅವಕಾಶವನ್ನು ಹೆಚ್ಚಿಸಿಕೊಂಡಿದೆ. ಇದೇ ಮೈದಾನದಲ್ಲಿನಡೆದ ಪಂದ್ಯದಲ್ಲಿ ಪುರುಷರ ತಂಡ ಪ್ರವಾಸಿ ರಷ್ಯಾ ತಂಡದ ವಿರುದ್ಧ 4-2 ಅಂತರದ ಗೆಲುವು ದಾಖಲಿಸಿದೆ. ಈ ತಂಡವೂ ಶನಿವಾರ ಎರಡನೇ ಪಂದ್ಯದಲ್ಲಿಆಡಲಿದ್ದು ಇಲ್ಲಿಮುನ್ನಡೆ ಸಾಧಿಸಿದರೆ ಕ್ವಾಲಿಫೈಯರ್ನಲ್ಲಿಆಡುವ ಅವಕಾಶ ಪಡೆಯಲಿದೆ. ಇಲ್ಲಿನ ಕಳಿಂಗ ಸ್ಟೇಡಿಯಂನಲ್ಲಿಶುಕ್ರವಾರ ನಡೆದ ಪಂದ್ಯದಲ್ಲಿ ಸಂಪೂರ್ಣ ಪಾರಮ್ಯ ಮೆರೆದ 9ನೇ ಶ್ರೇಯಾಂಕದ ಭಾರತದ ವನಿತೆಯರು ಅಧಿಕಾರಯುತ ಗೆಲುವನ್ನು ತಮ್ಮದಾಗಿಸಿಕೊಂಡರು. ಶನಿವಾರ ಎರಡನೇ ಪಂದ್ಯ ನಡೆಯಲಿದ್ದು, ಈ ಪಂದ್ಯ ಮುಕ್ತಾಯದ ಬಳಿಕ ಹೆಚ್ಚು ಗೋಲು ಗಳಿಸುವ ತಂಡ ಅರ್ಹತಾ ಸುತ್ತಿಗೆ ಪ್ರವೇಶ ಪಡೆಯಲಿದೆ. ಪ್ರಸ್ತುತ ನಾಲ್ಕು ಗೋಲುಗಳಿಂದ ಮುಂದಿರುವ ಭಾರತಕ್ಕೆ ಈ ಅವಕಾಶ ಹೆಚ್ಚಿದೆ. ಡ್ರ್ಯಾಗ್ಫ್ಲಿಕರ್ ಗುರ್ಜಿತ್ ಕೌರ್ (42 ಮತ್ತು 51ನೇ ನಿಮಿಷ), ಲಿಲಿಮಾ ಮಿಂಜ್ (28 ನಿ. ) ಮತ್ತು ಶರ್ಮಿಳಾ ದೇವಿ (40 ನಿ.) ಹಾಗೂ ನವ್ನೀತ್ ಕೌರ್ (46 ನಿ.) ಭಾರತದ ಗೆಲವಿನ ನಾಗಾಲೋಟಕ್ಕೆ ಕೊಡುಗೆ ನೀಡಿದರು. 54ನೇ ನಿಮಿಷದಲ್ಲಿ ದೊರಕಿದ ಪೆನಾಲ್ಟಿ ಅವಕಾಶದಲ್ಲಿ ಎರಿನ್ ಮ್ಯಾಟ್ಸನ್ ಬಾರಿಸಿದ ಏಕೈಕ ಗೋಲು ಯುಎಸ್ ತಂಡದ ಮರ್ಯಾದೆ ಕಾಪಾಡಿತು. ಭಾರತ ತಂಡ ಆರಂಭದಲ್ಲಿಎದುರಾಳಿಯಿಂದ ಒತ್ತಡ ಎದುರಿಸಿದರೂ ಬಳಿಕ ಚೇತರಿಸಿಕೊಂಡ ವನಿತೆಯರು, ಮೊದಲು ಸಿಕ್ಕ ಪೆನಾಲ್ಟಿ ಕಾರ್ನರ್ ಅವಕಾಶವನ್ನು ಕೈ ಚೆಲ್ಲಿದರು. ಆದರೆ, 28ನೇ ನಿಮಿಷದ ಬಳಿಕ ಚೇತರಿಸಿಕೊಂಡು ಆತಿಥೇಯರು 13ನೇ ರಾರಯಂಕಿನ ಯುಎಸ್ ಪಡೆಯ ಭದ್ರಕೋಟೆಯನ್ನು ಭೇದಿಸಿ ಗೋಲುಗಳನ್ನು ಸುರಿಮಳೆಗೈದರು. ಪ್ರದರ್ಶನದ ಕುರಿತು ಮಾತನಾಡಿದ ನಾಯಕಿ ರಾಣಿ ರಾಂಪಾಲ್ ''ನಮ್ಮ ತಂಡ ಸರ್ವತೋಮುಖ ಪ್ರದರ್ಶನ ನೀಡಿದ ಹಿನ್ನೆಲೆಯಲ್ಲಿಸುಲಭ ಜಯವನ್ನು ದಾಖಲಿಸಿತು,'' ಎಂದು ಹೇಳಿದರು. ಪುರುಷರ ತಂಡಕ್ಕೂ ಜಯ: ಪುರುಷರ ತಂಡವು ರಷ್ಯಾ ವಿರುದ್ಧ 4-2 ಅಂತರದ ಗೆಲುವು ದಾಖಲಿಸಿ ಕ್ವಾಲಿಫೈಯರ್ನಲ್ಲಿಆಡುವ ಅವಕಾಶ ಹೆಚ್ಚಿಸಿದೆ. ಭಾರತ ತಂಡದ ಪರ ಮನ್ದೀಪ್ (24 ಹಾಗೂ 53ನೇ ನಿಮಿಷ) ಹರ್ಮನ್ಪ್ರೀತ್ ಸಿಂಗ್ (5ನೇ ನಿಮಿಷ) ಎಸ್ ವಿ ಸುನಿಲ್ (48ನೇ ನಿಮಿಷ) ಗೋಲು ದಾಖಲಿಸುವ ಮೂಲಕ ಗೆಲುವಿನ ರೂವಾರಿಗಳೆನಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/324PKe0
