ಪಾಟ್ನಾ (ಬಿಹಾರ): ಭಾರತ-ಚೀನಾ ಸಂಘರ್ಷದಲ್ಲಿ ಹುತಾತ್ಮನಾಗಿದ್ದಾನೆ ಎಂದೇ ಭಾವಿಸಿದ್ದ ಯೋಧ, ತನ್ನ ಪತ್ನಿಗೆ ಕರೆ ಮಾಡಿ ತಾನಿನ್ನೂ ಬದುಕಿದ್ದೇನೆ ಎಂದಾಗ ಆಕೆಗೆ ಹೇಗಾಗಬೇಡ..?! ಇಂಥದ್ದೇ ಒಂದು ಘಟನೆ ಬಿಹಾರ ರಾಜ್ಯದ ಸರನ್ ಜಿಲ್ಲೆಯಲ್ಲಿ ನಡೆದಿದೆ. ಇಡೀ ಕುಟುಂಬವೇ ತಮ್ಮ ಮನೆ ಮಗ ವೀರ ಮರಣವನ್ನಪ್ಪಿದ ಎಂದು ಶೋಕಿಸುತ್ತಿರುವಾಗ, ಆತನ ಪತ್ನಿಗೆ ಮೊಬೈಲ್ ಕರೆ ಬಂದಿದೆ. ನೋಡಿದರೆ, ಮೃತಪಟ್ಟ ಎನ್ನುತ್ತಿರುವ ವ್ಯಕ್ತಿಯ ಮೊಬೈಲ್ ನಂಬರ್ನಿಂದಲೇ ಕರೆ ಬಂದಿದೆ. ಖುದ್ದು ಆತನೇ ಮಾತನಾಡುತ್ತಿದ್ಧಾನೆ..! ನಾನಿನ್ನೂ ಬದುಕಿದ್ದೇನೆ ಎನ್ನುತ್ತಿದ್ದಾನೆ..! ಯೋಧ ಸುನಿಲ್ ರೈ, ತನ್ನ ಪತ್ನಿ ಮೇನಕಾ ರೈಗೆ ಕರೆ ಮಾಡಿ ತಾನಿನ್ನೂ ಬದುಕಿದ್ದೇನೆ ಎಂದಾಗ, ಸೂತಕದ ಮನೆ ದಿಢೀರನೆ ಸಂಭ್ರಮದ ಮನೆಯಾಗಿ ಬದಲಾಗಿ ಹೋಯ್ತು. ತಮ್ಮ ಮಗ, ಹೆಮ್ಮೆಯ ಪುತ್ರ ಇನ್ನೂ ಬದುಕಿದ್ದಾನೆ ಎಂದು ದೃಢಪಡಿಸಿಕೊಂಡ ಪೋಷಕರು ಹಾಗೂ ಸಂಬಂಧಿಕರು ಸಂಭ್ರಮದಿಂದ ಕುಣಿದಾಡಿದರು. ಈ ಎಲ್ಲಾ ಗೊಂದಲ, ಆತಂಕಕ್ಕೆ ಕಾರಣವಾಗಿದ್ದು, ಸುನಿಲ್ ರೈ ಎಂಬ ಹೆಸರು. ಇದೇ ಹೆಸರಿನ ಓರ್ವ ಲಡಾಖ್ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದರೆ, ಮತ್ತೊಬ್ಬ ಲೇಹ್ನಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಇಬ್ಬರ ತಂದೆ ಹೆಸರೂ ಸುಖ್ದಿಯೋ ರೈ. ಹೀಗಾಗಿ, ಯಾವ ಸುನಿಲ್ ಮೃತಪಟ್ಟರು ಎಂದು ಸೇನೆಗೂ ಒಂದು ಹಂತದಲ್ಲಿ ಗೊಂದಲವಾಗಿದ್ದಿರಬಹುದು. ಲಡಾಖ್ನಲ್ಲಿ ಮೃತಪಟ್ಟ ಸುನಿಲ್ ರೈ ಕುಟುಂಬಕ್ಕೆ ಕರೆ ಮಾಡುವ ಬದಲು, ಲೇಹ್ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸುನಿಲ್ ಕುಟುಂಬಕ್ಕೆ ಕರೆ ಮಾಡಿದ್ದಾರೆ. ಬಿಹಾರದ ಸರನ್ ಜಿಲ್ಲಾಡಳಿತಕ್ಕೂ ಮಾಹಿತಿ ಕೊಟ್ಟಿದ್ಧಾರೆ. ಹೀಗಾಗಿ, ದೊಡ್ಡ ಗೊಂದಲವೇ ಸೃಷ್ಟಿಯಾಗಿಹೋಗಿತ್ತು. ಕೊನೆಗೆ ಗಂಡನ ಜೊತೆ ಮೊಬೈಲ್ನಲ್ಲಿ ಮಾತನಾಡಿದ ಹೆಂಡತಿ ಇದೀಗ ಸಮಾಧಾನವಾಗಿದ್ದಾರೆ. ಸುನಿಲ್ ರೈ ಅವರ ಹೆತ್ತವರು, ಸಂಬಂಧಿಕರೂ ಕೂಡಾ ನಿರಾಳರಾಗಿದ್ದಾರೆ.
from India & World News in Kannada | VK Polls https://ift.tt/2YJ3nje
