ಹೊಸದಿಲ್ಲಿ: ಟೆಸ್ಟ್ ಕ್ರಿಕೆಟ್‌ನಲ್ಲಿ ಹಿರಿಯ ಆಫ್‌ ಸ್ಪಿನ್ನರ್‌ ರವಿಚಂದ್ರನ್‌ ಅಶ್ವಿನ್‌ ಅವರಿಗಿಂತಲೂ ಆಸ್ಟ್ರೇಲಿಯಾದ ನಥಾನ್ ಲಿಯಾನ್ ಉತ್ತಮ ಎಂದು ಭಾರತ ತಂಡದ ಮಾಜಿ ಆಟಗಾರ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಲಿಯಾನ್ 96 ಪಂದ್ಯಗಳಿಂದ 390 ವಿಕೆಟ್‌ಗಳನ್ನು ಕಬಳಿಸಿದರೆ, ಅಶ್ವಿನ್‌ 71 ಪಂದ್ಯಗಳಿಂದ 365 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಅವರ ಅಂಕಿಅಂಶ ಆಸೀಸ್‌ ಸ್ಪಿನ್ನರ್‌ಗಿಂತಲೂ ಉತ್ತಮವಾಗಿದೆ. ಆದರೆ ಸ್ಪಿನ್ನರ್‌ಗಳಿಗೆ ಸಹಾಯಕವಲ್ಲದ ಪಿಚ್‌ಗಳಲ್ಲಿ ಬೌಲಿಂಗ್ ಮಾಡುವ ಸಾಮರ್ಥ್ಯವನ್ನು ಆಧರಿಸಿ ಆಕಾಶ್‌ ಚೋಪ್ರಾ ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಎದುರಾಳಿ ಬ್ಯಾಟ್ಸ್‌ಮನ್‌ಗಳನ್ನು ಕೆಡವಲು ಆಸ್ಟ್ರೇಲಿಯಾ ಸ್ಪಿನ್ನರ್‌ ಅನುಸರಿಸುವ ತಂತ್ರ ಅದ್ಭುತವಾಗಿದೆ. "ಕಳೆದ ಹಲವು ಪಂದ್ಯಗಳಲ್ಲಿ ತೋರಿರುವ ಪ್ರದರ್ಶನವನ್ನು ಆಧರಿಸಿ ನಥಾನ್ ಲಿಯಾನ್‌ಗೆ ಮೊರೆ ಹೋಗುತ್ತಿದ್ದೇನೆ. ಅವರ ಕೆಲ ಅಂಶಗಳು ನನಗೆ ತುಂಬಾ ಇಷ್ಟವಾಗಿದೆ. ಮೊದಲಿಗೆ ಅವರ ಬೌಲಿಂಗ್ ಆಕ್ಷನ್‌ ನನಗೆ ಇಷ್ಟ. ದೇಹದ ಹಿಂದೆಯಿಂದ ಚೆಂಡನ್ನು ಎಸೆಯುತ್ತಾರೆ. ಒಳ್ಳೆಯ ಬೌನ್ಸ್ ಅನ್ನು ಅವರು ಮಾಡಬಲ್ಲರು. ಸ್ಪಿನ್ನರ್‌ಗಳಿಗೆ ಸಹಕರಿಸಿದ ಪಿಚ್‌ಗಳಲ್ಲಿಯೂ ನಥಾನ್ ಅದ್ಭುತವಾಗಿ ಬೌಲಿಂಗ್ ಮಾಡುವ ಸಾಮರ್ಥ್ಯವನ್ನು ಮೈಗೂಡಿಸಿಕೊಂಡಿದ್ದಾರೆ," ಎಂದು ಅವರು ತಮ್ಮದೇ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಹೇಳಿದ್ದಾರೆ. "ಒಂದು ವೇಳೆ ಭಾರತದಲ್ಲಿ ಸ್ಪಿನ್‌ ಸ್ನೇಹಿ ಪಿಚ್‌ಗಳಲ್ಲಿ ಆರ್‌. ಅಶ್ವಿನ್‌ ಹಾಗೂ ನಥಾನ್ ಲಿಯಾನ್ ಬೌಲಿಂಗ್ ಮಾಡಿದ್ದೇ ಆದಲ್ಲಿ ಚೆನ್ನೈ ಸ್ಪಿನ್ನರ್‌ ಮೇಲುಗೈ ಸಾಧಿಸುತ್ತಾರೆ. ಅವರು ಬೇಗ ವಿಕೆಟ್‌ಗಳನ್ನು ತೆಗೆದುಕೊಳ್ಳುತ್ತಾರೆ ಹಾಗೂ ಯಾವುದೇ ಎದುರಾಳಿ ತಂಡಗಳಾದರೂ ಸ್ಥಿರವಾಗಿ ವಿಕೆಟ್‌ಗಳನ್ನು ಪಡೆಯಬಲ್ಲ ಸಾಮರ್ಥ್ಯ ಅವರಲ್ಲಿದೆ," ಎಂದು ಚೋಪ್ರಾ ಹೇಳಿದರು. ಆಸ್ಟ್ರೇಲಿಯಾದಲ್ಲಿ ಅಥವಾ ಇನ್ನಿತರ ದೇಶಗಳಲ್ಲಿ ಬಳಸುವ ಕುಕಾಬುರಾ ಚೆಂಡಿನ ಬಗ್ಗೆ ನಥಾನ್‌ಗೆ ಉತ್ತಮ ಜ್ಞಾನವಿದೆ. ಫ್ಲ್ಯಾಟ್‌ ಪಿಚ್ ಅಥವಾ ವೇಗಿಗಳಿಗೆ ಸಹಾಯ ಮಾಡುವಂತಿದ್ದರೂ, ಆಫ್‌ ಸ್ಪಿನ್‌ ಮೂಲಕ ಲಿಯಾನ್ ವಿಕೆಟ್‌ಗಳನ್ನು ತೆಗೆಯಬಲ್ಲರು ಎಂಬುದನ್ನು ಭಾರತ ತಂಡದ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ನ ಒಮ್ಮತ. "ನಥಾನ್ ಲಿಯಾನ್ ಆಸ್ಟ್ರೇಲಿಯಾ ಅಲ್ಲದೆ, ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್‌ ಪಿಚ್‌ಗಳಲ್ಲಿಯೂ ಪ್ರಾಬಲ್ಯ ಸಾಧಿಸಬಲ್ಲರು. ದೇಹದ ಹಿಂದೆಯಿಂದ ಹೇಗೆ ಬೌಲಿಂಗ್ ಮಾಡಬೇಕೆಂದು ಗೊತ್ತಿರುವ ಅವರಿಗೆ ಕುಕಾಬುರಾ ಚೆಂಡಿನ ನಿರ್ವಹಣೆ ಬಗ್ಗೆ ಅತ್ಯುತ್ತಮ ಜ್ಞಾನವನ್ನು ಹೊಂದಿದ್ದಾರೆ," ಎಂದು ಆಕಾಶ್‌ ಚೋಪ್ರಾ ತಿಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Ackyl6
