ಹೊಸದಿಲ್ಲಿ: ಭಾರತ ತಂಡದ ವೇಗಿ ಏಕದಿನ ಹಾಗೂ ಟಿ20 ಕ್ರಿಕೆಟ್‌ನ ಮೊದಲನೇ ಓವರ್‌ನಲ್ಲಿಯೇ ವಿಕೆಟ್‌ ಪಡೆಯುವ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು. ಉತ್ತರ ಪ್ರದೇಶ ಮೂಲದ ವೇಗಿ ತಮ್ಮ ವೃತ್ತಿ ಜೀವನದಲ್ಲಿ ಪರಿಪೂರ್ಣವಾಗಿ ಯಶಸ್ವಿ ಸಾಧಿಸಲಿಲ್ಲ. ಅಗತ್ಯವಿದ್ದಾಗ ಮಾತ್ರ ತಂಡದಲ್ಲಿ ತಮ್ಮ ಪ್ರಾಬಲ್ಯ ಸಾಧಿಸುತ್ತಿದ್ದರು. ಮಾಜಿ ಕ್ರಿಕೆಟಿಗ ದಾಸ್‌ ಗುಪ್ತಾ ಅವರೊಂದಿಗೆ ಮಾತನಾಡಿದ ಭುವನೇಶ್ವರ್ ಕುಮಾರ್‌ ತಮ್ಮ ವೃತ್ತಿ ಜೀವನದ ಹಲವು ವಿಷಯಗಳನ್ನು ಬಹಿರಂಗಪಡಿಸಿದ್ದಾರೆ. ಪ್ರಸ್ತುತ ಭುವನೇಶ್ವರ್ ಕುಮಾರ್‌ ಗಾಯದಿಂದಾಗಿ ಸಾಕಷ್ಟು ತತ್ತರಿಸಿದ್ದಾರೆ ಹಾಗೂ ಲಯಕ್ಕೆ ಹಿಂತಿರುಗುವುದು ಅವರಿಗೆ ಸದ್ಯ ದೊಡ್ಡ ಸವಾಲಾಗಿದೆ. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ವೆಸ್ಟ್ ಇಂಡೀಸ್‌ ವಿರುದ್ಧ ಕೊನೆಯ ಟಿ20 ಪಂದ್ಯದಲ್ಲಿ ಅವರು ಕಾಣಿಸಿಕೊಂಡಿದ್ದರು. ಇದಕ್ಕೂ ಮುನ್ನ ಇಂಗ್ಲೆಂಡ್‌ನಲ್ಲಿ ನಡೆದಿದ್ದ ಐಸಿಸಿ ಏಕದಿನ ವಿಶ್ವಕಪ್‌ ಟೂರ್ನಿಯಲ್ಲಿಯೂ ಗಾಯದಿಂದಾಗಿ ಹಲವು ಪಂದ್ಯಗಳಿಂದ ಹೊರಗುಳಿದಿದ್ದರು. ಆದಾಗ್ಯೂ, ಅವರು 21 ಟೆಸ್ಟ್, 114 ಓಡಿಐ ಹಾಗೂ 43 ಟಿ20 ಪಂದ್ಯಗಳಾಡಿದ್ದಾರೆ. ಪಂದ್ಯದಲ್ಲಿ ಎಷ್ಟೇ ಒತ್ತಡವಿದ್ದರೂ ಮಾಜಿ ನಾಯಕ ಮಹೇಂದ್ರ ಸಿಂಗ್‌ ಧೋನಿಗೆ ಯಾವುದಕ್ಕೂ ತಲೆ ಕೆಡಿಸಿಕೊಳ್ಳುತ್ತಿರಲಿಲ್ಲ. ಎಲ್ಲವನ್ನೂ ತಾಳ್ಮೆ ಮತ್ತು ಶಾಂತಚಿತ್ತ ಮನೋಭಾವದಿಂದ ನಿರ್ವಹಿಸುತ್ತಿದ್ದರು. ಪಂದ್ಯದಲ್ಲಿ ತಂಡಕ್ಕೆ ಹಿನ್ನಡೆಯಿದ್ದರೂ, ಧೋನಿ ಮುಖದಲ್ಲಿಯೂ ಯಾವುದೇ ಒತ್ತಡ ಇರುವುದು ಕಂಡುಬರುತ್ತಿರಲಿಲ್ಲ. ಶಾಂತತೆಯಿಂದಲೇ ಪಂದ್ಯವನ್ನು ಮುಗಿಸುತ್ತಿದ್ದರು. ಈ ಬಗ್ಗೆ ಮಾತನಾಡಿದ ದಾಸ್‌ ಗುಪ್ತಾ, ಡೆತ್ ಓವರ್‌ಗಳಲ್ಲಿ ಅವರ ಮನಸ್ಸಲ್ಲಿ ಏನೂ ನಡೆಯುತ್ತಿರುತ್ತದೆ ಎಂದು ಭುವಿಗೆ ಪ್ರಶ್ನೆ ಕೇಳಿದರು. "ಮಹೇಂದ್ರ ಸಿಂಗ್‌ ಧೋನಿ ಪಂದ್ಯದಲ್ಲಿ ಮ್ಯಾಚ್‌ ಫಿನಿಷರ್‌ ಆಗಿ ಆಡುವ ರೀತಿಯಲ್ಲೇ , ನಾನು ಬೌಲಿಂಗ್‌ ಮಾಡಲು ಪ್ರಯತ್ನಿಸುತ್ತೇನೆ. ಇದೇ ರೀತಿ ಆಡಲು ಎಲ್ಲಾ ಆಟಗಾರರು ಬಯಸುತ್ತಾರೆ. ಪಂದ್ಯದ ಫಲಿತಾಂಶ ಸೋಲಾಗಬಹುದು ಅಥವಾ ಗೆಲುವು ಸಾಧಿಸಬಹುದು; ಒಬ್ಬ ಆಟಗಾರ ಪಂದ್ಯದಲ್ಲಿ ಭಾಗಿಯಾಗಿದ್ದ ಆತ ಶೇ.100 ರಷ್ಟು ಪ್ರಯತ್ನ ನಡೆಸುವುದು ಆತನ ಕರ್ತವ್ಯ. ಹಾಗಾಗಿ, ಪಂದ್ಯದಲ್ಲಿ ಆಡುತ್ತಿರುವಾಗ ಗೆಲುವು ಸೋಲನ್ನು ನೋಡಬಾರದು, ಇದು ಧೋನಿಯ ನಿಲುವು," ಎಂದರು. "ಪಂದ್ಯದ ಪ್ರಕ್ರಿಯೆಯಲ್ಲಿ ಸಾಧ್ಯವಾದಷ್ಟು ತೊಡಗಿಸಿಕೊಳ್ಳಲು ಪ್ರಯತ್ನಿಸುತ್ತೇನೆ. ಐಪಿಎಲ್‌ನ ಒಂದು ಅಥವಾ ಎರಡು ಆವೃತ್ತಿಗಳಲ್ಲಿಯೂ ಇದೇ ರೀತಿ ಅನುಸರಿಸಿದ್ದೆ. ಪಂದ್ಯದ ಪ್ರಕ್ರಿಯೆಯಲ್ಲಿ ತನ್ನನ್ನು ತಾನು ತೊಡಗಿಸಿಕೊಳ್ಳುತ್ತಿದ್ದೆ. ಆದರೆ, ಪಂದ್ಯದ ಫಲಿತಾಂಶಕ್ಕೆ ಎರಡನೇ ಪ್ರಾಶಸ್ತ್ಯ ನೀಡಲಾಗಿತ್ತು. ಅದರಂತೆ ಒಟ್ಟಾರೆ ಫಲಿತಾಂಶ ಧನಾತ್ಮಕವಾಗಿ ಬರುತ್ತಿತ್ತು. ಎಂ.ಎಸ್‌ ಧೋನಿಯ ಈ ತಂತ್ರವನ್ನು ಅಳವಡಿಸಿಕೊಂಡಿದ್ದರಿಂದ ಬೌಲಿಂಗ್‌ನಲ್ಲಿ ಯಶಸ್ವಿಯಾಗಲು ಸಾಧ್ಯವಾಯಿತು," ಎಂದು ಭುವನೇಶ್ವರ್ ಕುಮಾರ್‌ ತಿಳಿಸಿದರು. 2013ರ ಐಪಿಎಲ್‌ ಪಂದ್ಯದಲ್ಲಿ ರಾಯಲ್‌ ಚಾಲೆಂಜರ್ಸ್‌ನ ಕ್ರಿಸ್‌ ಗೇಲ್‌ ಕೇವಲ 66 ಎಸೆತಗಳಲ್ಲಿ 175 ರನ್‌ ಚಚ್ಚಿದ್ದರು. ಈ ವೇಳೆ ಪುಣೆ ವಾರಿಯರ್ಸ್‌ನ ಎಲ್ಲಾ ಬೌಲರ್‌ಗಳು ದುಬಾರಿಯಾಗಿದ್ದರು. ಆದರೆ, ಭುವನೇಶ್ವರ್ ಕುಮಾರ್‌ 4 ಓವರ್‌ಗಳಿಗೆ ಕೇವಲ 23 ರನ್‌ಗಳಿಗೆ ನೀಡಿ ಗಮನ ಸೆಳೆದಿದ್ದರು. ಭುವಿ ಬೌಲಿಂಗ್‌ನಲ್ಲಿದ್ದ ಸ್ವಿಂಗ್‌ಗೆ ಗೇಲ್‌ ಆರ್ಭಟಿಸಲು ಸಾಧ್ಯವಾಗಿರಲಿಲ್ಲ. ಈ ಪಂದ್ಯದ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಭುವಿ, "ಕಳೆದ ಹಲವು ಆವೃತ್ತಿಗಳಲ್ಲಿ ಕ್ರಿಸ್‌ ಗೇಲ್‌ ಸ್ವಿಂಗ್‌ ಬೌಲಿಂಗ್‌ನಲ್ಲಿ ಹೆಣಗಾಡಿದ್ದನ್ನು ನೋಡಿದ್ದೆ. ಅದೇ ತಂತ್ರವನ್ನು ಅಂದು ಅವರ ಮೇಲೆ ಪ್ರಯೋಗ ಮಾಡಿದ್ದೆ. ನಮ್ಮ ಬೌಲರ್‌ಗಳು ದುಬಾರಿಯಾಗಿದ್ದರು. ಆ ಸನ್ನಿವೇಶವನ್ನು ನಾನು ಅರ್ಥಮಾಡಿಕೊಂಡು ಕ್ರಿಸ್‌ ಗೇಲ್‌ಗೆ ಆಡಿಸಿಕೊಂಡಿದ್ದೆ. ಆ ಪಂದ್ಯ, ಐಪಿಎಲ್‌ನಲ್ಲಿಯೇ ವಿಭಿನ್ನವಾಗಿಯೇ ಉಳಿಯಿತು," ಎಂದು ಭುವನೇಶ್ವರ್ ಕುಮಾರ್‌ ವಿವರಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Vky4KN
