ಬೆಂಗಳೂರು: ವಸ್ತುಗಳನ್ನು ಬಹಿಷ್ಕರಿಸುವ ಕುರಿತು ವ್ಯಾಪಕ ಚರ್ಚೆ, ಆಂದೋಲನ ನಡೆಯುತ್ತಿರುವ ನಡುವೆ 4 ಕೋಟಿ ರೂ. ಮೌಲ್ಯದ ಅಕ್ರಮ 'ಮೇಡ್ ಇನ್ ಚೀನಾ' ಎಲೆಕ್ಟ್ರಾನಿಕ್ಸ್ ಮತ್ತು ಎಫ್ಎಂಸಿಜಿ ವಸ್ತುಗಳನ್ನು ಅಧಿಕಾರಿಗಳು ಎಚ್ಎಎಲ್ ವಿಮಾನ ನಿಲ್ದಾಣ ರಸ್ತೆಯಲ್ಲಿ ಪತ್ತೆ ಮಾಡಿದ್ದಾರೆ. ಕೊರೊನಾ ಸೋಂಕು ಮೊದಲು ಕಾಣಿಸಿಕೊಂಡಿದೆ ಎನ್ನಲಾದ ಚೀನಾದ ವುಹಾನ್ ನಗರದ ವ್ಯಕ್ತಿಯೊಬ್ಬ ಗೋದಾಮನ್ನು ಬೆಂಗಳೂರಿನಲ್ಲಿ ಲೀಸ್ಗೆ ಪಡೆದು ಸರಕು ಸಂಗ್ರಹಿಸಿದ್ದ. ಅವುಗಳನ್ನು ಆನ್ಲೈನ್ ಮತ್ತು ನೇರ ಮಾರಾಟಕ್ಕಾಗಿ ಸುಮಾರು 59 ಮಾರಾಟ ಕಂಪನಿಗಳ ಹೆಸರಿನಲ್ಲಿ ಜಿಎಸ್ಟಿ ನೋಂದಣಿ ಮಾಡಿಸಿದ್ದ. ಅಧಿಕಾರಿಗಳ ದಾಳಿ ವೇಳೆ ಚೀನಾದ ಪ್ರಜೆಯಾಗಲಿ, ವಹಿವಾಟು ನಡೆಸಲು ನೋಂದಣಿ ಮಾಡಿಸಿದ್ದ 59 ಕಂಪನಿಗಳ ಮಾಲೀಕರು, ನಿರ್ದೇಶಕರು ಯಾರೂ ಪತ್ತೆಯಾಗಿಲ್ಲ. ಈ ಹಿನ್ನೆಲೆಯಲ್ಲಿ ಗೋದಾಮನ್ನು ತೆರಿಗೆ ಅಧಿಕಾರಿಗಳು ಸೀಲ್ಡೌನ್ ಮಾಡಿದ್ದಾರೆ. ದಾಳಿ ವೇಳೆ 25,446 ಎಲೆಕ್ಟ್ರಾನಿಕ್ಸ್ ಮತ್ತು ಎಫ್ಎಂಸಿಜಿ ವಸ್ತುಗಳು ಪತ್ತೆಯಾಗಿವೆ. ಚೀನಾ ಪ್ರಜೆಯಿಂದ ನಿರ್ವಹಣೆ: ವಹಿವಾಟು ನಡೆಸಲು 2017-18ರಲ್ಲಿ ಮೊದಲ ನೋಂದಣಿ ಮಾಡಲಾಗಿದೆ. 2018-19ರಲ್ಲಿ 43 ಮತ್ತು 2019-20ರಲ್ಲಿ 14 ಹಾಗೂ 2020-21ರಲ್ಲಿ 2 ಕಂಪನಿಗಳು ನೋಂದಣಿಯಾಗಿವೆ. ಬಹುತೇಕ ಪ್ರೈವೇಟ್ ಲಿಮಿಟೆಡ್ ಕಂಪನಿಗಳಾಗಿದ್ದು, 24 ಜನರು ನಿರ್ದೇಶಕರಿದ್ದಾರೆ. 2020ರ ಜನವರಿಯಿಂದ ಗೋದಾಮು ಮತ್ತು ಅದರಲ್ಲಿನ ವಸ್ತುಗಳ ನಿರ್ವಹಣೆಯನ್ನು ಬೆಂಗಳೂರಿನಲ್ಲಿರುವ ಏಜೆಂಟರು ಮತ್ತು ಉದ್ಯೋಗಿಗಳ ಮೂಲಕ ನಿರ್ವಹಿಸಲಾಗುತ್ತಿದೆ. ಇ- ಕಾಮರ್ಸ್ನಲ್ಲಿ ಸರಕುಗಳ ಕುರಿತು ಉತ್ತಮ ರೇಟಿಂಗ್ ಬರಲು ಹಲವು ನಕಲಿ ಹೆಸರಿನ ನೋಂದಣಿ ಮಾಡಿಸಿರುವ ಸಾಧ್ಯತೆ ಇದೆ. 59 ಜಿಎಸ್ಟಿ ನೋಂದಣಿ, ವಹಿವಾಟಿನ ಅಧಿಕೃತತೆ ಕುರಿತು ತನಿಖೆ ನಡೆಯುತ್ತಿದೆ ಎಂದು ತೆರಿಗೆ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3i1e1e1