ಏಷ್ಯಾದ ಅತಿ ದೊಡ್ಡ ಸ್ಲಂ ಎಂದೇ ಹೆಸರಾಗಿರುವ ಮುಂಬಯಿ ವಾಣಿಜ್ಯ ನಗರಿಯ ಧಾರಾವಿಯ 2.1 ಚದರ ಕಿಲೋಮೀಟರ್‌ ವ್ಯಾಪ್ತಿಯ ಕೊಳೆಗೇರಿಯಲ್ಲಿ ಸುಮಾರು 10 ಲಕ್ಷ ಮಂದಿ ವಾಸಿಸುತ್ತಾರೆ. ಇಲ್ಲಿನ ಅತಿ ಕೆಟ್ಟ ಜೀವನಮಟ್ಟ, ಇಕ್ಕಟ್ಟಾದ ಮನೆಗಳು, ಗುಡಿಸಲುಗಳು, ಸದಾ ಅಪೌಷ್ಟಿಕತೆ ಹಾಗೂ ಆರೋಗ್ಯಸೇವೆಯಿಲ್ಲದ ಸನ್ನಿವೇಶಗಳಿಂದಾಗಿ ಇಲ್ಲಿಯಾವುದೇ ಸೋಂಕು ಅತಿ ಶೀಘ್ರವಾಗಿ ಹರಡಬಲ್ಲುದು. 1896ರಲ್ಲಿಇಲ್ಲಿ ಹರಡಿದ ಪ್ಲೇಗ್‌, ಇಡೀ ಮುಂಬಯಿಯ ಅರ್ಧ ಜನಸಂಖ್ಯೆಯನ್ನು ಬಲಿ ಪಡೆದಿತ್ತು. 'ಸ್ಲಂಡಾಗ್‌ ಮಿಲಿಯನೇರ್‌' ಹಾಲಿವುಡ್‌ ಚಲನಚಿತ್ರದಿಂದಾಗಿ ಈ ಕೊಳೆಗೇರಿ ದೇಶದಾಚೆ ಇನ್ನಷ್ಟು ಕುಖ್ಯಾತಿ ಪಡೆದಿತ್ತು. ಮಹಾರಾಷ್ಟ್ರ ಹಾಗೂ ಮುಂಬಯಿಯ ಇತರ ಕಡೆಗಳಲ್ಲಿ ಕೊರೊನಾ ವೈರಸ್‌ ನಿಯಂತ್ರಣ ತಪ್ಪಿ ಹರಡುತ್ತಿದ್ದರೂ, ಧಾರಾವಿಯಲ್ಲಿಮಾತ್ರ ಅದನ್ನು ಅಚ್ಚರಿ ಎಂಬಂತೆ ನಿಯಂತ್ರಣದಲ್ಲಿಇಡಲಾಗಿದೆ.ಏಪ್ರಿನಲ್ಲಿ ಮೊದಲ ಸೋಂಕು: ಏಪ್ರಿಲ್‌ 1ರಂದು ಧಾರಾವಿಯ ಸ್ಲಂನಲ್ಲಿ ಮೊದಲ ಕೋವಿಡ್ 19 ಸೋಂಕು ಪತ್ತೆಯಾಗಿತ್ತು. ಇಕ್ಕಟ್ಟಾದ ನಿವಾಸಗಳ ಈ ಕೊಳೆಗೇರಿಯಲ್ಲಿ ಸಾಮಾಜಿಕ ಅಂತರ ಕಾಪಾಡಲು ಸಾಧ್ಯವಾಗದ ಸನ್ನಿವೇಶದಲ್ಲಿ, ಇದನ್ನು ತಡೆಯುವುದು ಅಸಾಧ್ಯ ಹಾಗೂ ಇದು ದೇಶದ ಕೋವಿಡ್ ಹಾಟ್‌ಸ್ಪಾಟ್‌ ಆಗಲಿದೆ ಎಂದೇ ಎಲ್ಲರೂ ಭಾವಿಸಿದ್ದರು. ಏಪ್ರಿಲ್‌ನಲ್ಲಿ ಕೋವಿಡ್ ಕೊಳೆಗೇರಿಯ 491 ಮಂದಿಗೆ ಹರಡಿತು. ಮೇ ತಿಂಗಳಲ್ಲಿ1216 ಮಂದಿಗೆ ಹಬ್ಬಿತು. ಅಚ್ಚರಿ ಎಂಬಂತೆ, ಜೂನ್‌ನಲ್ಲಿ ಇದುವರೆಗೆ 274 ಪ್ರಕರಣಗಳು ಮತ್ತು 6 ಮರಣಗಳು ಮಾತ್ರ ವರದಿಯಾಗಿವೆ. ಇದುವರೆಗೆ ಇಲ್ಲಿಒಟ್ಟು ಸೋಂಕಿತರು 2189 ಹಾಗೂ 80 ಸಾವುಗಳು ಆಗಿವೆ. ಆದರೆ ಸೋಂಕು ಹಾಗೂ ಮರಣದ ಪ್ರಮಾಣ ಇಳಿಯುತ್ತ ಬಂದಿದೆ. ಸೋಂಕುಗಳು ದುಪ್ಪಟ್ಟಾಗುವ ಅವಧಿ ಹೆಚ್ಚಾಗಿದೆ. ಮೇ ತಿಂಗಳಲ್ಲಿ ಒಂದು ದಿನ ಅತಿ ಹೆಚ್ಚು (43) ಸೋಂಕು ವರದಿಯಾಗಿದ್ದರೆ, ಜೂನ್‌ ಮೂರನೇ ವಾರದಲ್ಲಿಅತಿ ಕಡಿಮೆ (5) ಸೋಂಕು ವರದಿಯಾಗಿದೆ. ಏಪ್ರಿಲ್‌ ತಿಂಗಳಲ್ಲಿ ಸೋಂಕು ದುಪ್ಪಟ್ಟಾಗುವ ಅವಧಿ 18 ದಿನಗಳಿದ್ದರೆ, ಮೇ ತಿಂಗಳಲ್ಲಿ ಅದು 43 ದಿನಗಳಿಗೆ ಹಾಗೂ ಜೂನ್‌ನಲ್ಲಿ78ಕ್ಕೆ ಏರಿದೆ.ಧಾರಾವಿಯಲ್ಲಿ ಸೋಂಕು ತಡೆದ ಕ್ರಮವನ್ನು ಬೃಹನ್ಮುಂಬಯಿ ಮಹಾನಗರಪಾಲಿಕೆಯ ಯಶಸ್ಸೆಂದೇ ಹೇಳಲಾಗುತ್ತಿದೆ. ಇದಕ್ಕೆ ಕಾರಣ ಪಾಲಿಕೆ ಅನುಸರಿಸಿದ ನಾಲ್ಕು 'ಟಿ'ಗಳು- ಟ್ರೇಸಿಂಗ್‌, ಟ್ರ್ಯಾಕಿಂಗ್‌, ಟೆಸ್ಟಿಂಗ್‌ ಮತ್ತು ಟ್ರೀಟಿಂಗ್‌. ಮನೆ ಮನೆಯನ್ನೂ ಸೋಂಕಿತರು ಹಾಗೂ ಶಂಕಿತ ಸೋಂಕಿತರಿಗಾಗಿ ತಲಾಶ್‌ ಮಾಡಲಾಗುತ್ತಿದೆ. ಮನೆ ಮನೆ ತಲಾಶ್‌ ಮೂಲಕ ವೈದ್ಯರು ಇದುವರೆಗೂ 47,500 ಮಂದಿಯನ್ನು ತಲುಪಿದ್ದಾರೆ. ಸಂಚಾರಿ ವ್ಯಾನ್‌ಗಳ ಮೂಲಕ 14,970 ಮಂದಿಯನ್ನು ಪರೀಕ್ಷಿಸಲಾಗಿದೆ. ಬಿಎಂಸಿ ಆರೋಗ್ಯ ಸೇವಾ ಕಾರ್ಯಕರ್ತರು 4.76 ಲಕ್ಷ ಮಂದಿಯನ್ನು ಸಂಪರ್ಕಿಸಿದ್ದಾರೆ. ಧಾರಾವಿಯಲ್ಲಿಅಲ್ಲಲಿ ಸ್ಥಾಪಿಸಲಾಗಿರುವ ಫಿವರ್‌ ಕ್ಲಿನಿಕ್‌ಗಳು, 3.6 ಲಕ್ಷ ಮಂದಿಯನ್ನು ಸ್ಕ್ರೀನ್‌ ಮಾಡಿವೆ.ರಿಸ್ಕ್‌ನಲ್ಲಿರುವ 8,246 ಹಿರಿಯ ನಾಗರಿಕರನ್ನು ಗುರುತಿಸಲಾಗಿದ್ದು, ಅವರನ್ನು ಪ್ರತ್ಯೇಕಿಸಲಾಗಿದೆ. ಹೀಗೆ ಒಟ್ಟು 5.48 ಲಕ್ಷ ಮಂದಿಯನ್ನು ಪರಿಶೀಲನೆಗೆ ಒಳಪಡಿಸಲಾಗಿದೆ. ಸುಸಜ್ಜಿತವಾದ ಕೋವಿಡ್ ಕೇರ್‌ ಸೆಂಟರ್‌ಗಳು ಹಾಗೂ ಕ್ವಾರಂಟೈನ್‌ ಕೇಂದ್ರಗಳನ್ನು ರೂಪಿಸಲಾಗಿದ್ದು, ಶಂಕಿತರನ್ನು ಅಲ್ಲಿಗೆ ಸ್ಥಳಾಂತರಿಸಲಾಗಿದೆ. ದೊಡ್ಡ ಸಂಖ್ಯೆಯ (2450) ಆರೋಗ್ಯ ಕಾರ್ಯಕರ್ತರನ್ನು ಧಾರಾವಿ ಪ್ರದೇಶವೊಂದಕ್ಕೇ ನಿಯೋಜಿಸಲಾಗಿದೆ.
ಏಪ್ರಿಲ್‌ 18
ಮೇ 43
ಜೂನ್‌ 78
ಸೋಂಕಿನ ಸಂಖ್ಯೆ
ಏಪ್ರಿಲ್‌ 491
ಮೇ 1216
ಜೂನ್‌ 274
ಧಾರಾವಿಯ ಹೆಚ್ಚಿನ ಜನಸಂಖ್ಯೆ ಯುವಜನ. ಸೋಂಕಿತರು 21ರಿಂದ 50ರ ವಯಸ್ಸಿನವರಾಗಿರುವುದು ಕಂಡುಬಂದಿದೆ. ಹೀಗಾಗಿ ಮೃತ್ಯುಗಳ ಸಂಖ್ಯೆ ಹೆಚ್ಚಾಗಿಲ್ಲ. ಧಾರಾವಿಯ ಒಟ್ಟು ಜನಸಾಂದ್ರತೆಗೆ ಹೋಲಿಸಿದರೆ 80 ಸಾವುಗಳು ನಿಯಂತ್ರಿತವೇ. ಆದರೆ, ಸಾಮಾಜಿಕ ಅಂತರದ ಪ್ರಸಕ್ತಿಯೇ ಇಲ್ಲಿಇಲ್ಲದ ಕಾರಣ, ಸೋಂಕು ಬಹು ಮಂದಿಗೆ ಹಬ್ಬಿರಬಹುದು ಹಾಗೂ ಹೆಚ್ಚಿನವರು ಅದಕ್ಕೆ ಪ್ರತಿರೋಧ ಶಕ್ತಿ ಬೆಳೆಸಿಕೊಂಡಿರಬಹುದು; ಅಥವಾ ಹೆಚ್ಚಿನವರು ಲಕ್ಷಣಗಳಿಲ್ಲದ (ಅಸಿಂಪ್ಟಮ್ಯಾಟಿಕ್‌) ಸೋಂಕಿತರಾಗಿರಲೂಬಹುದು ಎಂದೂ ತರ್ಕಿಸಲಾಗಿದೆ.
ಧಾರಾವಿಯಲ್ಲಿ ವಾಸಿಸುತ್ತಿರುವ ಹೆಚ್ಚಿನವರು ವಲಸೆ ಕಾರ್ಮಿಕರು ಹಾಗೂ ದಿನಗೂಲಿಯವರು. ಲಾಕ್‌ಡೌನ್‌ ಸಂದರ್ಭದಿಂದ ಕೆಲಸ ಕಳೆದುಕೊಂಡಿರುವ ಎಲ್ಲರಿಗೂ ಉಚಿತ ಊಟ ನೀಡಲಾಗುತ್ತಿದೆ. ಸುಮಾರು 1 ಲಕ್ಷ ಮಂದಿ ವಲಸೆ ಕಾರ್ಮಿಕರು ಸ್ಲಂ ತೊರೆದು ಬೇರೆಡೆ ಹೋಗಿದ್ದಾರೆ.
from India & World News in Kannada | VK Polls https://ift.tt/31n9E72
