ಹೊಸದಿಲ್ಲಿ: ಕಳೆದ ಜೂನ್‌ 18ಕ್ಕೆ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದು ಮೂರು ವರ್ಷಗಳು ಕಳೆಯಿತು. ಅಂದು ಫೈನಲ್ ಹಣಾಹಣಿಯಲ್ಲಿ ಭಾರತವನ್ನು ಸೋಲಿಸಿದ್ದ ಪಾಕಿಸ್ತಾನ, ಆಡಿದ್ದ ಎಲ್ಲಾ ಪಂದ್ಯಗಳಲ್ಲಿ ಜಯಬೇರಿ ಸಾಧಿಸಿತ್ತು. ಫಖಾರ್ ಜಮಾನ್‌ ಗಳಿಸಿದ ಶತಕದ ಬಲದಿಂದ ಪಾಕಿಸ್ತಾನ 338 ರನ್ ಗಳಿಸಲು ಸಾಧ್ಯವಾಗಿತ್ತು. ಅದೇ ರಿತಿ ಪಾಕ್‌ ಬೌಲರ್‌ಗಳನ್ನು ಭಾರತವನ್ನು 158 ರನ್‌ಗಳಿಗೆ ಆಲೌಟ್‌ ಮಾಡಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿತ್ತು. ಭಾರತ ಹಾಗೂ ಪಾಕಿಸ್ತಾನ ನಡವಿನ ಫೈನಲ್ ಕಾದಾಟ ಅತ್ಯಂತ ಕಠಿಣವಾಗಿತ್ತು. ಮೊದಲು ಬ್ಯಾಟಿಂಗ್‌ ಮಾಡಿದ್ದ ಪಾಕಿಸ್ತಾನದ ಪರ ಫಖಾರ್ ಜಮಾನ್‌ ಅವರು ಬಹುಬೇಗ ಅವರಿಗೆ ವಿಕೆಟ್‌ ಒಪ್ಪಿಸಿದ್ದರು. ಆದರೆ, ಭಾರತದ ಬೌಲರ್‌ನ ಆ ಎಸೆತ ನೋಬಾಲ್‌ ಆಗಿತ್ತು. ಆಗ ಪಾಕ್‌ ಬ್ಯಾಟ್ಸ್‌ಮನ್‌ ವೈಯಕ್ತಿಕ ಎರಡಂಕಿ ಕೂಡ ದಾಖಲಿಸಿರಲಿಲ್ಲ. ನಂತರ, ಎಚ್ಚೆತ್ತುಕೊಂಡ ಜಮಾನ್‌ 106 ಎಸೆತಗಳಲ್ಲಿ 114 ರನ್ ಗಳಿಸಿದರು. ಇದು ಪಂದ್ಯದ ಫಲಿತಾಂಶದ ಮೇಲೆ ಗಂಭೀರ ಪರಿಣಾಮ ಬೀರಿತ್ತು ಎಂಬುದು ವೇಗಿ ಭುವನೇಶ್ವರ್ ಕುಮಾರ್‌ ಅಭಿಪ್ರಾಯ. ಅಂದು ಅತ್ಯುತ್ತಮವಾಗಿ ಇನಿಂಗ್ಸ್‌ ಆರಂಭಿಸಿದ್ದ ಪಾಕಿಸ್ತಾನ ಮತ್ತೇ ಯಾವುದೇ ಹಂತದಲ್ಲೂ ಹಿಂದೆ ತಿರುಗಿ ನೋಡಲೇ ಇಲ್ಲ. ಇಎಸ್‌ಪಿಎನ್‌ಕ್ರಿಕ್‌ಇನ್ಫೋ ಜತೆ ಮಾತನಾಡುತ್ತಾ ಮೂರು ವರ್ಷದ ಘಟನೆಯನ್ನು ಸ್ಮರಿಸಿದ ಭುವನೇಶ್ವರ್ ಕುಮಾರ್‌, "2017ರ ಫೈನಲ್ ಪಂದ್ಯದಲ್ಲಿ ಜಸ್ಪ್ರಿತ್‌ ಬುಮ್ರಾ ನೋ ಬಾಲ್‌ ಹಾಕಿದ ಬಳಿಕ ಎಲ್ಲವೂ ಬದಲಾಯಿತು. ಇದು ಒಂದು ಸೈಡ್‌ ಪಂದ್ಯವಾಗಿರಲಿಲ್ಲ ಅಥವಾ ಕಠಿಣ ಹೋರಾಟ ನಡೆಸದೇ ನಾವು ಸೋಲು ಅನುಭವಿಸಿದೆವು ಎಂದಲ್ಲ. ಆದರೆ, ಅನಿರೀಕ್ಷಿತವಾಗಿ ನಡೆದ ಘಟನೆಯಿಂದ ನಾವು ಅಂದು ಸೋಲಬೇಕಾಯಿತು," ಎಂದು ಹೇಳಿದರು. "ಆದಾಗ್ಯೂ, 2017 ರ ಚಾಂಪಿಯನ್ಸ್ ಟ್ರೋಫಿ ಫೈನಲ್ ಏಕಪಕ್ಷೀಯ ಸೋಲಾಗಿದೆ. ಅಲ್ಲಿ ಅವರು ನಮ್ಮನ್ನು ಮೀರಿಸಿದ್ದರು. ಆದರೆ, ಪಂದ್ಯದ ಸೋಲಿನ ಬಗ್ಗೆ ನಿಖರವಾದ ಕಾರಣ ಗುರುತಿಸುವುದು ಕಷ್ಟ," ಎಂದು ಭುವನೇಶ್ವರ್ ಕುಮಾರ್‌ ಅಭಿಪ್ರಾಯಪಟ್ಟರು. ಭಾರತ ತಂಡ ಕೊನೆಯ ಬಾರಿ 2013ರಲ್ಲಿ ಮಹೇಂದ್ರ ಸಿಂಗ್‌ ಧೋನಿ ನಾಯಕತ್ವದಲ್ಲಿ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದಿತ್ತು. ಅಂದು ಇಂಗ್ಲೆಂಡ್‌ ತಂಡವನ್ನು ಮಣಿಸಿ ಪ್ರಶಸ್ತಿ ಮುಡುಗೇರಿಸಿಕೊಂಡಿತ್ತು. ಅದಾದ ಬಳಿಕ ಭಾರತ, ಐಸಿಸಿ ಸಹಯೋಗದ ಟೂರ್ನಿಗಳಲ್ಲಿ ಸೆಮಿಫೈನಲ್ ಹಾಗೂ ಫೈನಲ್ ಹಣಾಹಣಿಗಳಲ್ಲಿ ವಿಫಲವಾಗುತ್ತಿದೆ. ಕಳೆದ ವರ್ಷ ವಿಶ್ವಕಪ್‌ ಟೂರ್ನಿಯಲ್ಲೂ ಭಾರತಕ್ಕೆ ಅದೃಷ್ಠವಿರಲಿಲ್ಲ ಎಂಬುದನ್ನೂ ಭುವನೇಶ್ವರ್ ಇದೇ ವೇಳೆ ಉಲ್ಲೇಖಿಸಿದರು. ಗುಂಪು ಹಂತದ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನ ಪಡೆದಿದ್ದ ಭಾರತ ತಂಡ, ನ್ಯೂಜಿಲೆಂಡ್ ವಿರುದ್ಧ ಸೆಮಿಫೈನಲ್ ಹಣಾಹಣಿಯ ಕೊನೆಯ 30 ರಿಂದ 40 ನಿಮಿಷದಲ್ಲಿ ಪಂದ್ಯವನ್ನು ಕೈ ಚೆಲ್ಲಿಕೊಂಡಿತು. ಕಳೆದ ಹಲವು ವರ್ಷಗಳಿಂದ ಭಾರತ ಐಸಿಸಿ ಸಹಯೋಗದ ಟೂರ್ನಿಗಳಲ್ಲಿ ನಾಕೌಟ್‌ ಹಂತದಲ್ಲಿಯೇ ಎಡವುತ್ತಿದೆ ಎಂಬುದನ್ನು ಮೀರತ್‌ ಮೂಲದ ವೇಗಿ ಹೇಳಿದರು. "2013ರಲ್ಲಿ ನಾವು ಕೊನೆಯ ಬಾರಿ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದಿದ್ದೆವು. ನಂತರ 3-4 ಐಸಿಸಿ ಟೂರ್ನಿಗಳು ನಡೆದಿದ್ದವು. ಅದರಲ್ಲಿ ನಾವು 2-3 ಟೂರ್ನಿಗಳಲ್ಲಿ ಸೆಮಿಫೈನಲ್ ಹಾಗೂ ಫೈನಲ್ ತಲುಪಿದ್ದೇವೆ. 2015ರ ವಿಶ್ವಕಪ್‌ನಲ್ಲಿ ಸೆಮಿಫೈನಲ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೋತಿದ್ದೆವು. 2019ರ ವಿಶ್ವಕಪ್‌ ನಮಗೆ ಅದೃಷ್ಠವಿರಲಿಲ್ಲ. ನ್ಯೂಜಿಲೆಂಡ್ ವಿರುದ್ಧದ ಸೆಮಿಫೈನಲ್ ಹಣಾಹಣಿಯಲ್ಲಿ ಅಗ್ರ ಕ್ರಮಾಂಕದ ಮೂವರು ಬ್ಯಾಟ್ಸ್‌ಮನ್‌ಗಳು ಬೇಗ ವಿಕೆಟ್‌ ಒಪ್ಪಿಸಿದ್ದು, ಪಂದ್ಯದ ದಿಕ್ಕು ಬದಲಾಗಲು ಕಾರಣವಾಯಿತು," ಎಂದರು. "ಕಳೆದ ವಿಶ್ವಕಪ್‌ ಟೂರ್ನಿಯುದ್ದಕ್ಕೂ ರೋಹಿತ್‌ ಶರ್ಮಾ 5 ಅಥವಾ 6 ಶತಕಗಳನ್ನು ಸಿಡಿಸಿದ್ದರು. ಕೆ.ಎಲ್‌ ರಾಹುಲ್‌ ಕೂಡ ಒಳ್ಳೆಯ ಲಯದಲ್ಲಿದ್ದರು. ಚೆನ್ನಾಗಿ ಆಡಿದ್ದರು ಹಾಗೂ ಎಂ.ಎಸ್‌ ಧೋನಿಯ ಬಲವೂ ತಂಡಕ್ಕಿತ್ತು. ಆದರೂ, ನಾಕೌಟ್‌ನಲ್ಲಿ ನಾವು ಸೋಲು ಅನುಭವಿಸಬೇಕಾಯಿತು," ಎಂದು ಭುವನೇಶ್ವರ್ ಕುಮಾರ್‌ ವಿಶ್ವಕಪ್‌ ಸೋಲಿನ ಬಗ್ಗೆ ಬೇಸರ ವ್ಯಕ್ತಪಡಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Vo7W1M
