ಹೊಸದಿಲ್ಲಿ: ಒಂದು ಕಾಲಕ್ಕೆ ವಿಶ್ವ ಶ್ರೇಷ್ಠ ಬೌಲಿಂಗ್‌ ವಿಭಾಗ ಮತ್ತು ಬಲಿಷ್ಠ ಬ್ಯಾಟಿಂಗ್‌ನೊಂದಿಗೆ ಸತತ ಎರಡು ಏಕದಿನ ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಗಳನ್ನು ಗೆದ್ದು ಅಬ್ಬರಿಸಿದ್ದ ಕಪ್ಪು ವರ್ಣೀಯ ಕ್ರಿಕೆಟಿಗರ ಅಬ್ಬರಕ್ಕೆ ಕಡಿವಾಣ ಹಾಕಲೆಂದೇ ಬೌನ್ಸರ್‌ಗಳ ನಿಯಂತ್ರಣ ನಿಯಮ ಜಾರಿಗೆ ತರಲಾಗಿತ್ತು ಎಂದು ವಿಂಡೀಸ್‌ನ ಮಾಜಿ ನಾಯಕ ಆರೋಪಿಸಿದ್ದಾರೆ. ಅಮೆರಿಕದ ಮಿನಿಯಾಪೊಲಿಸ್‌ನಲ್ಲಿ ಕಪ್ಪು ವರ್ಣದ ವ್ಯಕ್ತಿಯೊಬ್ಬನನ್ನು ಪೊಲೀಸ್‌ ಅಧಿಕಾರಿ ಒಬ್ಬ ನಡು ರಸ್ತೆಯಲ್ಲಿ ಕುತ್ತಿಗೆ ಮೇಲೆ ಕಾಲಿಟ್ಟು ಉಸಿರುಗಟ್ಟಿಸಿ ಕೊಲೆ ಮಾಡಿದ ಘಟನೆ ಬಳಿಕ ಜಗತ್ತಿನಾದ್ಯಂತ ವರ್ಣಭೇದ ನೀತಿಯ ವಿರುದ್ಧ ಭಾರಿ ಪ್ರತಿಭಟನೆಗಳು ನಡೆಯುತ್ತಿವೆ. ಈ ಸಂದರ್ಭದಲ್ಲಿ ಕ್ರಿಕೆಟ್‌ನಲ್ಲಿ ನಡೆಯುತ್ತಿರುವ ವರ್ಣಭೇದ ತಾರತಮ್ಯದ ಕುರಿತಾಗಿಯೂ ಹಲವು ಕ್ರಿಕೆಟಿಗರು ಬಾಯ್ಬಿಟ್ಟಿದ್ದರು. ಎಲ್ಲರಿಗಿಂತಲೂ ಒಂದು ಹೆಜ್ಜೆ ಮುಂದಿಟ್ಟಿರುವ ವಿಂಡೀಸ್‌ನ ಮಾಜಿ ನಾಯಕ ಡರೆನ್‌ ಸಾಮಿ, ತಮ್ಮ ವೃತ್ತಿಬದುಕಿನಲ್ಲಿ ಅನುಭವಿಸಿದ ಪ್ರತಿಯೊಂದು ಜನಾಂಗೀಯ ನಿಂದನೆಗಳ ಘಟನೆಗಳನ್ನು ತೆರೆದಿಟ್ಟಿದ್ದರು. ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಸನ್‌ರೈಸರ್ಸ್‌ ಪರ ಆಟುವಾಗ ಸಹ ಆಟಗಾರರು 'ಕಾಲೂ' (ಕರಿಯ) ಎಂದು ಕರೆದುದ್ದನ್ನು ಕೂಡ ಬಹಿರಂಗ ಪಡಿಸಿ, ತಮ್ಮನ್ನು ಆ ರೀತಿ ಕರೆದವರೆಲ್ಲಾ ಸಾರ್ವಜನಿಕವಾಗಿ ಕ್ಷಮೆ ಕೇಳಬೇಕು ಎಂದು ಆಗ್ರಹಿಸಿದ್ದರು. ಇದೀಗ ಸಾಮಿ ಗಂಭೀರ ಆರೋಪ ಒಂದನ್ನು ಮಾಡಿದ್ದಾರೆ. ಅದೇನೆಂದರೆ ವೆಸ್ಟ್‌ ಇಂಡೀಸ್ ಆಟಗಾರರ ಪ್ರಾಬಲ್ಯ ತಗ್ಗಿಸಲು ಸಲುವಾಗಿ ಬೌನ್ಸರ್‌ಗಳ ನಿಯಂತ್ರಣ ನಿಯಮ ಜಾರಿಗೆ ತರಲಾಯಿತು ಎಂಬುದು. 1970-1980ರ ದಶಕದಲ್ಲಿ ವೆಸ್ಟ್‌ ಇಂಡೀಸ್ ಅಪ್ರತಿಮ ವೇಗದ ಬೌಲಿಂಗ್‌ ವಿಭಾಗವನ್ನು ಹೊಂದಿತ್ತು. ಅಲ್ಲಿಯವರೆಗೂ ಓವರ್‌ ಒಂದರಲ್ಲಿ ಎಷ್ಟು ಬೇಕಾದರೂ ಬೌನ್ಸರ್‌ಗಳನ್ನು ಎಸೆಯುವಂತಿತ್ತು. ವಿಂಡೀಸ್‌ ಆಟಗಾರರು ಇದರ ಸದ್ಬಳಕೆ ಮಾಡಿ ಯಶಸ್ಸು ಗಳಿಸುತ್ತಿದುದ್ದನ್ನು ತಗ್ಗಿಸಲು ಬೌನ್ಸರ್ ನಿಯಂತ್ರಣ ನಿಯಮ ಜಾರಿಗೆ ತರಲಾಗಿತ್ತು ಎಂದು ಸಾಮಿ ವಿವರಿಸಿದ್ದಾರೆ. ಅಂದಹಾಗೆ 70-80ರ ದಶಕದಲ್ಲಿ ವಿಂಡೀಸ್‌ ವೇಗಿಗಳ ಅಬ್ಬರವನ್ನು 'ಫೈಯರ್‌ ಇನ್‌ ಬೇಬಿಲಾನ್‌' ಸಾಕ್ಷ್ಯಚಿತ್ರದಲ್ಲಿ (ಡಾಕ್ಯುಮೆಂಟರಿ) ತೋರಿಸಲಾಗಿದೆ. "ಫೈಯರ್‌ ಇನ್‌ ಬೇಬಿಲಾನ್‌ ವೀಕ್ಷಿಸಿದರೆ ಅಂದು ಜೆಫ್‌ ಥಾಮ್ಸನ್‌, ಡೆನಿಸ್‌ ಲಿಲ್ಲೀ ತಮ್ಮ ಬೌನ್ಸರ್‌ಗಳ ಮೂಲಕ ಎದುರಾಳಿ ಬ್ಯಾಟ್ಸ್‌ಮನ್‌ಗಳಿಗೆ ಪೆಟ್ಟು ನೀಡುತ್ತಿದ್ದುದ್ದನ್ನು ಗಮನಿಸಬಹುದು. ನಂತರ ಕಪ್ಪು ವರ್ಣೀಯ ಆಟಗಾರರ ವೆಸ್ಟ್‌ ಇಂಡೀಸ್ ತಂಡ ಪ್ರಾಬಲ್ಯ ಆರಂಭಿಸಿತ್ತು. ಬಳಿಕ ಇದ್ದಕ್ಕಿದ್ದಂತೆಯೇ ಬೌನ್ಸರ್ ನಿಯಂತ್ರಣ ನಿಯಮ ಜಾರಿಗೆ ಬಂದಿತು. ಇದು ಕಪ್ಪು ವರ್ಣೀಯ ಕ್ರಿಕೆಟಿಗರ ಏಳಿಗೆ ತಗ್ಗಿಸಲೆಂದೇ ತರಲಾದ ನಿಯಮ ಎಂದು ನನಗೀಗ ಅರ್ಥವಾಗುತ್ತಿದೆ," ಎಂದು ಸಾಮಿ ಐಸಿಸಿ ನಡೆಸಿಕೊಟ್ಟ ಇನ್‌ಸೈಡ್‌ ಔಟ್‌ ಕಾರ್ಯಕ್ರಮದಲ್ಲಿ ಹೇಳಿದ್ದಾರೆ. "ನಾನು ಇಲ್ಲಿ ಅರ್ಥ ಮಾಡಿಕೊಂಡಿರುವುದು ತಪ್ಪಾಗಿರಬಹುದು. ಆದರೆ ಪ್ರತಿಯೊಂದು ಸಂಗತಿಗಳನ್ನು ನಾನು ಈಗ ಕಾಣುತ್ತಿರುವುದು ಇದೇ ರೀತಿಯಲ್ಲಿ," ಎಂದು ವೆಸ್ಟ್‌ ಇಂಡೀಸ್ ತಂಡಕ್ಕೆ 2 ಬಾರಿ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ಚಾಂಪಿಯನ್ಸ್‌ ಪಟ್ಟ ತಂದುಕೊಟ್ಟ ನಾಯಕ ತಮ್ಮ ಅಭಿಪ್ರಾಯ ಹೊರಹಾಕಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2VhU3BR
