ಕೊಲ್ಕತ್ತಾ: 30 ವರ್ಷದ ಆಕೆಗೆ 9 ವರ್ಷದ ಹಿಂದೆ ಮದುವೆಯಾಗಿದ್ದು, ದಾಂಪತ್ಯ ಚೆನ್ನಾಗಿಯೇ ನಡೆಯುತ್ತಿದೆ. ಆದರೆ, ಕೆಲವು ದಿನಗಳಿಂದ ಕಿಬ್ಬೊಟ್ಟೆಯಲ್ಲಿ ಸಹಿಸಲಸಾಧ್ಯ ನೋವು ಶುರುವಾಗಿತ್ತು. ಆಸ್ಪತ್ರೆಗೆ ಹೋಗಿದ್ದ ಅವರನ್ನು ಪರೀಕ್ಷಿಸಿದ ವೈದ್ಯರು ದಂಗಾಗಿ ಹೋಗಿದ್ದಾರೆ. ಯಾಕೆಂದರೆ ಸಂಪೂರ್ಣ ಹೆಣ್ಣಿನ ಚಹರೆ ಹೊಂದಿದ್ದ ಅವರು ಮಹಿಳೆಯಲ್ಲ, ಪುರುಷ ಎಂಬುದು ಪತ್ತೆಯಾಯಿತು! ಇಂಥದ್ದೊಂದು ಬಲು ಅಪರೂಪದ ಪ್ರಕರಣ ದಾಖಲಾಗಿರುವುದು ಕೊಲ್ಕತ್ತಾದ ನೇತಾಜಿ ಸುಭಾಷ್‌ಚಂದ್ರ ಬೋಸ್‌ ಕ್ಯಾನ್ಸರ್‌ ಆಸ್ಪತ್ರೆಯಲ್ಲಿ. ಇದಕ್ಕೆ 'ಆ್ಯಂಡ್ರೊಜೆನ್‌ ಇನ್‌ಸೆನ್ಸಿಟಿವಿಟಿ ಸಿಂಡ್ರೋಮ್‌' ಎಂದು ಕರೆಯಲಾಗುತ್ತದೆ. ಅಂದರೆ, ವ್ಯಕ್ತಿ ಅನುವಂಶಿಕವಾಗಿ ಪುರುಷನಾಗಿದ್ದರೂ, ಹುಟ್ಟುತ್ತಾ ಮಹಿಳೆಯ ಲಕ್ಷಣ ತುಂಬಿಕೊಂಡಿರುವುದು. ಹೇಗೆಂದರೆ, 30 ವರ್ಷ ಹೆಣ್ಣಿನಂತೆ ಜೀವನ ಮಾಡಿದ್ದ ಆ ವ್ಯಕ್ತಿಗೆ ಸ್ತ್ರೀಯರಿಗೆ ಇರಬೇಕಾದ ಪ್ರಧಾನ ಅಂಗಗಳಾದ ಗರ್ಭಕೋಶ ಹಾಗೂ ಅಂಡಾಶಯವೇ ಇರಲಿಲ್ಲ. ಹೀಗಾಗಿ ಋುತುಮತಿಯೂ ಆಗಿರಲಿಲ್ಲ. ಆದರೆ, ಮಹಿಳೆಯರ ಬಾಹ್ಯ ಅಂಗಗಳಾದ ಸ್ತನ ಹಾಗೂ ಸ್ತ್ರೀ ಜನನಾಂಗವಿದೆ. ಅವರ ಹೊಟ್ಟೆಯೊಳಗೆ ಬೆಳವಣಿಗೆಯಾಗದ ವೃಷಣಗಳಿದ್ದವು. ಪುರುಷರ ದೇಹದ ಹೊರಭಾಗದಲ್ಲಿರುವ ವೃಷಣಗಳು ಒಳ ಭಾಗದಲ್ಲಿ ಇದ್ದ ಕಾರಣ ಕ್ಯಾನ್ಸರ್‌ಗೆ ಕಾರಣವಾಗಿದೆ. ಅದರ ಪರಿಣಾಮವಾಗಿ ಕಿಬ್ಬೊಟ್ಟೆ ನೋವು ಕಾಣಿಸಿಕೊಂಡಿತ್ತು. ಪ್ರಕರಣ ಪತ್ತೆಯಾದ ಕಾರಣ ಆ ವ್ಯಕ್ತಿಯ 28 ವರ್ಷದ ಸಹೋದರಿಯನ್ನೂ ಪರೀಕ್ಷೆ ಮಾಡಿಸಿದಾಗ ಅವರೂ ಅದೇ ರೀತಿಯ ಲಕ್ಷಣಗಳನ್ನು ಹೊಂದಿರುವುದು ಪತ್ತೆಯಾಗಿದೆ. ತಜ್ಞರ ಪ್ರಕಾರ ಇದು ವಂಶವಾಹಿಯಿಂದ ಆಗುವ ಪರಿಣಾಮವಾಗಿದ್ದು, ವರ್ಷಕ್ಕೆ 22 ಸಾವಿರ ಜನರಲ್ಲಿ ಒಬ್ಬರು ಹುಟ್ಟುತ್ತಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.''ಹೊರಗಿನಿಂದ ನೋಡುವಾಗ ಸಂಪೂರ್ಣ ಹೆಣ್ಣಿನಂತೆಯೇ ಇರುತ್ತಾರೆ. ಧ್ವನಿ, ನೋಟ, ಬೆಳವಣಿಗೆಯಾಗಿರುವ ಸ್ತನಗಳು ಇರುತ್ತವೆ. ತಜ್ಞರ ಪ್ರಕಾರ ಇಂಥ ವ್ಯಕ್ತಿಗಳಿಗೆ ಅಸಹಜ ಸ್ತ್ರೀ ಜನನಾಂಗವಿರುತ್ತದೆ. ಅಂದರೆ ಜನನಾಂಗವು ಸಂತಾನೋತ್ಪತ್ತಿ ಭಾಗಗಳಿಗೆ ಸಂಪರ್ಕ ಹೊಂದಿರುವುದಿಲ್ಲ. ಇವರಿಗೆ ಲೈಂಗಿಕ ಸುಖವೂ ದೊರೆಯುವುದಿಲ್ಲ. ಸ್ತ್ರೀಯರಿಗಿರಬೇಕಾದ ಎಕ್ಸ್‌ಎಕ್ಸ್‌ ಕ್ರೋಮೋಸೋಮ್‌ಗಳ ಬದಲಾಗಿ ಎಕ್ಸ್‌ವೈ ಕ್ರೋಮೋಸೋಮ್‌ಗಳಿರುತ್ತವೆ. ಚಿಕಿತ್ಸೆಗೆ ಒಳಗಾಗಿರುವ ವ್ಯಕ್ತಿಯ ದಾಂಪತ್ಯ ಜೀವನ ಚೆನ್ನಾಗಿಯೇ ಇತ್ತು. ಹಲವು ಬಾರಿ ಮಗುವನ್ನು ಪಡೆಯುವ ಉದ್ದೇಶಕ್ಕೆ ವೈದ್ಯರನ್ನು ಸಂಪರ್ಕಿಸಿದ್ದರು. ಆದರೆ, ಅದು ಸಾಫಲ್ಯ ಕಂಡಿರಲಿಲ್ಲ. ಈಗ ಕ್ಯಾನ್ಸರ್‌ಗೆ ಒಳಗಾದ ಬಳಿಕ ವಾಸ್ತವ ಅರಿವಿಗೆ ಬಂದಿದೆ. ''ಆ ವ್ಯಕ್ತಿಯ ಪತಿಯ ಜತೆ ಮಾತುಕತೆ ನಡೆಸಿ ದಾಂಪತ್ಯ ಮುಂದುವರಿಸಲು ಮನವೊಲಿಸುತ್ತೇವೆ. ಅವರ ಇಬ್ಬರು ದೊಡ್ಡಮ್ಮಂದಿರನ್ನೂ ಪರೀಕ್ಷೆ ನಡೆಸುತ್ತೇವೆ'' ಎಂದು ವೈದ್ಯರು ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3eEvxma
