ಲಡಾಖ್: ಸತತ ಮಿಲಿಟರಿ ಮಾತುಕತೆಗಳ ಹೊರತಗಿಯೂ ಲಡಾಖ್ ಗಡಿಯಿಂದ ಚೀನಾ ಸೇನೆ ಹಿಂದಕ್ಕೆ ಸರಿಯುವ ಯಾವುದೇ ಲಕ್ಷಣ ಕಾಣುತ್ತಿಲ್ಲ. ಮಾತುಕತೆ ವೇಳೆ ಸೈನ್ಯ ಹಿಂಪಡೆಯುವ ಕುರಿತು ಮಾತನಾಡುವ ಚೀನಾ, ಬಳಿಕ ಮತ್ತೆ ಐನ್ಯ ಜಮಾವಣೆಗೊಳಿಸುವ ತನ್ನ ಹಳೆಯ ಚಾಳಿಯನ್ನು ಮುಂದುವರೆಸುತ್ತಿದೆ. ಇದಕ್ಕೆ ಪುಷ್ಠಿ ಎಂಬಂತೆ ಗಲ್ವಾನ್ ನದಿ ಪಾತ್ರದಲ್ಲಿ ಚೀನಾ ಸೇನೆಯ ಟೆಂಟ್‌ಗಳು ಕಾಣಿಸಿಕೊಂಡಿದ್ದು, ಉಪಗ್ರಹದ ಮೂಲಕ ಸೆರೆಹಿಡಿಯಲಾದ ಚಿತ್ರಗಳಲ್ಲಿ ಕಪ್ಪು ಟಾರ್ಪಲಿನ್ ಹೊದಿಸಿರುವ 16 ಸೇನಾ ಟೆಂಟ್‌ಗಳು ಗೋಚರವಾಗಿವೆ. ಅಂದರೆ ಗಲ್ವಾನ್ ಗಡಿಯಿಂದ ಚೀನಾ ಸೇನೆ ಹಿಂದೆ ಸರಿದಿಲ್ಲ ಎಂಬುದು ಸ್ಪಷ್ಟವಾಗಿದ್ದು, ಮಿಲಿಟರಿ ಮಾತುಕತೆಗಳಲ್ಲಿ ಆದ ಒಪ್ಪಂದವನ್ನು ಚೀನಾ ಸೇನೆ ಗಾಳಿಗೆ ತೂರುತ್ತಿರುವುದು ಕಣ್ಣ ಮುಂದಿರುವ ಸತ್ಯವಾಗಿದೆ. ಚೀನಿ ಸೇನೆಯ ಈ ನಂಬಿಕೆ ದ್ರೋಹಕ್ಕೆ ತಿರುಗೇಟು ನೀಡಲು ಭಾರತ ಕೂಡ ಸಜ್ಜಾಗಿದ್ದು, ಲಡಾಖ್ ಗಡಿಗೆ ವಾಯು ರಕ್ಷಣಾ ಕ್ಷಿಪಣಿ ವ್ಯವಸ್ಥೆಯನ್ನು ನಿಯೋಜಿಸುವ ಮೂಲಕ ಎಚ್ಚರಿಕೆಯ ಸಂದೇಶ ರವಾನಿಸಿದೆ. ಲಡಾಖ್ ಗಡಿಯಲ್ಲಿ ಚೀನಾದ ವಾಯುಸೇನೆಗೆ ಸೇರಿದ ಯುದ್ಧ ವಿಮಾನಗಳು ಹಾಗೂ ಹೆಲಿಕಾಪ್ಟರ್‌ಗಳು ಹಾರಾಟ ನಡೆಸುತ್ತಿದ್ದು, ಗಲ್ವಾನ್ ನದಿ ಪಾತ್ರದಲ್ಲಿ ಸೇನಾ ಟೆಂಟ್ ಹಾಕಿಕೊಂಡಿರುವುದು ಸ್ಪಷ್ಟವಾಗಿದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ಸೇನೆ ಗಲ್ವಾನ್ ಗಡಿಯತ್ತ ದೃಷ್ಟಿ ನೆಟ್ಟಿದ್ದರೆ, ಭಾರತೀಯ ವಾಯುಸೇನೆ ಯುದ್ಧ ವಿಮಾನಗಳ ಹಾರಾಟದ ಜೊತೆಗೆ ವಾಯು ರಕ್ಷಣಾ ಕ್ಷಿಪಣಿ ವ್ಯವಸ್ಥೆಯನ್ನು ಸನ್ನದ್ಧ ಸ್ಥಿತಿಯಲ್ಲಿ ಇರಿಸಿದೆ. ಇದೇ ವೇಳೆ ಆಪ್ತ ರಾಷ್ಟ್ರಗಳಿಂದ ಭಾರತಕ್ಕೆ ಶೀಘ್ರದಲ್ಲೇ ಅತ್ಯಾಧುನಿಕ ಮಿಲಿಟರಿ ಉಪಕರಣಗಳು ದೊರೆಯಲಿದ್ದು, ಗಡಿಯಲಲಿ ಚೀನಿ ಸೇನೆಯೆ ಯಾವುದೇ ಉದ್ರೇಕಕಾರಿ ವರ್ತನೆಯನ್ನು ತಡೆಯಬಲ್ಲ ಸಾಮರ್ಥ್ಯ ಮತ್ತಷ್ಟು ಹೆಚ್ಚಾಗಲಿದೆ.
from India & World News in Kannada | VK Polls https://ift.tt/3dFrfd4
