ಹೈದರಾಬಾದ್: ಸಾವು ಅನ್ನೋದೇ ಹಾಗೆ, ಯಾರ ಬದುಕಿನಲ್ಲಿ ಯಾವಾಗ ಬರುತ್ತೆ, ಯಾವ ರೂಪದಲ್ಲಿ ಬರುತ್ತೆ ಅಂತಾ ಹೇಳೋಕೆ ಆಗಲ್ಲ. ಕೆಲವು ನತದೃಷ್ಟರು ಮಾತ್ರ ತಾವು ಜೀವನದಲ್ಲಿ ಇನ್ನೊಬ್ಬರಿಗೆ ಯಾವುದೇ ರೀತಿಯ ತೊಂದರೆ, ಅನ್ಯಾಯ ಮಾಡದೆ ಪರರ ಸೇವೆಗಾಗಿ ತಮ್ಮ ಜೀವನವನ್ನು ಮುಡಿಪಾಗಿಟ್ಟಿದ್ದರೂ ಅವರ ಸಾವು ಮಾತ್ರ ತುಂಬಾ ತ್ರಾಸದಾಯಕವಾಗಿರುತ್ತೆ. ಇಲ್ಲೊಬ್ಬರು ಸರ್ಕಾರಿ ಆಸ್ಪತ್ರೆಯ ಮುಖ್ಯ ನರ್ಸ್ ಒಬ್ಬರು ಇದೇ ಸಾಲಿಗೆ ಸೇರಿದ್ದಾರೆ. ಕೊರೊನಾ ದೇಶಕ್ಕೆ ಲಗ್ಗೆ ಇಟ್ಟಾಗಿನಿಂದ ವೈದ್ಯರು, ನರ್ಸ್‌ಗಳೆಲ್ಲ ರಜಾ ಬಿಡುವಿಲ್ಲದೆಯೂ ಸೇವೆಯಲ್ಲಿ ಭಾಗಿಯಾಗ್ತಿದ್ದಾರೆ. ಇಂತಹ ಸಮಯದಲ್ಲಿ ಇವರ ಸೇವೆಗೆ ಇಡೀ ದೇಶವೇ ಸೆಲ್ಯೂಟ್‌ ಅರ್ಪಿಸಿದೆ. ಆದರೆ ಸೇವೆಯಲ್ಲಿರೋವಾಗಲೇ ನರ್ಸ್ ಒಬ್ಬರಿಗೆ ಕೊರೊನಾ ಅಪ್ಪಳಿಸಿದ ಪರಿಣಾಮ ಅವರು ಸಾವನ್ನಪ್ಪಿದ್ದಾರೆ. ತೆಲಂಗಾಣದಲ್ಲಿರೋ ಜನರಲ್ ಮತ್ತು ಹೃದಯ ಆಸ್ಪತ್ರೆಯಲ್ಲಿ ಹೆಡ್‌ ನರ್ಸ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಅವರನ್ನು ಗಂಭೀರ ಸ್ಥಿತಿಯಲ್ಲಿರುವಾಗ ಗಾಂಧಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಕೊರೊನಾಗೆ ಬಲಿಯಾಗಿದ್ದಾರೆ. ವಿಪರ್ಯಾಸ ಅಂದ್ರೆ ಅವರ ನಿವೃತ್ತಿಗೆ ಕೇವಲ ನಾಲ್ಕು ದಿನಗಳಷ್ಟೇ ಬಾಕಿ ಉಳಿದಿತ್ತು. ಈ ಮಹಾಮಾರಿ ಅವರ ಜೀವನಕ್ಕೆ ಕಾಲಿಡದೇ ಇರುತ್ತಿದ್ದರೆ ಜುಲೈ ಒಂದರ ನಂತರ ಅವರು ಮನೆಯವರ ಜೊತೆ ಕಾಲ ಕಳೆಯಬಹುದಿತ್ತು. ನಿವೃತ್ತಿಯ ಜೀವನವನ್ನು ಸವಿಯಬಹುದಿತ್ತು. ಆದರೆ ದುರಾದೃಷ್ಟ ನೋಡಿ, ಕೊರೊನಾ ರೋಗಿಗಳ ಜೀವ ಉಳಿಸಲು ಹೋರಾಡುತ್ತಿದ್ದ ಅವರೇ ಕೊರೊನಾಗೆ ಬಲಿಯಾಗಿದ್ದಾರೆ. ಈ ಸಂಬಂಧ ಹೇಳಿಕೆ ನೀಡಿರೋ ಗಾಂಧಿ ಆಸ್ಪತ್ರೆಯ ವೈದ್ಯ ಡಾ.ಪ್ರಭಾಕರ್ ರೆಡ್ಡಿ, ‘ಜನರಲ್ ಮತ್ತು ಹೃದಯ ಆಸ್ಪತ್ರೆಯಲ್ಲಿ ಹೆಡ್‌ ನರ್ಸ್‌ಗೆ ಕೊರೊನಾ ಕಾಣಿಸಿದ ಬೆನ್ನಲ್ಲೇ ಅವರನ್ನು ಗಾಂಧಿ ಆಸ್ಪತ್ರೆಗೆ ದಾಖಲಿಸಿದ್ದೆವು. ಅವರಿಗೆ ಡಯಾಬಿಟಿಸ್ ಕಾಯಿಲೆ ಕೂಡ ಇತ್ತು. ಎರಡು ದಿನದಿಂದ ಅವರನ್ನು ವೆಂಟಿಲೇಟರ್‌ನಲ್ಲಿ ಇಡಲಾಗಿತ್ತು. ಆದರೆ ಅವರು ಚಿಕಿತ್ಸೆ ನೀಡಿದ ಬಳಿಕವೂ ಚೇತರಿಸಿಕೊಂಡಿಲ್ಲ. ಪರಿಣಾಮ ಮೃತಪಟ್ಟಿದ್ದಾರೆ’ ಎಂದು ತಿಳಿಸಿದ್ದಾರೆ. ವಿಪರ್ಯಾಸ ಅಂದ್ರೆ ರಜೆಯಲ್ಲಿದ್ದ ಅವರು ವೈದ್ಯಕೀಯ ಸಿಬ್ಬಂದಿಯ ಕೊರತೆಯ ಕಾರಣದಿಂದ ಕೆಲಸಕ್ಕೆ ಹಾಜರಾಗಿ ಕೋವಿಡ್ ವಾರ್ಡ್‌ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ಆದ್ರೆ ಕೋವಿಡ್ ಮಹಾಮಾರಿ ಅವರನ್ನೇ ಬಲಿ ಪಡೆದುಕೊಂಡಿದೆ. ಹೈದರಾಬಾದ್‌ನಲ್ಲಿ ಇದೇ ಮೊದಲ ಬಾರಿಗೆ ವೈದ್ಯಕೀಯ ಸಿಬ್ಬಂದಿಯೊಬ್ಬರು ಕೋವಿಡ್‌ಗೆ ಬಲಿಯಾಗಿದ್ದಾರೆ ಎನ್ನಲಾಗಿದೆ.
from India & World News in Kannada | VK Polls https://ift.tt/2B5AmGT
