ಶ್ರೀನಗರ: ಸಾಧ್ಯವಾದಷ್ಟು ಎಲ್‌ಪಿಜಿ ಸಿಲಿಂಡರ್‌ಗಳನ್ನು ಸಂಗ್ರಹಣೆ ಮಾಡಿ ಎಂದು ತೈಲ ಕಂಪನಿಗಳಿಗೆ ಜಮ್ಮು ಮತ್ತು ಕಾಶ್ಮೀರದ ಅಧಿಕಾರಿಗಳು ನೀಡಿರುವ ಆದೇಶ ಗಲಿಬಿಲಿ ಸೃಷ್ಟಿಸಿದೆ. ಲಡಾಖ್ ಗಡಿಯಲ್ಲಿ ಚೀನಾದ ಗಡಿ ತಕರಾರು ಕಾವು ಪಡೆದುಕೊಂಡಿರುವ ಬೆನ್ನಲ್ಲೇ, ತೈಲ ಕಂಪನಿಗಳು ಎಲ್‌ಪಿಜಿ ಸಿಲಿಂಡರ್‌ಗಳ ಸಂಗ್ರಹಣೆಗೆ ಮುಂದಾಗಬೇಕು ಎಂದು ಅಧಿಕಾರಿಗಳು ಆದೇಶ ನೀಡಿರುವುದು ತುಸು ಆತಂಕಕ್ಕೆ ಎಡೆ ಮಾಡಿಕೊಟ್ಟಿದೆ. ಅಲ್ಲದೇ ಇಲ್ಲಿನ ಗಂಡರ್‌ಬಲ್ ಜಿಲ್ಲೆಯ ಶಾಲಾ ಕಟ್ಟಡಗಳಲ್ಲಿ ಭದ್ರತಾ ಪಡೆಗಳು ಉಳಿದುಕೊಳ್ಳುವ ವ್ಯವಸ್ಥೆ ಮಾಡಬೇಕು ಎಂಬ ಆದೇಶ ಕೂಡ ಯುದ್ಧಾಂತಕವನ್ನು ಹೆಚ್ಚಿಸಿದೆ. ಸಿಲಿಂಡರ್ ಸಂಗ್ರಹಣೆ ಮತ್ತು ಶಾಲಾ ಕಟ್ಟಡಗಳಲ್ಲಿ ಭದ್ರತಾ ಪಡೆಗಳಿಗೆ ಆಶ್ರಯ ನೀಡುವ ನಿರ್ಧಾರ ಭಾರತ-ಚೀನಾ ನಡುವಿನ ಸಂಭವನೀಯ ಯುದ್ಧದ ತಯಾರಿ ಇರಬಹುದು ಎಂದು ಜನ ಮಾತನಾಡಿಕೊಳ್ಳುತ್ತಿದ್ದಾರೆ. ಆದರೆ ಈ ಆದೇಶದ ಕುರಿತು ಸ್ಪಷ್ಟನೆ ನೀಡಿರುವ ಆಡಳಿತ, ಸಮೀಪಿಸುತ್ತಿರುವುದರಿಂದ ಸುಲಭ ಲಭ್ಯತೆಗಾಗಿ ಹೆಚ್ಚುವರಿ ಸಿಲಿಂಡರ್‌ಗಳನ್ನು ಸಂಗ್ರಹಿಸಲು ಆದೇಶ ನೀಡಲಾಗಿದೆ ಎಂದು ಹೇಳಿದೆ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಜಮ್ಮು ಮತ್ತು ಕಾಶ್ಮೀರದ ಲೆ.ಗವರ್ನರ್ ಸಲಹೆಗಾರ ಫಾರೂಖ್ ಖಾನ್, ಚಳಿಗಾಲದ ಸಮಯದಲ್ಲಿ ಸಿಲಿಂಡರ್ ವ್ಯತ್ಯಯ ಉಂಟಾಗಬಾರದು ಎಂಬ ಕಾರಣಕ್ಕೆ ಹೆಚ್ಚುವರಿ ಸಿಲಿಂಡರ್‌ಗಳನ್ನು ಸಂಗ್ರಹಿಸಲು ಆದೇಶ ನೀಡಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. ಕಳೆದ ವರ್ಷವೂ ತೈಲ ಕಂಪನಿಗಳಿಗೆ ಇಂತದ್ದೇ ಆದೇಶ ನೀಡಲಾಗಿತ್ತು ಎಂದು ಹೇಳಿರುವ ಫಾರೂಖ್ ಖಾನ್, ಇದು ಸಾಮಾನ್ಯ ಪ್ರಕ್ರಿಯೆ ಎಂದು ಹೇಳುವ ಮೂಲಕ ಆತಂಕ ಕಡಿಮೆ ಮಾಡಿದ್ದಾರೆ. ಇನ್ನು ಗಂಡರ್‌ಬಲ್ ಜಿಲ್ಲೆಯ ಶ್ರೀನಗರ-ಲಡಾಖ್ ಹೆದ್ದಾರಿ ಸಮೀಪದ 16 ಶಾಲೆಗಳಲ್ಲಿ ಭದ್ರತಾ ಪಡೆಗಳು ಉಳಿದುಕೊಳ್ಳಲು ವ್ಯವಸ್ಥೆ ಕಲ್ಪಿಸಬೇಕು ಎಂಬ ಆದೇಶದ ಕುರಿತೂ ಸ್ಪಷ್ಟನೆ ನೀಡಿರುವ ಕಣಿವೆ ಆಡಳಿತ, ಅಮರನಾಥ್ ಯಾತ್ರೆ ಸಮೀಪಿಸುತ್ತಿರುವುದರಿಂದ ಭದ್ರತೆಗಾಗಿ ನಿಯೋಜನೆಗೊಳ್ಳುವ ಸಿಬ್ಬಂದಿಯ ಅನುಕೂಲಕ್ಕಾಗಿ ಶಾಲಾ ಕಟ್ಟಡಗಳನ್ನು ಬಳಸಲಾಗುವುದು ಎಂದು ಸ್ಪಷ್ಟಪಡಿಸಿದೆ. ಆದರೆ ಕೊರೊನಾ ವೈರಸ್ ಹಾವಳಿಯ ಹಿನ್ನೆಯಲ್ಲಿ ಈ ಬಾರಿಯ ಅಮರನಾಥ್ ಯಾತ್ರೆ ಅನುಮಾನ ಎಂದು ಕಳೆದ ತಿಂಗಳು ಅಮರನಾಥ್ ದೇಗುಲ ಮಂಡಳಿ ಹೇಳಿದ್ದನ್ನು ಇಲ್ಲಿ ಸ್ಮರಿಸಬಹುದು.
from India & World News in Kannada | VK Polls https://ift.tt/2NFFQL3
