ವಾಷಿಂಗ್ಟನ್: ಜರ್ಮನಿಯಲ್ಲಿ ನಿಯೋಜಿಸಲಾಗಿರುವ ಅಮೆರಿಕದ ಸೇನಾ ಪಡೆಗಳನ್ನು ಬರ್ಖಾಸ್ತುಗೊಳಿಸುವ ಅಮೆರಿಕದ ಚಿಂತನೆ ಇದೀಗ ಇಡೀ ವಿಶ್ವದ ಗಮನ ಸೆಳೆದಿದೆ. ಜರ್ಮನಿಯಲ್ಲಿ ಬೀಡು ಬಿಟ್ಟಿರುವ ಸೇನೆಯನ್ನು ವಾಪಸ್ ಪಡೆಯುವುದು ಮತ್ತು ಉಳಿದ ಸೈನ್ಯವನ್ನು ಈ ಹಿಂದಿನ ಸೋವಿಯತ್ ಯೂನಿಯನ್ ಭಾಗವಾಗಿದ್ದ ದೇಶಗಳತ್ತ ರವಾನಿಸುವುದು ಅಮೆರಿಕದ ಯೋಜನೆಯಾಗಿದೆ. ಸದ್ಯ ಜರ್ಮನಿಯಲ್ಲಿ 25,000 ಅಮೆರಿಕನ್ ಸೇನಾ ತುಕಡಿಗಳಿದ್ದು, ಇವುಗಳ ಪೈಕಿ 9,500 ಸೇನಾ ತುಕಡಿಗಳನ್ನು ಮರಳಿ ಅಮೆರಿಕಕ್ಕೆ ಕರೆಸಿಕೊಳ್ಳುವ ಯೋಜನೆ ಇದೆ. ಉಳಿದ ಸೇನಾ ತುಕಡಿಗಳನ್ನು ಮಾಜಿ ಸೋವಿಯತ್ ಯೂನಿಯನ್ ರಾಷ್ಟ್ರಗಳತ್ತ ರವಾನಿಸುವುದು ಟ್ರಂಪ್ ಆಡಳಿತದ ಯೋಜನೆ. ಇದರಿಂದ ಕ್ರಿಮಿಯಾ ವಶಪಡಿಸಿಕೊಳ್ಳುವ ಅಧ್ಯಕ್ಷ ವ್ಲಾಡಿಮರ್ ಪುಟಿನ್ ಅವರ ಯೋಜನೆಗೆ ತಡೆ ನೀಡುವುದು ಅಮೆರಿಕದ ಪ್ಲ್ಯಾನ್ ಎಂದು ಹೇಳಲಾಗುತ್ತಿದೆ. ಅಲ್ಲದೇ ದಕ್ಷಿಣ ಏಷ್ಯಾದಲ್ಲಿ ಭಾರತದ ಗಡಿ ಪ್ರದೇಶ ಹಾಗೂ ದಕ್ಷಿಣ ಸಮುದ್ರ ಪ್ರದೇಶದಲ್ಲಿ ಸೈನ್ಯ ಬಲ ವೃದ್ಧಿಸುತ್ತಿರುವ ಚೀನಾದ ದುಸ್ಸಾಹಸದ ಮೇಲೆ ನಿಗಾ ಇಡುವುದು ಟ್ರಂಪ್ ಹೆಣೆದ ಯೋಜನೆಯಾಗಿದೆ. ಈ ಕುರಿತು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಮೈಕೆ ಎಸ್ಪರ್, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಸಂಪೂರ್ಣ ಮಾಹಿತಿ ನೀಡಲಿದ್ದು, ಅಧ್ಯಕ್ಷರ ಅನುಮತಿ ದೊರೆಯುತ್ತಿದ್ದಂತೇ ಸೈನ್ಯ ತುಕಡಿಗಳ ರವಾನೆಯ ಆದೇಶ ನೀಡಲಾಗುವುದು ಎನ್ನಲಾಗಿದೆ. ಪೂರ್ವ ಯೂರೋಪಿಯನ್ ರಾಷ್ಟ್ರತಗಳಿಗೆ ಸೈನ್ಯವನ್ನು ರವಾನಿಸುವ ಮೂಲಕ ರಷ್ಯಾಗೆ ತನ್ನ ಸಾಮರ್ಥ್ಯ ತೋರುವ ಇರಾದೆ ಅಮೆರಿಕಕ್ಕೆ ಇದೆ ಎನ್ನಲಾಗಿದ್ದು, ಭಾರತದ ಗಡಿಯಲ್ಲಿ ಹೂಂಕರಿಸುತ್ತಿರುವ ಚೀನಿ ಸೇನೆಗೂ ಪರೋಕ್ಷವಾಗಿ ಸಂದೇಶ ರವಾನಿಸುವ ಯೋಜನೆಯನ್ನು ಕಾರ್ಯಗತಗೊಳಿಸಲಾಗುತ್ತಿದೆ. ಒಟ್ಟಿನಲ್ಲಿ ಅಮೆರಿಕದ ಈ ನಿರ್ಧಾರ ಜಾಗತಿಕವಾಗಿ ಗಮನ ಸೆಳೆದಿದ್ದು, ಮುಂದಿನ ಬೆಳವಣಿಗೆಗಳ ಮೇಲೆ ತೀವ್ರ ನಿಗಾ ಇಡಲಾಗಿದೆ.
from India & World News in Kannada | VK Polls https://ift.tt/3g2o5Sc
