ವಾಷಿಂಗ್ಟನ್: ಹೇಳಿ ಕೇಳಿ ಚೀನಾ ಮತ್ತು ಅಮೆರಿಕಾ ಪರಸ್ಪರ ಎದುರಾಳಿಗಳು. ಅದೇ ಎದುರಾಳಿ ರಾಷ್ಟ್ರದ ಅಧ್ಯಕ್ಷ ಬಳಿ ಅಮೆರಿಕಾ ಅಧ್ಯಕ್ಷ ಚುನಾವಣೆ ಗೆಲ್ಲಲು ಸಹಾಯ ಮಾಡಿ ಅಂತ ಮನವಿ ಮಾಡಿದ್ದರಂತೆ. ಹೀಗೊಂದು ಸ್ಫೋಟಕ ಅಂಶವನ್ನ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಬಹಿರಂಗ ಪಡಿಸಿದ್ದಾರೆ. ಜಾನ್ ಬಾಲ್ಟನ್ ಬರೆದಿರುವ ಪುಸ್ತಕ ಮುಂದಿನ ವಾರ ಬಿಡುಗಡೆಯಾಗಲಿದ್ದು, ಇದರ ಆಯ್ದಭಾಗವನ್ನು ಅಮೆರಿಕಾದ ಖ್ಯಾತ ಪತ್ರಿಕೆಗಳು ಗುರುವಾರ ಪ್ರಕಟಿಸುತ್ತಿದ್ದಂತೆ ಅಲ್ಲಿನ ರಾಜಕಾರಣದಲ್ಲಿ ಬಿರುಗಾಳಿ ಎದ್ದಿದೆ. ಅಮೆರಿಕಾ ರೈತರ ಉತ್ಪನ್ನಗಳನ್ನು ಚೀನಾ ಖರೀದಿಸಬೇಕು ಎಂದು ಟ್ರಂಪ್ ಬಯಸಿದ್ದರು ಎಂದಿರುವ ಬಾಲ್ಟನ್, ಟ್ರಂಪ್ಗೆ ಶ್ವೇತ ಭವನವನ್ನು ಹೇಗೆ ನಡೆಸಬೇಕು ಎಂಬುದರ ಬಗ್ಗೆ ಮಾಹಿತಿಯೇ ಇಲ್ಲ ಎಂದು ದೂರಿದ್ದಾರೆ. ಪುಸ್ತಕದ ಸಣ್ಣ ಭಾಗ ಬಹಿರಂಗವಾಗುತ್ತಿದ್ದಂತೆ ಟ್ರಂಪ್ ಸರಕಾರ ಆಘಾತಕ್ಕೆ ಒಳಗಾಗಿದ್ದು, ಪುಸ್ತಕವನ್ನು ನಿಷೇಧಿಸಲು ಶತಾಯಗತಾಯ ಯತ್ನಿಸುತ್ತಿದೆ. ಈ ಸಂಬಂಧ ಫಾಕ್ಸ್ ನ್ಯೂಸ್ಗೆ ಪ್ರತಿಕ್ರಿಯೆ ನೀಡಿರುವ ಟ್ರಂಪ್, “ಅವರು (ಬಾಲ್ಟನ್) ಕಾನೂನು ಮುರಿದಿದ್ದಾರೆ. ಇದು ಗೌಪ್ಯ ಮಾಹಿತಿಯಾಗಿದ್ದು ಇದಕ್ಕೆ ಅನುಮತಿ ಇಲ್ಲ,” ಎಂದು ಅಬ್ಬರಿಸಿದ್ದಾರೆ. ‘ಆತ (ಜಾನ್ ಬಾಲ್ಟನ್) ಎಲ್ಲವನ್ನೂ ಕಳೆದುಕೊಂಡ ವ್ಯಕ್ತಿ. ಆತನಿಗೆ ನಾನು ಒಂದು ಅವಕಾಶ ನೀಡಿದೆ’ ಎಂದು ಟ್ರಂಪ್ ಹೇಳಿದ್ದಾರೆ. 2018ರ ಏಪ್ರಿಲ್ನಲ್ಲಿ ಜಾನ್ ಬಾಲ್ಟನ್ ವೈಟ್ ಹೌಸ್ ಸೇರಿದ್ದರು. ಆದರೆ ಆರೇ ತಿಂಗಳಿಗೆ ಅಂದರೆ ಸೆಪ್ಟೆಂಬರ್ನಲ್ಲಿ ಅವರು ಅಲ್ಲಿಂದ ಹೊರ ಬಂದಿದ್ದರು. ಆಗ ಟ್ರಂಪ್, ನಾನು ಬಾಲ್ಟರ್ನನ್ನು ವಜಾಗೊಳಿಸಿದ್ದೇನೆ ಎಂದಿದ್ದರು. ಆದರೆ ಬಾಲ್ಟನ್ ನಾನೇ ರಾಜೀನಾಮೆ ನೀಡಿದ್ದಾಗಿ ಹೇಳಿದ್ದರು! ಜೂನ್ 23ಕ್ಕೆ ಜಾನ್ ಬಾಲ್ಟನ್ ಬರೆದ 577 ಪುಟಗಳ ‘ದಿ ರೂಂ ವೇರ್ ಇಟ್ ಹ್ಯಾಪನ್ಡ್’ ಬಿಡುಗಡೆಯಾಗಲಿದೆ. ಇದಕ್ಕೂ ಮುನ್ನ ಬುಧವಾರ ರಾತ್ರಿಯೇ ನ್ಯಾಯಾಂಗ ಇಲಾಖೆ ಈ ಪುಸ್ತಕದ ಬಿಡುಗಡೆಗೆ ತಕ್ಷಣ ತಡೆ ನೀಡುವಂತೆ ನ್ಯಾಯಾಧೀಶರ ಮೊರೆ ಹೋಗಿತ್ತು. ಆದರೆ ಇದರ ಆಯ್ದಭಾಗ ಗುರುವಾರ ಪ್ರಮುಖ ಪತ್ರಿಕೆಗಳಲ್ಲಿ ಪ್ರಕಟವಾಗಿದೆ. ಇದು ಟ್ರಂಪ್ ಹಾಗೂ ಅವರ ಸರಕಾರವನ್ನು ಮುಜುಗರಕ್ಕೀಡು ಮಾಡಿದೆ. ಜೊತೆಗೆ ಪುಸ್ತಕ ಈಗಾಗಲೇ ವಿಶ್ವದೆಲ್ಲೆಡೆ ಹಂಚಿಕೆಯಾಗಿದೆ ಎಂದು ಪ್ರಕಾಶನ ಸಂಸ್ಥೆ ಸೈಮನ್ ಆಂಡ್ ಶುಸ್ಟರ್ ಹೇಳಿದೆ. ಪುಸ್ತಕದ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಡೆಮಾಕ್ರಾಟಿಕ್ ಪಕ್ಷದ ಮುಂದಿನ ಅಧ್ಯಕ್ಷೀಯ ಚುನಾವಣೆ ಅಭ್ಯರ್ಥಿ ಜೋ ಬಿಡೆನ್, “ಒಂದೊಮ್ಮೆ ಈ ಮಾಹಿತಿಗಳು ನಿಜವಾಗಿದ್ದರೆ, ಇದು ನೈತಿಕವಾಗಿ ಅಸಹ್ಯಕರ ಮಾತ್ರವಲ್ಲ ಅಮೆರಿಕಾದ ಜನರ ಪವಿತ್ರ ಕರ್ತವ್ಯದ ಉಲ್ಲಂಘನೆ," ಎಂದು ಟ್ರಂಪ್ ವಿರುದ್ಧ ಕಿಡಿಕಾರಿದ್ದಾರೆ. ಮಾತುಕತೆ ನಡೆದಿದ್ದು ಯಾವಾಗ? ಕಳೆದ ವರ್ಷ ಜೂನ್ನಲ್ಲಿ ಜಪಾನ್ನ ಒಸಾಕ ನಗರದಲ್ಲಿ ನಡೆದಿದ್ದ ಜಿ-20 ದೇಶಗಳ ಶೃಂಗಸಭೆ ವೇಳೆ ಜಿನ್ಪಿಂಗ್ ಬಳಿ ಟ್ರಂಪ್ ಈ ಪ್ರಸ್ತಾಪ ಮುಂದಿಟ್ಟಿದ್ದರು ಎಂದು ಬಾಲ್ಟನ್ ಹೇಳಿದ್ದಾರೆ. “ಟ್ರಂಪ್ ಅಚ್ಚರಿಯ ರೀತಿಯಲ್ಲಿ ತಮ್ಮ ಮಾತುಕತೆಯನ್ನು ಅಮೆರಿಕಾ ಅಧ್ಯಕ್ಷೀಯ ಚುನಾವಣೆ (2020)ಯತ್ತ ಹೊರಳಿಸಿದರು. ಚೀನಾದ ಆರ್ಥಿಕ ಸಾಮಾರ್ಥ್ಯವನ್ನು ಉಲ್ಲೇಖಿಸಿದ ಅವರು ತಾವು ಗೆಲುವು ಸಾಧಿಸುವಂತೆ ನೋಡಿಕೊಳ್ಳಲು ಹೇಳಿದರು,” ಎಂದು ಪುಸ್ತಕದಲ್ಲಿ ಬರೆದಿದ್ದಾರೆ. ರೈತರ ಮಹತ್ವವನ್ನು ಒತ್ತಿ ಹೇಳಿದ ಅವರು ಚುನಾವಣೆ ಸಮೀಪ ಸೋಯಾಬೀನ್ ಮತ್ತು ಗೋಧಿ ಖರೀದಿ ಹೆಚ್ಚಿಸುವಂತೆ ಕೇಳಿಕೊಂಡರು ಎಂದು ಬಾಲ್ಟನ್ ಹೇಳಿದ್ದಾರೆ. 2016ರ ಚುನಾವಣೆಯಲ್ಲಿ ರೈತ ಸಮುದಾಯ ಟ್ರಂಪ್ರನ್ನು ಬಲವಾಗಿ ಬೆಂಬಲಿಸಿತ್ತು. ಅವರ ಗೆಲುವಿನಲ್ಲಿ ರೈತರ ಮತಗಳು ನಿರ್ಣಾಯಕವಾಗಿದ್ದವು. ಆದರೆ ಈ ರೀತಿಯ ಮಾತುಕತೆಗಳು ನಡೆದೇ ಇಲ್ಲ ಎಂದು ಅಮೆರಿಕಾ ವ್ಯಾಪಾರ ಪ್ರತಿನಿಧಿ ರಾಬರ್ಟ್ ಲೈಟಿಝರ್ ಹೇಳಿದ್ದಾರೆ. ಇನ್ನು ಶೃಂಗಸಭೆಯ ಆರಂಭಿಕ ಮಾತುಕತೆಯಲ್ಲಿ ಚೀನಾದ ಕ್ಷಿಂಜಿಯಾಂಗ್ ಪ್ರಾಂತ್ಯದಲ್ಲಿ ಕ್ಯಾಂಪಸ್ ನಿರ್ಮಾಣದ ಬಗ್ಗೆ ಜಿನ್ಪಿಂಗ್ ಮತ್ತು ಟ್ರಂಪ್ ಮಾತುಕತೆ ನಡೆಸಿದ್ದರು ಎಂದು ಬಾಲ್ಟನ್ ಬರೆದುಕೊಂಡಿದ್ದಾರೆ. ಈ ನಿರ್ಮಾಣ ಮುಂದುವರಿಯಲಿ, ಇದು ಸರಿಯಾದ ನಿರ್ಧಾರ ಎಂದು ಟ್ರಂಪ್ ಹೇಳಿದ್ದರಂತೆ. ಇದೇ ಕ್ಯಾಂಪಸ್ಗಳಲ್ಲಿ ಉಯಿಗರ್ಸ್ ಮುಸ್ಲಿಂ ಮತ್ತು ಕೆಲವು ಮೂಲ ನಿವಾಸಿಗಳನ್ನು ಚೀನಾ ಕೂಡಿ ಹಾಕಿ ಭೋಧನೆ ಮತ್ತು ಶಿಕ್ಷೆ ನೀಡುತ್ತಿದೆ ಎಂಬುದನ್ನು ಇಲ್ಲಿ ಸ್ಮರಿಸಬಹುದು. ಸಾರ್ವಜನಿಕವಾಗಿ ಅಮೆರಿಕಾ ಸರಕಾರ ಇದನ್ನು ಖಂಡಿಸುತ್ತಿದೆ. ಬುಧವಾರವಷ್ಟೆ ಈ ಕ್ರಮದ ಹಿಂದಿರುವ ಚೀನಾ ಅಧಿಕಾರಿಗಳಿಗೆ ನಿರ್ಬಂಧ ಹೇರುವ ಆದೇಶಕ್ಕೆ ಅಧ್ಯಕ್ಷರು ಸಹಿ ಹಾಕಿದ್ದಾರೆ ಎಂಬುದು ವಿಶೇಷ!
from India & World News in Kannada | VK Polls https://ift.tt/3efvZXT
