ವಿಶ್ವಸಂಸ್ಥೆ: ಇದುವರೆಗೂ ಕಂಡುಬಂದಿರುವ ಅತಿ ಉದ್ದನೆಯ ಎಂಬ ಹೊಸ ದಾಖಲೆಯನ್ನು ಕಳೆದ ವರ್ಷ ಬ್ರೆಜಿಲ್‌ನಲ್ಲಿ ದಾಖಲಾದ ಸಿಡಿಲಿನ ಅಬ್ಬರವೊಂದು ಸೃಷ್ಟಿಸಿದೆ. 700 ಕಿ.ಮೀ.ಗೂ ಅಧಿಕ ಅಂದರೆ ಅಮೆರಿಕದ ಬಾಸ್ಟನ್‌ನಿಂದ ವಾಷಿಂಗ್ಟನ್‌ ಡಿಸಿವರೆಗಿನ ಅಂತರದಷ್ಟು ಉದ್ದನೆಯ ಸಿಡಿಲು ಇದಾಗಿತ್ತು ಎಂದು ವಿಶ್ವಸಂಸ್ಥೆಯ ಹವಾಮಾನ ವಿಭಾಗವಾದ (ಡಬ್ಲುಎಂಒ) ಹೇಳಿದೆ. 2019ರ ಅಕ್ಟೋಬರ್‌ 31ರಂದು ಈ ಸಿಡಿಲು ಗೋಚರಿಸಿತ್ತು. 2007ರ ಜೂನ್‌ನಲ್ಲಿ ಅಮೆರಿಕದ ಒಕ್ಲಾ ಹೊಮಾದಲ್ಲಿ ಗೋಚರಿಸಿದ್ದ ಸಿಡಿಲೊಂದು 321 ಕಿ.ಮೀ ವ್ಯಾಪಿಸಿತ್ತು. ಇದು ಈ ಮುಂಚಿನ ನಂ.1 ದಾಖಲೆಯಾಗಿತ್ತು. ಜೂ.28ರಂದು ಅಂತಾರಾಷ್ಟ್ರೀಯ ಸಿಡಿಲಿನಿಂದ ರಕ್ಷಣಾ ದಿನವಾಗಿರುವ ಹಿನ್ನೆಲೆಯಲ್ಲಿ ಹೊಸ ದಾಖಲೆಗಳನ್ನು ಬಹಿರಂಗಪಡಿಸಿದೆ. ಜತೆಗೆ ಸಿಡಿಲಿನಿಂದ ವಹಿಸಬೇಕಿರುವ ಮುನ್ನೆಚ್ಚರಿಕೆಗಳನ್ನು ಪಟ್ಟಿ ಮಾಡಿ ನೀಡಿದೆ. ದೀರ್ಘಾವಧಿ ಸಿಡಿಲ ದಾಖಲೆ: ಇದರೊಂದಿಗೆ 2019ರ ಮಾರ್ಚ್ನಲ್ಲಿ ಅರ್ಜೆಂಟಿನಾದ ಉತ್ತರಭಾಗದಲ್ಲಿ ಕಂಡುಬಂದ ಸಿಡಿಲಿನ ಅಬ್ಬರವೊಂದು 16.73 ಸೆಕೆಂಡ್‌ಗಳ ಕಾಲ ಗೋಚರವಾಗಿತ್ತು. ಇದನ್ನು ಅತಿಹೆಚ್ಚು ಅವಧಿವರೆಗೆ ಗೋಚರವಾದ ಸಿಡಿಲು ಎಂದು ಗುರುತಿಸಿ, ಹೊಸ ದಾಖಲೆಗೆ ಡಬ್ಲುಎಂಒ ಸೇರ್ಪಡೆ ಮಾಡಿದೆ. 2012ರ ಆಗಸ್ಟ್‌ನಲ್ಲಿ ದಕ್ಷಿಣ ಫ್ರಾನ್ಸ್‌ನಲ್ಲಿ 7.74 ಸೆಕೆಂಡ್‌ಗಳವರೆಗೆ ಸಿಡಿಲೊಂದು ಕಾಣಿಸಿತ್ತು. ಇದು ಈ ಮುಂಚಿನ ದಾಖಲೆಯಾಗಿತ್ತು. ಈ ನೈಸರ್ಗಿಕ ಘಟನೆಗಳು ಪ್ರಕೃತಿಯ ಸಾಮರ್ಥ್ಯದ ಸಣ್ಣ ನಿದರ್ಶನಗಳಾಗಿವೆ ಎಂದು ಡಬ್ಲುಎಂಒ ಹವಾಮಾನ ವೈಪರೀತ್ಯ ವಿಭಾಗದ ಮುಖ್ಯಸ್ಥ ಪ್ರೊ. ರ‍್ಯಾಂಡಾಲ್‌ ಸಿರ್ವೆನಿ ಹೇಳಿದ್ದಾರೆ.
from India & World News in Kannada | VK Polls https://ift.tt/3i8yRbB
