ಮುಂಬೈ: ಜನರ ಮಧ್ಯೆ ಮಾನವೀಯತೆಯೇ ಸತ್ತು ಹೋಗಿದೆ ಅಂತಾ ಆತಂಕ ಪಡುವಂತಹ ಈ ಕಾಲದಲ್ಲಿ ಪುಟದ ಮರೆಯಲ್ಲಿ ಸಿಕ್ಕ ನವಿಲುಗರಿಯಂತೆ ಮನುಷ್ಯತ್ವಕ್ಕೆ ಸಾಕ್ಷಿಯಾಗೋ ಘಟನೆಯೊಂದು ದೂರದ ಮುಂಬೈನಲ್ಲಿ ವರದಿಯಾಗಿದೆ. ಅವರ ಹೆಸರು ಭಗವತಿ ಯಾದವ್. ಸ್ವಾಭಿಮಾನಿಯಾಗಿ ಜೀವಿಸುತ್ತಿದ್ದ ಅವರು ಯಾವತ್ತೂ ಇನ್ನೊಬ್ಬರ ಮುಂದೆ ಕೈ ಯಾಚಿಸಿದವರಲ್ಲ. ಜೀವನ ಸಾಗಿಸಲು ಕಳೆದ 46 ವರ್ಷಗಳಿಂದ ದಕ್ಷಿಣ ಮುಂಬೈನ ನಾಪಿಯಾನ್ ಸೀ ರೋಡ್ನಲ್ಲಿ ಪಾನಿ ಪೂರಿ ಮಾರಿ ಜೀವನ ಸಾಗಿಸುತ್ತಿದ್ದವರು. ಇದರಿಂದಾಗಿಯೇ ಆಸುಪಾಸಿನ ಜನರಿಗೆಲ್ಲ ಚಿರಪರಿಚಿತರಾಗಿದ್ದರು. ಆದರೆ ವಿಪರ್ಯಾಸ ಅಂದ್ರೆ ಜಗತ್ತನ್ನೇ ತನ್ನ ಕಪಿಮುಷ್ಠಿಯಲ್ಲಿ ಹಿಡಿದು ಆರ್ಭಟಿಸುತ್ತಿರುವ ಕೊರೊನಾಗೆ ಕಳೆದ ವಾರ ಬಲಿಯಾಗಿದ್ದಾರೆ. 46 ವರ್ಷಗಳಿಂದ ಒಂದೇ ಏರಿಯಾದಲ್ಲಿ ಪಾನಿಪೂರಿ ಮಾರುತ್ತಿದ್ದ ಭಗವತೀ ಯಾದವ್ ದಕ್ಷಿಣ ಮುಂಬೈನ ಆಸುಪಾಸಿನಲ್ಲಿ, ‘ಬಿಸ್ಲೆರಿ ಪಾನಿಪೂರಿ ವಾಲಾ’ ಅಂತಾನೇ ಪ್ರಸಿದ್ಧಿ ಹೊಂದಿದ್ದರು. ಅದಕ್ಕೆ ಕಾರಣ ಪಾನಿಪೂರಿ ತಯಾರಿಕೆ ವೇಳೆ ಅವರು ಬಿಸ್ಲೆರಿ ಬಾಟಲ್ ನೀರನ್ನೇ ಬಳಸುತ್ತಿದ್ದಿದ್ದು. ತಾನು ಪಾನಿಪೂರಿ ಮಾರಲು ಶುರು ಮಾಡಿದಾಗಿನಿಂದ ಇಲ್ಲಿಯ ತನಕ ಒಂದೇ ಟೇಸ್ಟ್ ನೀಡುತ್ತಾ, ತನ್ನಲ್ಲಿಗೆ ಬರುತ್ತಿದ್ದ ಗ್ರಾಹಕರನ್ನು ನಗುಮೊಗದಿಂದ ಮಾತನಾಡಿಸುತ್ತಿದ್ದ ಯಾದವ್ ಅವರು ಇದ್ದಕ್ಕಿದ್ದಂತೆ ಕೊರೊನಾದಿಂದ ಸಾವನ್ನಪ್ಪಿದ್ದು ಆಸುಪಾಸಿನ ಜನರನ್ನು ತೀವ್ರ ಕಾಡುವಂತೆ ಮಾಡಿತ್ತು. ಹೀಗಾಗಿ ತಮ್ಮ ನೆಚ್ಚಿನ ಪಾನಿಪೂರಿ ವಾಲಾ ಸಾವನ್ನಪ್ಪಿದ ಬಳಿಕ ಸ್ಥಳೀಯರೆಲ್ಲ ಸೇರಿ ಅವರ ಕುಟುಂಬಕ್ಕೆ ನೆರವಾಗಲು ನಿರ್ಧರಿಸಿ ಎರಡನೇ ದಿನದಲ್ಲಿ ಎರಡು ಲಕ್ಷ ಹಣ ಸಂಗ್ರಹಿಸಿದ್ದಾರೆ. ಈ ಬಗ್ಗೆ ನಾಪಿಯಾನ್ ಸೀ ರೋಡ್ ನಿವಾಸಿ ಯಶ್ ಬೈದ್ ಅವರು, ‘ ಕಳೆದ 46 ವರ್ಷಗಳಿಂದ ಯಾದವ್ ಅವರು ಬಿಸ್ಲೆರಿ ಪಾನಿಪೂರಿ ನಮ್ಮನ್ನು ಆರೋಗ್ಯವಾಗಿರಿಸಿದ್ದರು. ಮನೆಯ ಆಧಾರ ಸ್ತಂಭವಾಗಿದ್ದ ಯಾದವ್ ಜೀ ನಿಧನದಿಂದ ಅವರ ಮನೆಯವರು ಆತಂಕಕ್ಕೆ ಒಳಗಾಗಿದ್ದಾರೆ. ಹೀಗಾಗಿ ನಾವು ಅವರ ನೆರವಿಗೆ ನಿಲ್ಲಲು ನಿರ್ಧರಿಸಿದ್ವಿ. ಕೂಡಲೇ ವೆಬ್ಸೈಟ್ನಲ್ಲಿ ನಿಧಿಸಂಗ್ರಹ ಬಗ್ಗೆ ಮನವಿ ಮಾಡಿದಾಗ ಎರಡನೇ ದಿನದಲ್ಲಿ ಎರಡು ಲಕ್ಷ ಹಣ ಸಂಗ್ರಹ ಮಾಡಿದ್ದೇವೆ. ನಾವು ಅವರ ಪುತ್ರಿಯ ಸಂಪರ್ಕದಲ್ಲಿದ್ದು, ಅವರ ಕುಟುಂಬಕ್ಕೆ ನೆರವಾಗುತ್ತೇವೆ’ ಎಂದಿದ್ದಾರೆ. ಇನ್ನೊಬ್ಬ ಸ್ಥಳೀಯ ನಿವಾಸಿ, ‘ ನಾನು ಹತ್ತು ವರ್ಷದವನಾಗಿದ್ದಾಗಿನಿಂದ ಯಾದವ್ಜೀ ಬಳೀ ಪಾನಿಪೂರಿ ತಿನ್ನುತ್ತಿದ್ದೆ. ಈಗ ನನಗೆ ಇಪ್ಪತ್ತೈದು ವರ್ಷ. ಆದರೆ ಅವರು ಕೊಡೋ ಪಾನಿಪೂರಿಯ ರುಚಿ ಮತ್ತು ಅವರು ನಮ್ಮೊಂದಿಗೆ ಪ್ರೀತಿಯಿಂದ ಮಾತನಾಡಿಸುವುದರಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ’ ಎಂದಿದ್ದಾರೆ. ಮೂಲತಃ ಉತ್ತರಪ್ರದೇಶದ ಆಝಂಗಡ ನಿವಾಸಿಯಾಗಿರೋ ಭಗವತಿ ಯಾದವ್, 46 ವರ್ಷಗಳ ಹಿಂದೆ ಮುಂಬೈಗೆ ಬಂದು ಪಾನಿಪೂರಿ ವ್ಯಾಪಾರ ಶುರು ಮಾಡಿದ್ದರು. ಇದೀಗ ತಂದೆಯ ಮೇಲಿನ ಪ್ರೀತಿಯಿಂದ ತಮ್ಮ ಕುಟುಂಬಕ್ಕೆ ಸ್ಥಳೀಯರು ನೆರವಾಗಲು ನಿರ್ಧರಿಸಿರೋದನ್ನು ಕಂಡು ಯಾದವ್ ಪುತ್ರಿ ಭಾವುಕರಾಗಿದ್ದಾರೆ.
from India & World News in Kannada | VK Polls https://ift.tt/37YEqEI
