ಜಮ್ಮು-ಕಾಶ್ಮೀರ: ಕಳೆದ ವರ್ಷ ಸೇನಾ ವಾಹನಗಳನ್ನು ಗುರಿಯಾಗಿಸಿ ನಡೆದ ಪುಲ್ವಾಮ ದಾಳಿಯ ರೂವಾರಿ, ಆತ್ಮಹತ್ಯಾ ದಾಳಿಕೋರ ಆದಿಲ್ ದರ್ ಸಹೋದರ ಸಮೀರ್ ದರ್ ಪೊಲೀಸರ ವಿಚಾರಣೆ ವೇಳೆ ಮಹತ್ವದ ಮಾಹಿತಿಯೊಂದನ್ನು ಬಹಿರಂಗಪಡಿಸಿದ್ದಾನೆ. ಕಳೆದ ಡಿಸೆಂಬರ್ನಲ್ಲಿ ಉಗ್ರರ ತಂಡವೊಂದನ್ನು ಕಾಶ್ಮೀರ ಕಣಿವೆಗೆ ಅಕ್ರಮವಾಗಿ ನುಸುಳಿಸಿದ್ದೆ ಎಂದು ಆತ ಒಪ್ಪಿಕೊಂಡಿದ್ದಾನೆ. ಕರೀಮಾಬಾದ್ಗೆ ಅವರನ್ನು ತಲುಪಿಸುವ ಹೊಣೆ ನನ್ನದಾಗಿತ್ತು ಎಂದು ಆತ ಹೇಳಿದ್ದಾರೆ. ಉಗ್ರರ ಬಳಿ ಅಪಾರ ಪ್ರಮಾಣದ ಉಕ್ಕಿನ ಬುಲೆಟ್ಗಳು ಇದ್ದವು. ಬುಲೆಟ್ ನಿರೋಧಕ ವಾಹನಗಳನ್ನೂ ಭೇದಿಸಬಲ್ಲ ಶಕ್ತಿ ಇರುವಂಥ ಬುಲೆಟ್ಗಳು ಅವು ಎಂದು ಸಮೀರ್ ಧರ್ ಹೇಳಿದ್ಧಾನೆ. ಸಮೀರ್ ಹೇಳಿಕೆ ಹಿನ್ನೆಲೆಯಲ್ಲಿ ಗಡಿ ಭದ್ರತಾ ಪಡೆ (ಬಿಎಸ್ಎಫ್) ಅಂತಾರಾಷ್ಟ್ರೀಯ ಗಡಿಯಲ್ಲಿ ಗಸ್ತು ಹೆಚ್ಚಿಸಿದ್ದು, ಸಮೀಪದ ಗ್ರಾಮಗಳಲ್ಲಿ ಶೋಧಕಾರ್ಯ ಕೂಡ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ. ಪುಲ್ವಾಮ ಜಿಲ್ಲೆಯ ಕಾಕ್ಪೊರಾ ಪ್ರದೇಶದವನಾದ ಸಮೀರ್ನನ್ನು ಕಳೆದ ಶುಕ್ರವಾರ ನಗ್ರೋತಾದಲ್ಲಿ ಪೊಲೀಸರು ಬಂಧಿಸಿದ್ದರು. ‘ಸ್ಟೀಲ್ ಬುಲೆಟ್’ ಚೀನಾ ತಂತ್ರಜ್ಞಾನ 2017ರಲ್ಲಿ ಲೇಥಪೊರಾದ ಸಿಆರ್ಪಿಎಫ್ ನೆಲೆ ಮೇಲೆ ಜೈಷ್ ಉಗ್ರರು ನಡೆಸಿದ ದಾಳಿಯಲ್ಲಿ ಮೊದಲ ಬಾರಿಗೆ ಸ್ಟೀಲ್ ಬುಲೆಟ್ಗಳು ಪತ್ತೆಯಾಗಿದ್ದವು. ಸಾಮಾನ್ಯವಾಗಿ ಬಳಸಲಾಗುವ ಎಕೆ ಬುಲೆಟ್ಗಳಿಗೆ ಬುಲೆಟ್ ಪ್ರೂಫ್ ಪದರವನ್ನು ಭೇದಿಸುವ ಶಕ್ತಿ ಇರುವುದಿಲ್ಲ. ಆದರೆ ನಿಗ್ರಹ ಕಾರ್ಯಾಚರಣೆಯಲ್ಲಿ ಹೆಚ್ಚಾಗಿ ಬಳಕೆ ಮಾಡಲಾಗುವ ಸ್ಟೀಲ್ ಕೋರ್ ಬುಲೆಟ್ಗಳು ಬಂಕರ್ಗಳನ್ನು ಕೂಡ ಭೇದಿಸಬಲ್ಲವು. ಸಾಮಾನ್ಯ ಬುಲೆಟ್ಗೆ ಉಕ್ಕಿನ ಪದರವನ್ನು ಲೇಪಿಸುವುದು ಚೀನಾ ಸೇನೆಯಲ್ಲಿ ಹೆಚ್ಚಾಗಿ ಬಳಕೆಯಲ್ಲಿದೆ. ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ‘ಐಎಸ್ಐ’ ಚೀನಾದ ತಂತ್ರಜ್ಞಾನವನ್ನು ಬಳಸಿ ಉಗ್ರರಿಗೆ ಸ್ಟೀಲ್ ಕೋರ್ ಬುಲೆಟ್ಗಳನ್ನು ಪೂರೈಕೆ ಮಾಡುತ್ತಿದೆ ಎಂದು ಸೇನಾಧಿಕಾರಿಗಳು ಈಗಾಗಲೇ ಹಲವು ಸಂದರ್ಭಗಳಲ್ಲಿ ಸಂಶಯ ವ್ಯಕ್ತಪಡಿಸಿದ್ದಾರೆ. ದಕ್ಷಿಣ ಕಾಶ್ಮೀರದಲ್ಲಿ ಒಟ್ಟಾಗುತ್ತಿರುವ ಉಗ್ರರು: ಗಡಿಯಲ್ಲಿ ಅಕ್ರಮ ನುಸುಳಿವಿಕೆ ಸಣ್ಣ ಪ್ರಮಾಣದಲ್ಲಿ ಮುಂದುವರಿದಿದೆ. ಪ್ರಮುಖವಾಗಿ ಪುಲ್ವಾಮ ಮತ್ತು ತ್ರಾಲ್ ಪ್ರದೇಶಗಳಲ್ಲಿ ಈಗಾಗಲೇ ಪೋಷಿತ ಉಗ್ರರು ಒಟ್ಟಾಗುತ್ತಿದ್ದಾರೆ ಎಂದು ಕೂಡ ಸಮೀರ್ ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ ಎನ್ನಲಾಗಿದೆ.
from India & World News in Kannada | VK Polls https://ift.tt/31gWV41
