ಕ್ಯಾನ್ಬೆರಾ: ಕ್ಯಾಪ್ಟನ್‌ ಹದರ್‌ ನೈಟ್‌ (108*) ಅವರ ಸ್ಫೋಟಕ ಶತಕದ ನೆರವಿನಿಂದ ಅಬ್ಬರಿಸಿದ ಇಂಗ್ಲೆಂಡ್‌ ತಂಡ, ಇಲ್ಲಿ ನಡೆದ ಐಸಿಸಿ ಹಿಳಾ ವಿಶ್ವಕಪ್‌ ಟೂರ್ನಿಯ 'ಬಿ' ಗುಂಪಿನ ಪಂದ್ಯದಲ್ಲಿ ಎದುರು ದಾಖಲೆಯ ಗೆಲುವು ದಾಖಲಿಸಿದೆ. ಇಲ್ಲಿನ ಮನುಕಾ ಓವಲ್‌ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡುವಂತಾದ ಇಂಗ್ಲೆಂಡ್‌ ಆರಂಭಿಕ ಆಘಾತ ಅನುಭವಿಸಿತ್ತು. ಆರಂಭಿಕ ಬ್ಯಾಟರ್‌ಗಳಾದ ಏಮಿ ಜೋನ್ಸ್‌ (0) ಮತ್ತು ಡ್ಯಾನಿ ವ್ಯಾಟ್‌ (0) ಇಬ್ಬರೂ ಶೂನ್ಯ ಸಂಪಾದನೆಯಲ್ಲಿ ಪೆವಿಲಿಯನ್‌ ತಲುಪಿದ್ದರು. ಆದರೆ, ಅನುಭವಿ ಬ್ಯಾಟರ್‌ ನತಾಲಿ ಶಿವರ್‌ (59*) ಅವರೊಟ್ಟಿಗೆ ಮೂರನೇ ವಿಕೆಟ್‌ಗೆ ಮುರಿಯದ 169 ರನ್‌ಗಳ ಜೊತೆಯಾಟವಾಡಿದ ನಾಯಕಿ , ತಂಡಕ್ಕೆ 20 ಓವರ್‌ಗಳಲ್ಲಿ 176/2 ರನ್‌ಗಳ ಬೃಹತ್‌ ಮೊತ್ತ ತಂದುಕೊಟ್ಟರು. ಬಳಿಕ ಸಂಘಟಿತ ಬೌಲಿಂಗ್‌ ಮತ್ತು ಮಿಂಚಿನ ಫೀಲ್ಡಿಂಗ್‌ನೊಂದಿಗೆ ಥಾಯ್ಲೆಂಡ್‌ ತಂಡವನ್ನು 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 78 ರನ್‌ಗಳಿಗೆ ಕಟ್ಟಿಹಾಕಿ ದಾಖಲಯ 98 ರನ್‌ಗಳ ಗೆಲುವು ದಾಖಲಿಸಿತು. ರನ್‌ಗಳ ಅಂತರದಲ್ಲಿ ಮಹಿಳಾ ಟಿ20 ವಿಶ್ವಕಪ್‌ನಲ್ಲಿ ತಂಡವೊಂದಕ್ಕೆ ಸಿಕ್ಕ ಬೃಹತ್‌ ಗೆಲುವಿನ ದಾಖಲೆ ಇದಾಗಿದೆ. ಶಿವರ್‌-ನೈಟ್‌ ಮೂರನೇ ವಿಕೆಟ್‌ಗೆ ಆಡಿದ 110 ಎಸೆತಗಳಲ್ಲಿ 169 ರನ್‌ಗಳ ಜೊತೆಯಾಟ, ಮಹಿಳಾ ಟಿ20 ವಿಶ್ವಕಪ್‌ನಲ್ಲಿ ಯಾವುದೇ ವಿಕೆಟ್‌ಗೆ ಮೂಡಿಬಂದಿರುವ ಗರಿಷ್ಠ ರನ್‌ಗಳ ಜೊತೆಯಾಟವಾಗಿದೆ. 2009ರ ಆವೃತ್ತಿಯ ಚಾಂಪಿಯನ್ಸ್‌ ಇಂಗ್ಲೆಂಡ್‌ ತನ್ನ ಮೊದಲ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಎದುರು ಸೋತು ನಿರಾಸೆ ಅನುಭವಿಸಿತ್ತು, ಇದೀಗ ಭರ್ಜರಿ ಜಯದೊಂದಿಗೆ ಗೆಲುವಿನ ಹಾದಿ ಕಂಡುಕೊಂಡಿದೆ. ನೈಟ್‌ ಸೊಗಸಾದ ಶತಕ ತಂಡದ 7 ರನ್‌ ಗಳಿಸುವ ಹೊತ್ತಿಗೆ ಇಬ್ಬರೂ ಓಪನರ್‌ಗಳನ್ನು ಕಳೆದುಕೊಂಡಿತ್ತು. ಇಂತಹ ಒತ್ತಡದ ಸ್ಥಿತಿಯಲ್ಲಿ ಬ್ಯಾಟಿಂಗ್‌ಗೆ ಆಗಮಿಸಿದ ನಾಯಕಿ ಹೆದರ್‌ ನೈಟ್‌, ಥಾಯ್ಲೆಂಡ್‌ ತಂಡದ ಬೌಲಿಂಗ್‌ ದಾಳಿಯನ್ನು ಧೂಳೀಪಟ ಮಾಡಿ ಕೇವಲ 34 ಎಸೆತಗಳಲ್ಲಿ ಅರ್ಧಶತಕ ಬಾರಿಸಿದ್ದರು. ನಂತರವೂ ಬಿರುಸಿನ ಬ್ಯಾಟಿಂಗ್‌ ಮುಂದುವರಿಸಿದ ನೈಟ್‌, ಅಂತಿಮವಾಗಿ 66 ಎಸೆತಗಳಲ್ಲಿ 13 ಫೋರ್‌ ಮತ್ತು 4 ಸಿಕ್ಸರ್‌ ಒಳಗೊಂಡ ಅಜೇಯ 108 ರನ್‌ ಚಚ್ಚಿದರು. ಇದು ಅವರ ವೃತ್ತಿ ಬದುಕಿನ ಮೊತ್ತ ಮೊದಲ ಟಿ20 ಶತಕವಾಗಿದೆ. ಇನ್ನು ಮನೂಕ ಓವಲ್‌ನಲ್ಲಿ ನೈಟ್‌ 50+ ರನ್‌ಗಳಿಸಿರುವುದು ಇದು ಐದನೇ ಬಾರಿ ಆಗಿದೆ. ಮತ್ತೊಂದೆಡೆ ನೈಟ್‌ ಅವರೊಟ್ಟಿಗೆ ಉತ್ತಮ ಆಟವಾಡಿದ ನತಾಲಿ ಶಿವರ್‌, 52 ಎಸೆತಗಳಲ್ಲಿ 8 ಫೋರ್‌ಗಳೊಂದಿಗೆ ಅಜೇಯ 58 ರನ್‌ಗಳ ಕಾಣಿಕೆ ನೀಡಿದರು. ಸಂಕ್ಷಿಪ್ತ ಸ್ಕೋರ್‌ ಇಂಗ್ಲೆಂಡ್‌ ಮಹಿಳಾ ತಂಡ: 20 ಓವರ್‌ಗಳಲ್ಲಿ 2 ವಿಕೆಟ್‌ಗೆ 176 (ನತಾಲಿ ಶಿವರ್‌ ಅಜೇಯ 58, ಹೆದರ್‌ ನೈಟ್‌ ಅಜೇಯ 108; ನಾತ್ಯಾ ಬೂಚ್ಚಾತ್ತಮ್‌ 18ಕ್ಕೆ 1, ಸೊರಾಯ ಲತೇಹ್ 27ಕ್ಕೆ 1). ಥಾಯ್ಲೆಂಡ್‌ ಮಹಿಳಾ ತಂಡ: 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 78 (ನಟ್ಟಾಕನ್‌ ಚಾಂತಮ್‌ 32, ನರುಮೊಲ್‌ ಚಾಯ್ವಾಯ್ 19*; ಆನ್ಯಾ ಶ್ರುಬ್ಸೋಲ್‌ 21ಕ್ಕೆ 3, ನತಾಲಿ ಶಿವರ್‌ 5ಕ್ಕೆ 2).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2VjFUoR
