ಬೆಂಗಳೂರು: ಮಂಗಳವಾರ ರಾತ್ರಿ ನಗರವನ್ನು ಬೆಚ್ಚಿ ಬೀಳಿಸಿದ ಶೂಟೌಟ್‌ ಪ್ರಕರಣಕ್ಕೆ ಮತ್ತೊಂದು ತಿರುವು ಸಿಕ್ಕಿದ್ದು, ಮಹಿಳೆಯ ಮೇಲೆ ಗುಂಡಿನ ದಾಳಿ ನಡೆಸಿದ್ದ ಆರೋಪಿ ಗಂಭೀರ ಗಾಯಗೊಂಡು, ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾನೆ. ಆರೋಪಿಯನ್ನು ಅಮರೇಂದ್ರ ಪಟ್ಟಾನಾಯಕ್‌ (33) ಎಂದು ಗುರುತಿಸಲಾಗಿದ್ದು, ಈತ ಒಡಿಶಾ ಮೂಲದವನಾಗಿದ್ದಾನೆ. ಔಟರ್‌ ರಿಂಗ್‌ ರೋಡ್‌ನ ಬ್ರಿಡ್ಜ್‌ ಸಮೀಪ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದು, ಸಕ್ರಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಆತನ ಸ್ಥಿತಿ ಗಂಭೀರವಾಗಿದೆ. ಪ್ರಾಥಮಿಕವಾಗಿ ಇದೊಂದು ಅಪಘಾತದಂತೆ ಕಂಡುಬಂದರು ಕುತ್ತಿಗೆ ಮೇಲಿನ ಗಾಯಗಳು ಆತ್ಮಹತ್ಯೆಗೆ ಯತ್ನಿಸಿರುವ ಸುಳಿವು ನೀಡಿವೆ. ಅಪಘಾತದಿಂದ ಗಾಯಗೊಂಡಿದ್ದಾನೆ ಮತ್ತು ತನ್ನ ಮೇಲೆ ಗಂಭೀರ ಹಲ್ಲೆ ಮಾಡಿಕೊಂಡಿದ್ದಾನೆ ಎಂದು ವೈದ್ಯರು ಮಾಹಿತಿ ನೀಡಿದರು. ಘಟನಾ ಸ್ಥಳದಲ್ಲಿ ನೋಟ್‌ಬುಕ್‌ ಪತ್ತೆಯಾಗಿದ್ದು, 17 ಪುಟಗಳಲ್ಲಿ ಕೈಬರಹವಿದೆ. ಇದು ಆರೋಪಿಯ ಡೆತ್‌ನೋಟ್‌ ಎಂದು ಶಂಕಿಸಲಾಗಿದ್ದು, ತನ್ನ ಕೊನೆಯ ಆಸೆಯನ್ನು ಹೇಳಿದ್ದಾನೆ ಎನ್ನಲಾಗಿದೆ. ಪ್ರಿಯದರ್ಶಿನಿ ಮೇಲೆ ಗುಂಡಿನ ದಾಳಿ ನಡೆಸಿದ ನಂತರ ಆರೋಪಿ ಅಮರೇಂದ್ರ ಪಟ್ಟನಾಯಕ್‌ ಆತ್ಮಹತ್ಯೆಗೆ ಯತ್ನಿಸಿರಬಹುದು ಎಂದು ಶಂಕಿಸಲಾಗಿದೆ. ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಮಾರತ್‌ಹಳ್ಳಿಯ ಮಂಜುನಾಥ್‌ ಲೇಔಟ್‌ನ ಮುನ್ನೆಕೊಳಲುನಲ್ಲಿರುವ ಲೇಡಿಸ್‌ ಪಿಜಿಯೊಂದರ ಬಳಿ ಶುಭಶ್ರೀ ಪ್ರಿಯದರ್ಶಿನಿ ಮೇಲೆ ಕಂಟ್ರಿ ಪಿಸ್ತೂಲ್‌ನಿಂದ ಗುಂಡಿನ ದಾಳಿ ನಡೆದಿತ್ತು. ಪಿಜಿ ಮುಂದೆ ಮಾತುಕತೆ ನಡೆಸುತ್ತಿದ್ದ ಸಂದರ್ಭ ಎಲ್ಲರೂ ನೋಡನೋಡುತ್ತಿದ್ದಂತೆ ಮಹಿಳೆಯ ಮೇಲೆ 7.65 ಎಂಎಂ ಕಂಟ್ರಿ ಪಿಸ್ತೂಲ್‌ನಿಂದ ದಾಳಿ ನಡೆಸಲಾಗಿತ್ತು. ಕೂಡಲೇ ಆಕೆಯನ್ನು ಸಮೀಪದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ.
from India & World News in Kannada | VK Polls https://ift.tt/2Pr5kx0
