- ಬೊಮ್ಮೇಕಲ್ಲು ವೆಂಕಟೇಶ, ಗ್ರಾಮೀಣ ಭಾಗದಲ್ಲಿ ಈ ಹಿಂದಿನಿಂದಲೂ ಬೆಟ್ಟಕ್ಕೆ ಬೆಂಕಿ ಇಡುವುದರ ಹಿಂದೆ ಹಲವು ಅಭಿಪ್ರಾಯಗಳಿವೆ. ಅವುಗಳೆಂದರೆ ಕುರಿ ಮತ್ತಿತರ ದನಕರುಗಳಿಗೆ ಹೊಸ ಚಿಗುರು ದೊರೆಯುವುದರಿಂದ ಅವುಗಳಿಗೆ ಪೌಷ್ಟಿಕ ಆಹಾರ ಸಿಗುತ್ತದೆ ಎಂಬುದು. ಸ್ಥಳೀಯರು ಉರುವಲಿಗಾಗಿ ಬೆಂಕಿ ಇಡುವುದು, ಕೆಲವು ಕಿಡಿಗೇಡಿಗಳು ಸುಮ್ಮನೆ ಬೆಂಕಿ ಇಡುವುದೂ ಉಂಟು. ಆದರೆ ಇದೆಲ್ಲವೂ ಪರಿಸರ ಮತ್ತು ಪ್ರಾಣಿ ಸಂಕುಲದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತಿದೆ. ನೆಲೆ ಕಳೆದುಕೊಳ್ಳುವ ಪ್ರಾಣಿಗಳು: ಬೆಟ್ಟವೆಂದರೆ ಪ್ರಾಣಿ ಪಕ್ಷಿಗಳ ಆವಾಸ ಸ್ಥಾನ. ಬೆಟ್ಟಕ್ಕೆ ಬೆಂಕಿ ಇಡುವ ಜನರ ಕೆಟ್ಟ ಆಲೋಚನೆಯಿಂದ ಬೆಟ್ಟಗುಡ್ಡಗಳಲ್ಲಿ ಜೀವಿಸುತ್ತಿರುವ ಸಣ್ಣಪುಟ್ಟ ಪ್ರಾಣಿಗಳು ತಮ್ಮ ವಾಸ ಸ್ಥಾನವನ್ನು ಕಳೆದುಕೊಳ್ಳುವುದಲ್ಲದೆ, ಮರಿಗಳನ್ನು, ಮೊಟ್ಟೆಗಳನ್ನು, ಗೂಡುಗಳನ್ನೊಳಗೊಂಡಂತೆ ಎಲ್ಲವನ್ನು ಕಳೆದುಕೊಂಡು ಅನಾಥವಾಗುತ್ತಿವೆ. ಜತೆಗೆ ಕಾಡುಪ್ರಾಣಿಗಳು ನಾಡಿನತ್ತ ನುಗ್ಗುವುದು ಸಹಜವಾಗಿದೆ. ಪರಿಸರ ಕಾಳಜಿ ಬೇಕಿದೆ: ಅರಣ್ಯ ಇಲಾಖೆ ಒಳಗೊಂಡಂತೆ ಇತರೆ ಇಲಾಖೆಗಳು ಅರಣ್ಯ ನಾಶದ ಬಗ್ಗೆ ಮತ್ತು ಅರಣ್ಯವನ್ನು ಉಳಿಸುವ ಬಗ್ಗೆ ಸರಕಾರದ ವತಿಯಿಂದ ಹಲವು ಕಾರ್ಯಕ್ರಮಗಳನ್ನು ಹಾಕಿಕೊಳ್ಳುತ್ತಿದ್ದಾರೆ. ಆದರೆ ಅವುಗಳು ಕೇವಲ ದಾಖಲೆಗಳಿಗೆ ಸೀಮಿತವಾಗಿವೆ. ಜನರಲ್ಲಿ ಯಾವುದೇ ರೀತಿಯ ಪರಿಸರ ಜಾಗೃತಿಯನ್ನು ಮೂಡಿಸುತ್ತಿಲ್ಲ. ಪರಿಸರ ನಾಶ ಮಾಡಿದರೆ ಎಂತಹ ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ ಎಂಬ ಕನಿಷ್ಠ ಭಯವೂ ಜನರಲ್ಲಿ ಇಲ್ಲವಾಗಿದೆ. ಯೋಜನೆಗಳಿದ್ದರೂ ಪರಿಸರ ರಕ್ಷಣೆ ಇಲ್ಲ: ನೈಸರ್ಗಿಕವಾಗಿ ಮರಗಿಡಗಳನ್ನು ಉಳಿಸುವ ಸಲುವಾಗಿ ಸರಕಾರ ಪ್ರತಿಯೊಂದು ಗ್ರಾಮೀಣ ಕುಟುಂಬಕ್ಕೂ ಅನಿಲಭಾಗ್ಯ ಮತ್ತು ಉಜ್ವಲ ಯೋಜನೆಯ ಮೂಲಕವಾಗಿ ಎಲ್‌ಪಿಜಿ ಅನಿಲವನ್ನು ಉಚಿತವಾಗಿ ನೀಡುತ್ತಿದೆ. ಆದರೂ ಗ್ರಾಮಿಣ ಭಾಗದಲ್ಲಿ ಬೆಟ್ಟಗಳಿಗೆ ಬೆಂಕಿ ಬೀಳುವ ಕೆಲಸ ಇನ್ನೂ ನಿಂತಿಲ್ಲ. ಇದು ಹೀಗೆ ಮುಂದುವರಿದರೆ ಈ ಭಾಗದಲ್ಲಿ ಮುಂದಿನ ದಿನಗಳಲ್ಲಿ ಒಂದು ಮರವೂ ಉಳಿಯುವುದಿಲ್ಲ ಎನ್ನುತ್ತಾರೆ ಪರಿಸರ ತಜ್ಞ ಶ್ರೀನಿವಾಸ್‌. ಅರಿವಿನ ಕೊರತೆ: ಅರಣ್ಯ ನಾಶದಿಂದಾಗುವ ದುಷ್ಪರಿಣಾಮದ ಬಗ್ಗೆ ಜನರಲ್ಲಿ ಜಾಗೃತಿ ಮೂಡುತ್ತಿಲ್ಲ. ಈ ಬಗ್ಗೆ ಇನ್ನಷ್ಟು ಕಾರ್ಯಕ್ರಮಗಳನ್ನು ಆಯೋಜಿಸಿ ಪರಿಸರ ರಕ್ಷಣೆ ಬಗ್ಗೆ ಜನಜಾಗೃತಿ ಮೂಡಿಸಬೇಕಾದ್ದು ಇಂದಿನ ತುರ್ತು. ಗ್ರಾಮಸ್ಥರಿಗೂ ಮುಖ್ಯವಾಗಿ ಬೆಟ್ಟದ ಅಂಚಿನ ಗ್ರಾಮಸ್ಥರಿಗೆ ಪ್ರಕೃತಿಯ ಅರಿವಿನ ಪಾಠ ಮಾಡಬೇಕಿದೆ. ಪ್ರಾಣಿ ಪಕ್ಷಿಗಳ ಆವಾಸ ಸ್ಥಾನವಾಗಿರುವ ಬೆಟ್ಟಗುಡ್ಡಗಳಿಂದ ಅಪಾರವಾದ ಉಪಯೋಗಗಳು ಮಾನವ ಸಮೇತ ಜೀವ ಸಂಕುಲಕ್ಕೆ ಇದೆ. ಅಂತಹ ಬೆಟ್ಟಗಳನ್ನು ಉಳಿಸಿಕೊಳ್ಳುವ ಹೊಣೆ ನಮ್ಮೆಲ್ಲರ ಮೇಲಿದೆ. ಆದ್ದರಿಂದ ಬೆಟ್ಟಗಳಿಗೆ ಬೆಂಕಿ ಇಡುವ ಮನಃಸ್ಥಿತಿ ಇರುವ ಜನರ ಮನಪರಿವರ್ತನೆಯ ಜತೆಗೆ ಪ್ರಕೃತಿ ರಕ್ಷಣೆಯ ಹೊಣೆಯನ್ನು ನಾವೆಲ್ಲರೂ ಹೊರಬೇಕಿದೆ. ತಾಲೂಕಿನ ಬಹುತೇಕ ಬೆಟ್ಟಗಳಿಗೆ ಬೆಂಕಿಇತ್ತೀಚಿನ ದಿನಗಳಲ್ಲಿ ತಾಲೂಕಿನ ಬಹುತೇಕ ಬೆಟ್ಟಗಳಿಗೆ ಬೆಂಕಿ ಬಿದ್ದು ಬೆಟ್ಟ ಹಲವು ಪ್ರಾಣಿ, ಪಕ್ಷಿ, ವಿಶೇಷ ಸಸ್ಯಸಂಕುಲದ ಸುಟ್ಟು ಕರಕಲಾಗಿದೆ. ಕೈವಾರ ಹೋಬಳಿಯ ಚನ್ನಕೇಶವಪುರ ಬೆಟ್ಟ, ಗುನ್ನಹಳ್ಳಿಯ ಬಳಿ ಇರುವ ಬೆಟ್ಟ, ಅಂಬಾಜಿದುರ್ಗ ಬೆಟ್ಟ, ಬೊಮ್ಮೇಕಲ್ಲುಬೆಟ್ಟ, ಮುರಗಮಲ್ಲಾಬೆಟ್ಟ, ಕೈಲಾಸಗಿರಿ ಬೆಟ್ಟ ಸೇರಿದಂತೆ ಹಲವು ಬೆಟ್ಟಗಳು ಈಗಾಗಲೇ ಸುಟ್ಟು ಕರಕಲಾಗಿದೆ. ಈ ತಿಂಗಳಲ್ಲಿ ಅರಣ್ಯ ಇಲಾಖೆಗೆ ಸಂಬಂಧಿಸಿದಂತೆ ಎರಡು ಬೆಟ್ಟಗಳಿಗೆ ಬೆಂಕಿ ಬಿದ್ದಿದೆ. ಅದನ್ನು ನಂದಿಸಲು ಹರಸಾಹಸಪಟ್ಟಿದ್ದೇವೆ. ಬಹುತೇಕ ಇಲಾಖೆಯ ಅರಣ್ಯಗಳಿಗೆ ಬೆಂಕಿ ರೇಖೆಯನ್ನು ಮಾಡಿದ್ದೇವೆ. ಆದರೂ ಜನ ಅದನ್ನು ದಾಟಿ ಬೆಂಕಿ ಇಟ್ಟಿದ್ದಾರೆ. ನಾವು ಇದನ್ನು ತಪ್ಪಿಸಲು ಹಲವು ಕಾರ್ಯಕ್ರಮಗಳ ಮೂಲಕ ಜನರಲ್ಲಿ ಅರಿವು ಮೂಡಿಸುತ್ತಿದ್ದೇವೆ. ಈ ಬಾರಿ ನಮಗೆ ಬೆಂಕಿ ಇಟ್ಟವರು ಸಿಕ್ಕರೆ ಸೀದಾ ಜೈಲಿಗೆ ಅಟ್ಟುತ್ತೇವೆ. ಮೊದಲು ಜನರಲ್ಲಿ ಅರಿವು ಬರಬೇಕಿದೆ. ನಾವು ಬೆಂಕಿ ಹಾರಿಸುತ್ತಿದ್ದರೆ ಜನ ನಮ್ಮ ಸಮೇತ ಬೆಂಕಿಯನ್ನು ಸೆಲ್ಫಿ ತೆಗೆದುಕೊಳ್ಳುತ್ತಿದ್ದಾರೆ. ಜನರಲ್ಲಿ ಮೊದಲು ಪರಿಸರ ಪ್ರಜ್ಞೆ ಬರಬೇಕಿದೆ. - ಜಯಚಂದ್ರ, ಅರಣ್ಯ ಇಲಾಖೆಯ ಅಧಿಕಾರಿ, ಚಿಂತಾಮಣಿ ಪರಿಸರದ ಬಗ್ಗೆ ಕಾಳಜಿಯನ್ನು ಕೇವಲ ಸರಕಾರ ಮತ್ತು ಕಾನೂನಿನ ಒತ್ತಡಗಳಿಗೆ ಮಾಡಬಾರದು. ಪ್ರಾಣಿ ಸಂಕುಲ ಉಳಿವಿಗೆ ಪರಿಸರದ ಮಹತ್ವ ಏನು ಎಂಬುದನ್ನು ಜನರಿಗೆ ತಿಳಿ ಹೇಳಬೇಕು. ಒಮ್ಮೊಮ್ಮೆ ಪರಿಸರವನ್ನು ನಾಶ ಮಾಡುವವರ ಬಗ್ಗೆ ಕಠಿಣ ಕಾನೂನನ್ನು ಪ್ರಯೋಗ ಮಾಡಬೇಕು. ಇಲ್ಲವಾದರೆ ಮುಂದಿನ ಕೆಲವೇ ವರ್ಷಗಳಲ್ಲಿ ಮರಗಳನ್ನು ಮ್ಯೂಸಿಯಂಗಳಲ್ಲಿನೋಡಬೇಕಾಗುತ್ತದೆ. - ಪರಿಸರ ಶ್ರೀನಿವಾಸ್‌, ಉಪನ್ಯಾಸಕ, ಸರಕಾರಿ ಮಹಿಳಾ ಕಾಲೇಜು, ಚಿಂತಾಮಣಿ
from India & World News in Kannada | VK Polls https://ift.tt/2TpDWki
