ಹೊಸದಿಲ್ಲಿ: ಪೌರತ್ವ ತಿದ್ದುಪಡಿ ಕಾಯ್ದೆ ಪರ ಹಾಗೂ ವಿರೋಧಿ ಪ್ರತಿಭಟನೆಗಳು ದೆಹಲಿಯಲ್ಲಿ ಹಿಂಸಾತ್ಮಕ ರೂಪ ಪಡೆದುಕೊಂಡು 20 ಜನರನ್ನು ಬಲಿತೆಗೆದುಕೊಂಡಿದೆ. ಹಲವೆಡೆ ನಡೆದ ಘರ್ಷಣೆಯಿಂದ ನೂರಾರು ಜನರುಗಾಯಗೊಂಡಿದ್ದಾರೆ. ಅಪಾರ ಪ್ರಮಾಣದ ಆಸ್ತಿ, ಪಾಸ್ತಿಗಳು ನಷ್ಟವಾಗಿವೆ. ಶಾಂತವಾಗಿದ್ದ ದೆಹಲಿಯಲ್ಲಿ ಹಿಂಸೆ ತಾಂಡವವಾಡಲು ಸಾಮಾಜಿಕ ಜಾಲತಾಣಗಳ ಕೊಡುಗೆಯೂ ಅಪಾರವಾಗಿದೆ. ದೆಹಲಿಯ ಜಾಫ್ರಾವಾದ್, ಸೀಲಂಪುರ್ ಸುತ್ತಮುತ್ತಿನ ಪ್ರದೇಶಗಳು ಹಿಂಸೆಯಿಂದ ನಲುಗಿ ಹೋಗಿವೆ. ಸಿಎಎ ವಿರುದ್ದಜಾಫ್ರಾಬಾದ್‌ನಲ್ಲಿ ಮಹಿಳೆಯರ ಪ್ರತಿಭಟನೆ ಆರಂಭವಾಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿಪರ ಹಾಗೂ ವಿರೋಧ ಚರ್ಚೆಗಳು, ಹಿಂಸೆಯ ಮಾತುಗಳು, ಪ್ರತಿಕಾರದ ಸಂದೇಶಗಳು ಹರಿದಾಡತೊಡಗಿವೆ. ಆದರೆ ಇದನ್ನು ಆರಂಭದಲ್ಲೇ ನಿಯಂತ್ರಣ ಮಾಡಬೇಕಾದ ಪೊಲೀಸರು ಸುಮ್ಮನಾಗಿದ್ದರು. ಇದರ ಪರಿಣಾಮ ಹಲವು ಸುಳ್ಳು ಸುದ್ದಿಗಳು, ವದಂತಿಗಳನ್ನು ಸಾಮಾಜಿಕ ಜಾಲತಾಣಗಳಾದ ಫೇಸ್‌ಬುಕ್‌, ವಾಟ್ಸಪ್‌ಗಳಲ್ಲಿ ಕಿಡಿಗೇಡಿಗಳು ಮನಸೋ ಇಚ್ಚೆ ಹರಿಯಬಿಟ್ಟಿದ್ದಾರೆ. ಈ ವದಂತಿಗಳೇ ಹಲವು ಕಡೆಗಳಲ್ಲಿ ಹಿಂಸಾಚಾರಕ್ಕೆ ಕಾರಣವಾಗಿದೆ. ಸಾಮಾಜಿಕ ಜಾಲತಾಣಗಳ ಮೂಲಕ ಜನರನ್ನು ಜಮಾವಣೆ ಆಗುವಂತೆ ಕರೆ ನೀಡುವುದು ಅಲ್ಲದೆ ಧಾರ್ಮಿಕ ಕೇಂದ್ರಗಳು, ಮಾರ್ಕೆಟ್‌ಗಳು, ಅಂಗಡಿ ಮುಂಗಟ್ಟುಗಳಿಗೆ ಬೆಂಕಿ ಇಟ್ಟ ಚಿತ್ರಗಳು ಜನರನ್ನು ಮತ್ತಷ್ಟು ರೊಚ್ಚಿಗೆಬ್ಬಿಸಿದೆ. ಇವುಗಳು ಉಂಟುಮಾಡಿದ ಪರಿಣಾಮ ಮಾತ್ರ ಭಯಾನಕ. ಈ ನಿಟ್ಟಿನಲ್ಲಿ ಪೊಲೀಸರು ತನಿಖೆಯನ್ನು ನಡೆಸಬೇಕು ಎಂಬ ಒತ್ತಡಗಳು ಹೆಚ್ಚಾಗುತ್ತಿವೆ. ಗಲಭೆಯ ಹಾಗೂ ಹಿಂಸೆ ನಡೆಸಿರುವ ಸಂಗತಿಗಳನ್ನು ಸ್ವತಃ ಫೇಸ್‌ಬುಕ್‌, ವಾಟ್ಸಪ್‌ಗಳನ್ನು ಕೆಲವು ಕಿಡಿಗೇಡಿಗಳು ಹಂಚಿಕೊಂಡಿದ್ದಾರೆ. ಮತ್ತೆ ಕೆಲವರು ನಾವೇ ಈ ಹಿಂಸೆಗೆ ಹೊಣೆಗಾರರು ಎಂದು ವಿಡಿಯೋ ಮೂಲಕ ಹೇಳಿಕೊಂಡಿದ್ದಾರೆ. ಪೆಟ್ರೋಲ್‌ ಬಾಂಬ್‌ ಎಸೆಯುವ, ಹಲ್ಲೆ ನಡೆಸುವ ದೃಶ್ಯಗಳನ್ನು ಸ್ವತಃ ಹಂಚಿಕೊಂಡಿದ್ದಾರೆ. ಅಲ್ಲದೆ ಕಿಡಿಗೇಡಿ ಒಬ್ಬ ಗಲಭೆ ಮಾಡುತ್ತೇವೆ ಎಂದು ಸೆಲ್ಫಿ ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಯಬಿಟ್ಟಿರುವುದು ಸಾಕ್ಷಿಯಾಗಿವೆ. ಯಾವುದೇ ಕಾನೂನಿನ ಭಯವಿಲ್ಲದೆ ಇಂತಹ ಕೃತ್ಯಗಳನ್ನು ಎಸಗುವವರ ವಿರುದ್ಧ ಕಠಿಣ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬ ಒತ್ತಾಯಗಳು ಕೇಳಿಬರುತ್ತಿವೆ.
from India & World News in Kannada | VK Polls https://ift.tt/3a9ZE2p
