- ಎನ್‌.ಪ್ರಸನ್ನಕುಮಾರ್‌, ರಸ್ತೆ ಬದಿ ಗಿಡ ನೆಡುವ ಯೋಜನೆ ಕಡತದ ಮಾಹಿತಿಗಷ್ಟೇ ಸೀಮಿತವಾಗಿದೆಯೇ ಹೊರತು ವಾಸ್ತವದಲ್ಲಿ ಗಿಡ ನೆಟ್ಟ ಕುರುಹುಗಳು ಸಿಗದಂತಾಗಿದ್ದು, ಗಿಡದ ನೆಪದಲ್ಲಿ ವ್ಯಯಿಸುವ ಲಕ್ಷಾಂತರ ರೂ.ಗೆ ಲೆಕ್ಕವಿಲ್ಲದಂತಾಗಿದೆ. ರಸ್ತೆ ಬದಿ, ಬಯಲು ಪ್ರದೇಶ, ಶಾಲಾ-ಕಾಲೇಜು ಸೇರಿದಂತೆ ಸಾರ್ವಜನಿಕ ಸ್ಥಳಗಳಲ್ಲಿ ಪ್ರತಿ ವರ್ಷ ಒಂದೂವರೆಯಿಂದ ಎರಡು ಲಕ್ಷ ಗಿಡಗಳನ್ನು ನೆಡಲಾಗುತ್ತಿದೆ ಎಂದು ಸಾಮಾಜಿಕ ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ ಜಿಲ್ಲೆಯ ನಾಲ್ಕು ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿಗಳಲ್ಲಿಗಿಡ, ಮರಗಳೇ ಕಾಣದಂತಾಗಿದ್ದು ನೆರಳಿಗಾಗಿ ಪರದಾಡುವಂತಾಗಿದೆ. ನರೇಗಾ ಯೋಜನೆಯಡಿ ಪ್ರತಿ ತಾಲೂಕಿನಲ್ಲಿ 1 ಕಿ.ಮೀ.ಗೆ 200 ಗಿಡಗಳಂತೆ ಪ್ರತಿ ವರ್ಷ ಕನಿಷ್ಟವೆಂದರೂ 45-50 ಕಿ.ಮೀ ಗಿಡಗಳನ್ನು ರಸ್ತೆ ಬದಿಯಲ್ಲಿ ನೆಡಲಾಗುತ್ತದೆ. ಇದರ ಜತೆಗೆ ಹೆದ್ದಾರಿ ಸಮೀಪದ ಶಾಲಾ ಕಾಲೇಜು, ರೈತರ ಜಮೀನು, ಕೆರೆಗಳ ಸುತ್ತಮುತ್ತ ವರ್ಷಕ್ಕೆ ಕನಿಷ್ಠ 2 ಲಕ್ಷ ಗಿಡಗಳನ್ನು ಸಾಮಾಜಿಕ ಅರಣ್ಯ ಇಲಾಖೆ ವತಿಯಿಂದಲೇ ನೆಡಲಾಗುತ್ತದೆ. ಆದರೆ ಇಷ್ಟೊಂದು ಪ್ರಮಾಣದಲ್ಲಿ ನೆಟ್ಟ ಗಿಡಗಳಲ್ಲಿ ಶೇ.10ರಷ್ಟು ಗಿಡಗಳು ಜೀವಂತವಾಗಿ ಉಳಿದಿಲ್ಲ. ಆದರೆ ಅರಣ್ಯ ಇಲಾಖೆ ಅಧಿಕಾರಿಗಳು ಮಾತ್ರ ಪ್ರತಿ ವರ್ಷ ನಾಲ್ಕೈದು ಲಕ್ಷ ಗಿಡಗಳನ್ನು ನೆಡುತ್ತಿದ್ದು ಇದಕ್ಕೆ ಲಕ್ಷಾಂತರ ರೂ. ವ್ಯಯಿಸಲಾಗುತ್ತಿದೆ ಎಂದು ಮಾಹಿತಿ ನೀಡುತ್ತಿದ್ದಾರೆ. ದೊಡ್ಡಬಳ್ಳಾಪುರದ ಡಿ ಕ್ರಾಸ್‌, ನೆಲಮಂಗಲದ ಅರಿಶಿನಕುಂಟೆ, ದೇವನಹಳ್ಳಿಯ ವಿಜಯಪುರ ರಸ್ತೆಯಲ್ಲಿರುವ ನರ್ಸರಿಯಲ್ಲಿ ಗಿಡಗಳನ್ನು ಬೆಳೆಯಲಾಗುತ್ತಿದೆ. ಒಂದೊಂದು ನರ್ಸರಿಯಲ್ಲಿ ಕನಿಷ್ಟ 2 ಲಕ್ಷ ಸಸಿಗಳನ್ನು ಬೆಳೆಸಲಾಗುತ್ತದೆ. ಒಂದು ಸಸಿಗೆ ಕನಿಷ್ಟ 5-6 ರೂ. ಖರ್ಚು ತಗುಲುತ್ತದೆ. ಇವುಗಳಲ್ಲಿ ರೈತರು, ಸಾರ್ವಜನಿಕರಿಗೆ ಒಂದು ಸಸಿಗೆ 3 ರೂ.ನಂತೆ ಪ್ರತಿ ವರ್ಷ 2 ಲಕ್ಷ ಗಿಡಗಳನ್ನು ವಿತರಿಸಲಾಗುತ್ತದೆ. ಉಳಿದವುಗಳನ್ನು ಇಲಾಖೆ ಅಧಿಕಾರಿಗಳು ಹಾಗೂ ಸರಕಾರದ ನಾನಾ ಯೋಜನೆಗಳಡಿ ವಿತರಣೆ ಮಾಡಲಾಗುತ್ತದೆ ಎಂದು ಹೇಳುತ್ತಿದ್ದಾರೆ. ವಿಪರ್ಯಾಸ ಎಂದರೆ ಇಷ್ಟೊಂದು ಪ್ರಮಾಣದಲ್ಲಿ ಸಸಿಗಳನ್ನು ಬೆಳೆಸಿ ನೆಟ್ಟು ಪೋಷಿಸಿದರು ಜಿಲ್ಲೆಯಲ್ಲಿ ಸಸ್ಯ ಸಂಪತ್ತು ಮಾತ್ರ ಏರಿಕೆಯಾಗಿಲ್ಲ. ಅರಣ್ಯ ಪ್ರದೇಶದಲ್ಲಿ ಗಿಡ ನೆಡುವುದಕ್ಕೆ ನಮಗೆ ಅವಕಾಶವಿಲ್ಲ ಎಂದು ಸಾಮಾಜಿಕ ಅರಣ್ಯ ಇಲಾಖೆ ಅಧಿಕಾರಿಗಳು ವಾದಿಸುತ್ತಾರೆ, ಆದರೆ ರಸ್ತೆ ಬದಿ, ಶಾಲಾ ಕಾಲೇಜು, ಕೆರೆ ಕುಂಟ ನೆಟ್ಟ ಗಿಡಗಳಲ್ಲಿ ಎಷ್ಟು ಉಳಿದಿವೆ ಎಂಬುದರ ಲೆಕ್ಕ ನೀಡಲು ಮಾತ್ರ ಹಿಂದೇಟು ಹಾಕುತ್ತಿದ್ದಾರೆ. 18642.92 ಹೆಕ್ಟೇರ್‌ ಅರಣ್ಯ ಪ್ರದೇಶ2175.66 ಹೆಕ್ಟೇರ್‌ ಮೀಸಲು ಅರಣ್ಯ ಪ್ರದೇಶ ಸೇರಿದಂತೆ ಜಿಲ್ಲೆಯಲ್ಲಿ ಒಟ್ಟು 18642.92 ಹೆಕ್ಟೇರ್‌ ಅರಣ್ಯ ಪ್ರದೇಶವಿದೆ. ಇದರಲ್ಲಿ ದೊಡ್ಡಬಳ್ಳಾಪುರದಲ್ಲಿ ಅತಿ ಹೆಚ್ಚು ಅರಣ್ಯ ಪ್ರದೇಶವಿದ್ದರೆ ದೇವನಹಳ್ಳಿಯಲ್ಲಿಅತಿ ಕಡಿಮೆ ಅರಣ್ಯವಿದೆ. ದೇವನಹಳ್ಳಿಯಲ್ಲಿ 3105.46, ದೊಡ್ಡಬಳ್ಳಾಪುರದಲ್ಲಿ 7983.60, ಹೊಸಕೋಟೆಯಲ್ಲಿ 3626.25 ಮತ್ತು ನೆಲಮಂಗಲದಲ್ಲಿ 3927.61 ಹೆಕ್ಟೇರ್‌ ಅರಣ್ಯ ಪ್ರದೇಶ ಎಂದು ಗುರುತಿಸಲಾಗಿದೆ. ಇವುಗಳನ್ನು ನಾನಾ ಸೆಕ್ಷನ್‌ಗಳೆಂದು ವಿಂಗಡಿಸಲಾಗಿದ್ದು ಕೆಲವೆಡೆ ಮೀಸಲು ಅರಣ್ಯ ಪ್ರದೇಶವಾಗಿದೆ. ರಕ್ಷಣೆ ನಮ್ಮ ಹೊಣೆಯಲ್ಲರಸ್ತೆ ಬದಿ, ಸಾರ್ವಜನಿಕ ಸ್ಥಳಗಳಲ್ಲಿ ನೆಟ್ಟ ಗಿಡಗಳನ್ನು ರಕ್ಷಿಸುವುದು ಆಯಾ ಗ್ರಾಮ ಪಂಚಾಯಿತಿ ಮತ್ತು ಸಾರ್ವಜನಿಕರ ಕರ್ತವ್ಯವೇ ಹೊರತು ಸಾಮಾಜಿಕ ಅರಣ್ಯ ಇಲಾಖೆ ಜವಬ್ದಾರಿಯಲ್ಲ. ನೆಟ್ಟ ಗಿಡಗಳಲ್ಲಿಬಹಳಷ್ಟನ್ನು ದನ ಕರುಗಳು ತಿಂದರೆ ಮತ್ತಷ್ಟು ಗಿಡಗಳನ್ನು ಕಾಮಗಾರಿ ಹೆಸರಿನಲ್ಲಿನಾಶ ಮಾಡುತ್ತಾರೆ. ಹೀಗಾಗಿ ರಸ್ತೆ ಬದಿ ನೆಟ್ಟ ಗಿಡಗಳು ಕಾಣಸಿಗುವುದಿಲ್ಲ. ಆದರೆ ಡಿಸಿ ಕಚೇರಿ, ದೊಡ್ಡಬಳ್ಳಾಪುರದ ಮೊರಾರ್ಜಿ ದೇಸಾಯಿ ಹಾಸ್ಟೆಲ್‌ ಸಮೀಪ ನೆಟ್ಟ ಗಿಡಗಳು ಇನ್ನು ಜೀವಂತವಾಗಿವೆ ಎಂದು ಅಧಿಕಾರಿಗಳು ವಾದಿಸುತ್ತಾರೆ. ರಸ್ತೆ ಬದಿ ಪ್ರತಿ ವರ್ಷ ಸುಮಾರು 2 ಲಕ್ಷ ಗಿಡಗಳನ್ನು ನೆಡಲಾಗುತ್ತದೆ. ಆದರೆ ಗಿಡಗಳು ಕಾಣುತ್ತಿಲ್ಲ ಎಂದರೆ ಏನು ಮಾಡಲು ಸಾಧ್ಯ. ಜಮೀನಿನ ಬಳಿ, ಬಯಲು ಪ್ರದೇಶದಲ್ಲಿ ಗಿಡ ನೆಡಲು ಸಾರ್ವಜನಿಕರು ವಿರೋಧಿಸುತ್ತಾರೆ. - ಚಂದ್ರು, ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ, ಸಾಮಾಜಿಕ ಅರಣ್ಯ ಇಲಾಖೆ
from India & World News in Kannada | VK Polls https://ift.tt/2HP7PFf
