ಹೊಸದಿಲ್ಲಿ: ಸಾಕಷ್ಟು ಪೊಲೀಸ್‌ ಪಡೆಗಳು ದಿಲ್ಲಿಯಲ್ಲಿ ಕರ್ತವ್ಯ ನಿರತರಾಗಿವೆ. ಯಾರೂ ಭಯ ಪಡುವ ಅಗತ್ಯವಿಲ್ಲ ಎಂಬುದಾಗಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಖಾಸಗಿ ಸುದ್ದಿವಾಹಿನಿಗೆ ತಿಳಿಸಿದ್ದಾರೆ. ದಿಲ್ಲಿಯಲ್ಲಿ ಗಲಭೆ ಪೀಡಿತ ಪ್ರದೇಶಗಳಲ್ಲಿ ಪರಿಶೀಲನೆ ನಡೆಸಿದ ಬಳಿಕ ಅವರು ಈ ವಿವರಗಳನ್ನು ನೀಡಿದ್ದಾರೆ. ಭಾನುವಾರದಿಂದ ದಿಲ್ಲಿಯಲ್ಲಿ ನಡೆಯುತ್ತಿರುವ ಸಿಎಎ ಪರ ವಿರೋಧ ಗಲಭೆ ಕೋಮು ಸಂಘರ್ಷವಾಗಿ ತಿರುವು ಪಡೆದುಕೊಂಡಿದ್ದು, ಬುಧವಾರದ ವೇಳೆಗೆ 20 ಜನರು ಅಸು ನೀಗಿ 180ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಗಲಭೆ ಪೀಡಿತ ಪ್ರದೇಶಗಳಾದ ಸೀಲಾಂಪುರ, ಜಫ್ರಾಬಾದ್‌, ಮೌಜ್‌ಪುರ್‌ ಮತ್ತು ಗೋಕುಲ್‌ಪುರಿ ಚೌಕ್‌ ಮಂಗಳವಾರ ತಡ ರಾತ್ರಿ ಅವರು ಪರಿಶೀಲನೆ ನಡೆಸಿದ್ದಾರೆ. ಕಾನೂನು ಪಾಲನೆ ಮಾಡುವ ನಾಗರಿಕರಿಗೆ ಯಾವುದೇ ರೀತಿಯೊಂದಲೂ ತೊಂದರೆಯಾಗುವುದಿಲ್ಲ ಎಂಬುದಾಗಿ ಅವರು ಭರವಸೆ ನೀಡಿದ್ದಾರೆ.
ದಿಲ್ಲಿ ಪೊಲೀಸರ ಸಾಮರ್ಥ್ಯ ಮತ್ತು ಉದ್ದೇಶಗಳನ್ನು ಜನರು ಅನುಮಾನಿಸುತ್ತಿದ್ದಾರೆ. ಇದನ್ನು ಪರಿಹರಿಸಬೇಕಾಗಿದೆ. ಸಮವಸ್ತ್ರದಲ್ಲಿರುವ ಪೊಲೀಸರ ಮೇಲೆ ಜನ ನಂಬಿಕೆ ಇಡಬೇಕು ಎಂದು ಅವರು ಸಲಹೆ ನೀಡಿದ್ದಾರೆ. ಹಿಂಸಾಚಾರದ ವೇಳೆ ನಿಷ್ಕ್ರಿಯತೆ ತೋರಿದ, ಅಸಮರ್ಪಕವಾಗಿ ನಡೆದುಕೊಂಡ ಕಾರಣಕ್ಕೆ ಪೊಲೀಸರ ಮೇಲೆ ಕಟು ಟೀಕೆಗಳು ವ್ಯಕ್ತವಾಗಿವೆ. ಬುಧವಾರ ಸುಪ್ರೀಂ ಕೋರ್ಟ್‌ ಕೂಡ ಪೊಲೀಸರನ್ನು ತೀವ್ರ ತರಾಟೆಗೆ ತೆಗೆದುಕೊಂಡಿದೆ. ಇದರ ನಡುವೆಯೇ ಪೊಲೀಸರನ್ನು ನಂಬಬೇಕು ಎಂಬುದಾಗಿ ದೋವಲ್‌ ಹೇಳಿದ್ದಾರೆ. "ನಾಗರಿಕರಲ್ಲಿ ಅಭದ್ರತೆ ಇದೆ. ಎಲ್ಲಾ ಸಮುದಾಯಗಳಿಂದ ಭಯದ ಭಾವವನ್ನು ಹೋಗಲಾಡಿಸಲು ನಾವು ಬಯಸುತ್ತೇವೆ," ಎಂಬುದಾಗಿ ಅವರು ತಿಳಿಸಿದ್ದಾರೆ. ಎಲ್ಲಾ ದುಷ್ಕರ್ಮಿಗಳ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳಲಾಗುವುದು. ಕೈಯಲ್ಲಿ ಬಂದೂಕು ಹಿಡಿದು ದಿಲ್ಲಿ ಬೀದಿಯಲ್ಲಿ ಯಾರೂ ತಿರುಗಾಡಲು ಸಾಧ್ಯವಿಲ್ಲ ಎಂಬುದಾಗಿ ಅವರು ಎಚ್ಚರಿಕೆ ನೀಡಿದ್ದಾರೆ. ಆದರೆ ಅದಾಗಲೇ ಹತ್ತಾರು ಜನರು ಗುಂಡೇಟು ತಿಂದು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
from India & World News in Kannada | VK Polls https://ift.tt/2wOtpHE
