ಬೆಂಗಳೂರು: ಡಿಜಿಟಲೈಜೆಷನ್ನಿಂದ ಪ್ರಕಾಶಕರಿಗೆ ತೊಂದರೆ ಆಗುವುದಿಲ್ಲ. ಎಂದಿನಂತೆ ಪುಸ್ತಕಗಳನ್ನು ಇಲಾಖೆ ಕೊಂಡುಕೊಳ್ಳಲಿದೆ. ಪ್ರಕಾಶಕರ ಹಿತಕ್ಕೆ ಯಾವುದೇ ರೀತಿಯ ಧಕ್ಕೆ ಆಗದಂತೆ ನೋಡಿಕೊಳ್ಳಲಾಗುವುದು. ಕಾಲಕ್ಕೆ ತಕ್ಕಂತೆ ಬೆಳೆಯಬೇಕು ಮತ್ತು ಬದಲಾಗಬೇಕು. ಅದರಂತೆ ರಾಜ್ಯದಲ್ಲಿ ಡಿಜಿಟಲ್ ಗ್ರಂಥಾಲಯಗಳನ್ನು ಆರಂಭಿಸಲಾಗಿದೆ ಎಂದು ಶಿಕ್ಷಣ ಸಚಿವ ಎಸ್.ಸುರೇಶ್ ಕುಮಾರ್ ತಿಳಿಸಿದರು. ಸಾರ್ವಜನಿಕ ಗ್ರಂಥಾಲಯ ಇಲಾಖೆ ಬುಧವಾರ ಹಂಪಿನಗರದ ನಗರ ಕೇಂದ್ರ ಗ್ರಂಥಾಲಯದಲ್ಲಿ ಏರ್ಪಡಿಸಿದ್ದ ' ಡಿಜಿಟಲ್ ಗ್ರಂಥಾಲಯ, ಡಿಜಿಟಲ್ ಆ್ಯಪ್ ಹಾಗೂ ಪುಸ್ತಕ ಪ್ರದರ್ಶನ' ಉದ್ಘಾಟಿಸಿ ಮಾತನಾಡಿದ ಅವರು, ''ಗ್ರಂಥಾಲಯವನ್ನೇ ಓದುಗರ ಮನೆ ಬಾಗಿಲಿಗೆ ತರಲು ಡಿಜಿಟಲ್ ಆ್ಯಪ್ ವಿನ್ಯಾಸ ಮಾಡಲಾಗಿದೆ. ಎಲ್ಲ ಪುಸ್ತಕಗಳನ್ನು ಡಿಜಿಟಲ್ ಗ್ರಂಥಾಲಯದಲ್ಲಿ ಓದಬಹುದು. ಇತ್ತೀಚಿಗೆ ಮೊಬೈಲ್ನಲ್ಲಿಯೇ ಪತ್ರಿಕೆ ಓದುತ್ತಿದ್ದು, ಇನ್ನು ಮುಂದೆ ಪುಸ್ತಕ, ನಿಯತಕಾಲಿಕೆಗಳನ್ನು ಓದಬಹುದು'' ಎಂದರು. ''ರಾಜ್ಯದಲ್ಲಿ ಒಟ್ಟಾರೆ 272 ಗ್ರಂಥಾಲಯಗಳಿದ್ದು, ಸ್ಥಳೀಯರು ಮಾತ್ರ ಪುಸ್ತಕ ಓದಬೇಕಾಗಿತ್ತು. ಬಹುತೇಕರಿಗೆ ತಲುಪುತ್ತಿರಲಿಲ್ಲ. ಆದರೆ, ಡಿಜಿಟಲ್ ಆ್ಯಪ್ ಮತ್ತು ಗ್ರಂಥಾಲಯದಿಂದ 6 ಕೋಟಿ ಜನರಿಗೆ ಪುಸ್ತಕಗಳನ್ನು ಓದಿಸುವಂತಾಗಿದೆ. ಡಿಜಟಲಿಕರಣವಾದರೂ, ಕೈಯಲ್ಲಿ ಪುಸ್ತಕ ಹಿಡಿದು ಓದುವ ಸೊಬಗೇ ಚಂದ. ನನ್ನ ಬಳಿ 4 ಸಾವಿರ ಪುಸ್ತಕ ಗಳಿವೆ. ಶೀಘ್ರದಲ್ಲಿ ಕಾರ್ಯಕ್ರಮ ಆಯೋಜಿಸಿ ಗ್ರಂಥಾಲಯ ಕ್ಕೆ ಒದಗಿಸಲಾಗುವುದು'' ಎಂದು ಮಾಹಿತಿ ನೀಡಿದರು. ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ, ಶಿಕ್ಷಣ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಎಸ್.ಆರ್.ಉಮಾಶಂಕರ್ ಮಾತನಾಡಿ, ''ಜ್ಞಾನ ಪ್ರತಿಯೊಬ್ಬರಿಗೂ ತಲುಪಬೇಕು. ಬೆಂಗಳೂರು ಸ್ಟಾಟ್೯ಅಪ್ ಕೇಂದ್ರವಾಗಿದ್ದು, ಡಿಜಿಟಲ್ ಗ್ರಂಥಾಲಯ ಪ್ರತಿಗ್ರಾಮಕ್ಕೆ ತಲುಪಬೇಕು. ಮುಂದಿನ ವರ್ಷದೊಳಗೆ 216 ಗ್ರಂಥಾಲಯಗಳಿಗೂ ಡಿಜಟಲ್ ಗ್ರಂಥಾಲಯ ವಿಸ್ತರಿಸಲಾಗುವುದು. ಕನ್ನಡದಲ್ಲಿ ಮೌಲ್ಯಯುತ ಕೃತಿಗಳಿದ್ದು, ಅವುಗಳ ಪ್ರತಿಗಳು ಸಿಗುತ್ತಿಲ್ಲ. ಈ ನಿಟ್ಟಿನಲ್ಲಿ ಡಿಜಿಟಲ್ ಗ್ರಂಥಾಲಯ ಸಹಕಾರಿಯಾಗಿವೆ ಎಂದರು. ಸಾರ್ವಜನಿಕ ಗ್ರಂಥಾಲಯ ಇಲಾಖೆ ನಿರ್ದೇಶಕ ಡಾ. ಸತೀಶಕುಮಾರ್ ಎಸ್. ಹೊಸಮನಿ ಮಾತನಾಡಿ, ಗ್ರಂಥಗಳಿಂದ ಸಾಮಾಜಿಕ ಬದಲಾವಣೆ ಸಾಧ್ಯ. ಗ್ರಂಥಾಲಯ ನಾಡಿನ ಸಂಸ್ಕೃತಿಯ ಪ್ರತೀಕ. ಪ್ರಸ್ತುತ ಎಲ್ಲವೂ ಡಿಜಿಟಲ್ ಮಯವಾಗಿದ್ದು, ಇಲಾಖೆಯನ್ನು ಉತ್ತಮಗೊಳಿಸಲು ಡಿಜಿಟಲ್ ಗ್ರಂಥಾಲಯ ಪೂರಕವಾಗಿದೆ. ಆದ್ದರಿಂದ ರಾಜ್ಯದಲ್ಲಿರುವ 272 ಗ್ರಂಥಾಯಲಗಳನ್ನು ಡಿಜಿಟಲ್ ಗ್ರಂಥಾಲಯಗಳನ್ನಾಗಿ ಪರಿವರ್ತಿಸಲಾಗುವುದು ಎಂದರು. ಕಾರ್ಯಕ್ರಮದಲ್ಲಿ ಗ್ರಂಥಾಲಯ ಇಲಾಖೆಯ ನಿಕಟಪೂರ್ವ ಅಧ್ಯಕ್ಷ ರಾಜೇಂದ್ರ ಕುಮಾರ್, ಡಿಜಿಟಲ್ ಪೋರ್ಟಲ್ ಆರಂಭಿಸಿದ ವಾಣಿ, ಅಂಕಿತ ಪ್ರಕಾಶನದ ಪ್ರಕಾಶ್ ಕಂಬತ್ತಳ್ಳಿ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
from India & World News in Kannada | VK Polls https://ift.tt/32pXn0n
