ನವದೆಹಲಿ: ಅಮೆರಿಕ ಜನ ಸಾರ್ವಭೌಮ ಹಾಗೂ ಅದ್ಭುತ ಭಾರತದೊಂದಿಗೆ ಸದೃಢವಾಗಿ ನಿಲ್ಲುತ್ತಾರೆ. ಇದು ಮಹಾತ್ಮ ಗಾಂಧೀಯವರ ಕನಸಾಗಿತ್ತು. ಈ ವಾಕ್ಯಗಳು ರಾಜ್‌ಘಾಟ್‌ನ ಸಂದರ್ಶಕರ ಪುಸ್ತಕದಲ್ಲಿ ಅಮೆರಿಕ ಅಧ್ಯಕ್ಷ ಟ್ರಂಪ್‌ ಬರೆದ ವಾಕ್ಯಗಳು. ಸಾಬರಮತಿ ಆಶ್ರಮ, ತಾಜ್‌ಮಹಲ್‌ ಸಂದರ್ಶಕರ ಪುಸ್ತಕದಲ್ಲಿ ಬರೆದಿದ್ದ ಟ್ರಂಪ್‌ ರಾಜ್‌ಘಾಟ್‌ನಲ್ಲೂ ತಮ್ಮ ಅನಿಸಿಕೆಯನ್ನು ವಿಸಿಟರ್‌ ಪುಸ್ತಕದಲ್ಲಿ ಅಚ್ಚೊತ್ತಿದರು. ಎರಡು ದಿನ ಭಾರತ ಪ್ರವಾಸದಲ್ಲಿರುವ ಅಮೆರಿಕ ಅಧ್ಯಕ್ಷ ಇಂದು ರಾಜ್‌ಘಾಟ್‌ಗೆ ಭೇಟಿ ನೀಡಿ ಮಹಾತ್ಮ ಗಾಂಧೀಜಿ ಸಮಾಧಿಗೆ ನಮನ ಸಲ್ಲಿಸಿದರು. ರಾಷ್ಟ್ರಪತಿ ಭವನದಲ್ಲಿ ಆಯೋಜಿಸಿದ್ದ ಸ್ವಾಗತ ಕಾರ್ಯಕ್ರಮದ ಬಳಿಕ ನೇರವಾಗಿ ರಾಜ್‌ಘಾಟ್‌ಗೆ ಬಂದ ಟ್ರಂಪ್‌ ಹಾಗೂ ಮಿಲಾನಿಯಾ ಟ್ರಂಪ್‌ ಸಮಾಧಿಗೆ ಪುಷ್ಪನಮನ ಸಲ್ಲಿಸಿದರು. ಬಳಿಕ, ಟ್ರಂಪ್‌ ಹಾಗೂ ಮಿಲಾನಿಯಾಗೆ ಗಾಂಧಿ ಪ್ರತಿಮೆಯನ್ನು ಉಡುಗೊರೆಯಾಗಿ ನೀಡಲಾಯಿತು. ಇದಾದ ನಂತರ ಟ್ರಂಪ್‌ ದಂಪತಿ ರಾಜ್‌ಘಾಟ್‌ನಲ್ಲಿಯೇ ಗಿಡ ನೆಟ್ಟಿದ್ದು ವಿಶೇಷವಾಗಿತ್ತು. ಇಲ್ಲಿಂದ ನೇರವಾಗಿ ಹೈದರಾಬಾದ್‌ ಹೌಸ್‌ಗೆ ಟ್ರಂಪ್‌ ದಂಪತಿ ತೆರಳಿದರು. 2015ರಲ್ಲಿ ರಾಜಘಾಟ್‌ಗೆ ಅಂದಿನ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮಾ ಕೂಡ ಭೇಟಿ ನೀಡಿ, ಗಾಂಧೀಜಿ ಸ್ಮಾರಕಕ್ಕೆ ನಮನ ಸಲ್ಲಿಸಿದ್ದರು. ಇನ್ನು, ನಿನ್ನೆ ಸಾಬರಮತಿ ಆಶ್ರಮದಲ್ಲಿ ಇಂತಹ ಅದ್ಭುತ ಅವಕಾಶ ನೀಡಿದ್ದಕ್ಕೆ ಧನ್ಯವಾದಗಳು ಮೋದಿ ಎಂದು ಬರೆದಿದ್ದರೆ, ತಾಜಮಹಲ್‌ ಸ್ಫೂರ್ತಿದಾಯಕ ಇದು ವೈವಿಧ್ಯಮಯ ಸಂಸ್ಕೃತಿಯ ಸೌಂದರ್ಯ ಎಂದು ತಾಜಮಹಲ್‌ನಲ್ಲಿ ಟ್ರಂಪ್‌ ಬಣ್ಣಿಸಿದರು.
from India & World News in Kannada | VK Polls https://ift.tt/398nNq5
