ಕ್ರೈಸ್ಟ್‌ಚರ್ಚ್‌: ಟೀಮ್‌ ಇಂಡಿಯಾದ ಯುವ ಓಪನಿಂಗ್‌ ಬ್ಯಾಟ್ಸ್‌ಮನ್‌ ಪೃಥ್ವಿ ಶಾ ಗಾಯದ ಸಮಸ್ಯೆ ಕಾರಣ ಗುರುವಾರ ಟೀಮ್‌ ಇಂಡಿಯಾದ ನೆಟ್ಸ್‌ ಅಭ್ಯಾಸದಿಂದ ಹೊರಗುಳಿದಿದ್ದಾರೆ. ಎಡಗಾಲಿನ ಊತದ ಸಮಸ್ಯೆಗೆ ತುತ್ತಾಗಿರುವ ಪೃಥ್ವಿ, ಶನಿವಾರ (ಫೆ.29 ರಂದು) ಕ್ರೈಸ್ಟ್‌ಚರ್ಚ್‌ನ ಹ್ಯಾಗ್ಲೀ ಓವಲ್‌ ಕ್ರೀಡಾಂಗಣದಲ್ಲಿ ಶುರುವಾಗಲಿರುವ ಆತಿಥೇಯ ವಿರುದ್ಧದ ಎರಡನೇ ಪಂದ್ಯದದಲ್ಲಿ ಆಡುವುದು ಅನುಮಾನವಾಗಿದೆ. ಪೃಥ್ವಿ ದ್ವಿತೀಯ ಟೆಸ್ಟ್‌ ಆಡುತ್ತಾರೆಯೇ ಅಥವಾ ಇಲ್ಲವೇ ಎಂಬುದರ ಬಗ್ಗೆ ಅಂತಿಮ ತೀರ್ಮಾವನವನ್ನು ಶುಕ್ರವಾರ ತೆಗೆದುಕೊಳ್ಳಲಾಗುತ್ತದೆ ಎಂದು ತಂಡಕ್ಕೆ ಹತ್ತಿರದ ಮೂಲಗಳು ಪಿಟಿಐ ಸುದ್ದಿ ಸಂಸ್ಥೆಗೆ ತಿಳಿಸಿವೆ. ಪೃಥ್ವಿ ಪಂದ್ಯದಿಂದ ಹೊರಗುಳಿದರೆ ಯುವ ಆರಂಭಿಕ ಬ್ಯಾಟ್ಸ್‌ಮನ್‌ ಭಾರತ ಟೆಸ್ಟ್‌ ತಂಡಕ್ಕೆ ಪದರ್ಪಾಣೆ ಮಾಡುವ ಸಾಧ್ಯತೆ ಹೆಚ್ಚಿದೆ. ವೆಲ್ಲಿಂಗ್ಟನ್‌ನ ಬೇಸಿನ್‌ ರಿಸರ್ವ್‌ ಕ್ರೀಡಾಂಗಣದಲ್ಲಿ ನಡೆದ ಎರಡು ಟೆಸ್ಟ್‌ಗಳ ಸರಣಿಯ ಮೊದಲ ಪಂದ್ಯದಲ್ಲಿ ಭಾರತ ತಂಡ ಎರಡೂ ಇನಿಂಗ್ಸ್‌ಗಳಲ್ಲಿ 200 ರನ್‌ಗಳ ಗಡಿ ಮುಟ್ಟಲು ಸಾಧ್ಯವಾಗದೆ 10 ವಿಕೆಟ್‌ಗಳ ಹೀನಾಯ ಸೋಲುಂಡಿತು. ಈ ಮೂಲಕ ಐಸಿಸಿ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಪಟ್ಟಿಯಲ್ಲಿ ಮೊದಲ ಸೋಲಿನ ಆಘಾತಕ್ಕೂ ಒಳಗಾಯಿತು. ಶಾ ಆಡುವ ಬಗ್ಗೆ ಶುಕ್ರವಾರ ತೀರ್ಮಾನ21 ವರ್ಷದ ಯುವ ಬಲಗೈ ಬ್ಯಾಟ್ಸ್‌ಮನ್‌ ಪೃಥ್ವಿ ಶಾ, ಮೊದಲ ಟೆಸ್ಟ್‌ನ ಎರಡೂ ಇನಿಂಗ್ಸ್‌ಗಳಲ್ಲಿ ಉತ್ತಮ ಆರಂಭ ಪಡೆದರಾದರೂ (16 ಮತ್ತು 14 ರನ್‌) ಅದನ್ನು ದೊಡ್ಡ ಮೊತ್ತವಾಗಿ ಪರಿವರ್ತಿಸುವಲ್ಲಿ ವಿಫಲರಾದರು. ಇದೀಗ ಶುಕ್ರವಾರ ಭಾರತ ತಂಡ ಮತ್ತೊಮ್ಮೆ ನೆಟ್ಸ್‌ ಅಭ್ಯಾಸ ನಡೆಸಲಿದ್ದು, ಬ್ಯಾಟಿಂಗ್‌ ವೇಳೆ ಶಾ ಯಾವುದೇ ತೊಂದರೆಗಳಿಲ್ಲದೆ ಆಡಿದರಷ್ಟೇ ಅವರಿಗೆ 2ನೇ ಟೆಸ್ಟ್‌ನ ಪ್ಲೇಯಿಂಗ್‌ ಇಲೆವೆನ್‌ನಲ್ಲಿ ಸ್ಥಾನ ಸಿಗಲಿದೆ. ಇಲ್ಲವಾದರೆ ಗಿಲ್‌ಗೆ ಪದಾರ್ಪಣೆಯ ಭಾಗ್ಯ ಒಲಿಯಲಿದೆ. ಮತ್ತೊಂದೆಡೆ ಗುರುವಾರ ನಡೆದ ನೆಟ್ಸ್‌ ಅಭ್ಯಾಸದಲ್ಲಿ ಗಿಲ್‌ ಭರ್ಜರಿಯಾಗಿ ಬ್ಯಾಟ್‌ ಬೀಸಿ ಗಮನ ಸೆಳೆದಿದ್ದಾರೆ. ಈ ವೇಳೆ ಕೋಚ್‌ ರವಿ ಶಾಸ್ತ್ರಿ ಗಿಲ್‌ ಅವರ ಬ್ಯಾಟಿಂಗ್‌ ಕಡೆಗೆ ಹದ್ದಿನ ಕಣ್ಣಿಟ್ಟಿದ್ದರು. ಅಷ್ಟೇ ಅಲ್ಲದೆ ಅವರ ತಂತ್ರಗಾರಿಕೆ ಕಡೆಗೆ ಕೆಲ ಉಪಯುಕ್ತ ಸಲಹೆಗಳನ್ನು ಹಂಚಿಕೊಂಡಿದ್ದಾರೆ. ಆದರೆ, ಶಾ ಗಾಯದ ಸಮಸ್ಯೆ ಅಷ್ಟು ಗಂಭೀರವಾಗಿರದಿರಲಿ ಎಂಬುದು ಮ್ಯಾನೇಜ್ಮೆಂಟ್‌ನ ಆಶಯ. ಏಕೆಂದರೆ ಕ್ಯಾಪ್ಟನ್‌ ವಿರಾಟ್‌ ಕೊಹ್ಲಿ, ಯುವ ಬ್ಯಾಟ್ಸ್‌ಮನ್‌ ಪೃಥ್ವಿ ಶಾ ಮೇಲೆ ತಮಗೆ ಅಪಾರ ನಂಬಿಕೆ ಇದೆ ಎಂದು ಹೇಳಿಕೊಂಡಿದ್ದಾರೆ. ಅವರ ತಂತ್ರಗಾತಿಕೆ ಮತ್ತು ಸ್ಫೋಟಕ ಬ್ಯಾಟಿಂಗ್‌ ಬಗ್ಗೆ ವಿಶ್ವಾಸವಿದೆ ಎಂದು ಕೊಹ್ಲಿ ಹೇಳಿದ್ದು, ಶಾ ಸಂಪೂರ್ಣ ಫಿಟ್‌ ಆದರೆ ತಂಡದ ಪ್ಲೇಯಿಂಗ್‌ ಇಲೆವೆನ್‌ನಲ್ಲಿ ಆಡಿಸುವುದು ಖಚಿತವಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/32thc6Y
