ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ (ಸಿಎಎ) ಪರ-ವಿರೋಧ ಸಂಘರ್ಷದಲ್ಲಿ ಭುಗಿಲೆದ್ದ ಹಿಂಸಾಚಾರ ಮತ್ತಷ್ಟು ತೀವ್ರ ಸ್ವರೂಪ ಪಡೆದುಕೊಂಡಿದೆ. 48 ಗಂಟೆಗಳಲ್ಲಿ ಗಲಭೆಯಲ್ಲಿ ಮೃತಪಟ್ಟವರ ಸಂಖ್ಯೆ 13ಕ್ಕೆ ಏರಿಕೆಯಾಗಿದೆ. 1 ತಿಂಗಳ ಕಾಲ 144 ಸೆಕ್ಷನ್ ಜಾರಿ ಮಾಡಲಾಗಿದೆ. ಜೊತೆಗೆ ಕಂಡಲ್ಲಿ ಗುಂಡಿಗೆ ಆದೇಶ ಹೊರಡಿಸಲಾಗಿದೆ. ಕಲ್ಲುತೂರಾಟ, ವಾಹನಗಳು ಮತ್ತು ಅಂಗಡಿ ಮುಂಗಟ್ಟುಗಳಿಗೆ ಬೆಂಕಿ, ಪರಸ್ಪರ ಗುಂಡಿನ ದಾಳಿಗಳಿಂದಾಗಿ ಮಂಗಳವಾರ ದಿನವಿಡೀ ತೀವ್ರ ಪ್ರಕ್ಷುಬ್ಧ ಪರಿಸ್ಥಿತಿ ನೆಲೆಸಿತ್ತು. ಸೋಮವಾರ ಹಿಂಸಾಚಾರದಲ್ಲಿ ಒಬ್ಬ ಪೇದೆ ಸೇರಿ ನಾಲ್ಕು ಮಂದಿ ಬಲಿಯಾಗಿದ್ದರು. ಇದುವರೆಗೂ ಹಿಂಸಾಚಾರದಲ್ಲಿ 200ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಮೌಜ್‌ಪುರ, ಜಫರಾಬಾದ್‌, ಯಮುನಾ ವಿಹಾರ್‌, ವಿಜಯ್‌ ಪಾರ್ಕ್, ಚಾಂದ್‌ಭಾಗ್‌, ಭಜನ್‌ಪುರ, ಖಜೂರಿ ಖಾಸ್‌ ಸೇರಿ ಕೆಲವು ಪ್ರದೇಶಗಳಲ್ಲಿ ದೊಂಬಿಕೋರರ ಕಿಚ್ಚಿಗೆ ಹಲವು ವಾಹನಗಳು ಹಾಗೂ ಅಂಗಡಿಗಳು ಆಹುತಿಯಾಗಿವೆ. ರಸ್ತೆಗಳು ಬಂದ್ ಆಗಿದ್ದು ಕೆಲವೆಡೆ ಸಂಚಾರ ಕಡಿತಗೊಂಡಿದೆ. ಪ್ರತಿಭಟನಾಕಾರರ ನಿಯಂತ್ರಣಕ್ಕೆ ಪೊಲೀಸರು ಅಶ್ರುವಾಯು ಪ್ರಯೋಗ ಮಾಡಿದ್ದಾರೆ. ಅಜಿತ್ ದೋವಲ್ ಭೇಟಿ ಇನ್ನು ಮಂಗಳವಾರ ತಡರಾತ್ರಿ ಸೀಲಂಪುರದಲ್ಲಿ ಈಶಾನ್ಯ ದೆಹಲಿಯ ಡೆಪ್ಯೂಟಿ ಕಮೀಷನರ್ರನ್ನು ಭೇಟಿ ಮಾಡಿರುವ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಕಾನೂನು ಸುವ್ಯವಸ್ಥೆ ಹಾಗೂ ಭದ್ರತಾ ಸ್ಥಿತಗತಿಯ ಬಗ್ಗೆ ಮಾಹಿತಿ ಪಡೆದುಕೊಂಡು ಅಲ್ಲಿಂದ ತೆರಳಿದ್ದಾರೆ ಎಂದು ವರದಿ ತಿಳಿಸಿದೆ. ವಿಶೇಷ ಪೊಲೀಸ್ ಆಯುಕ್ತರನ್ನು ನೇಮಿಸಿದ ಸರಕಾರ! ಈಶಾನ್ಯ ದೆಹಲಿಯಲ್ಲಾದ ಹಿಂಸಾಚಾರವನ್ನು ತಡೆಯುವಲ್ಲಿ ದೆಹಲಿ ಪೊಲೀಸರು ವಿಫಲರಾದ ಕಾರಣ. ಸರಕಾರ ಏಕಾಏಕಿ 1985ರ ಬ್ಯಾಚ್ನ ಐಪಿಎಸ್ ಆಫೀಸರ್ ಎಸ್. ಎನ್. ಶ್ರೀವಾಸ್ತವ್ ಅವರನ್ನು ವಿಶೇಷ ಪೊಲೀಸ್ ಆಯುಕ್ತರನ್ನಾಗಿ ನೇಮಕ ಮಾಡಿ ಆದೇಶ ಹೊರಡಿಸಿದೆ. ಸಿಆರ್ಪಿಎಫ್ನಲ್ಲಿ ಡೈರೆಕ್ಟರ್ ಜನರಲ್ ಆಗಿ ಕೆಲಸ ಮಾಡಿ ಅನುಭವಹೊಂಡಿರುವ ಶ್ರೀವಾಸ್ತವ್ ಅವರು ದೆಹಲಿ ಪೊಲೀಸ್ನ ಹಲವು ವಿಭಾಗಗಳಲ್ಲಿ ಕೆಲಸ ಮಾಡಿದ ಅನುಭವ ಹೊಂದಿದ್ದಾರೆ. ವಿಶೇಷ ಆಯುಕ್ತರಾಗಿ ನೇಮಕವಾದ ಬೆನ್ನಲ್ಲೇ ಕಂಡಲ್ಲಿ ಗುಂಡಿಗೆ ಆದೇಶ ಹೊರಡಿಸಿದ್ದಾರೆ. ರಜೆ ಮುಂದುವರಿಕೆ ಗಲಭೆ ಹಿನ್ನೆಲೆಯಲ್ಲಿಈಶಾನ್ಯ ದಿಲ್ಲಿಯಲ್ಲಿ ಬುಧವಾರವೂ ಶಾಲಾ ಕಾಲೇಜುಗಳಿಗೆ ರಜೆ ಮುಂದುವರಿಸಲಾಗಿದ್ದು, ಪರೀಕ್ಷೆಗಳನ್ನು ಮುಂದೂಡಲಾಗಿದೆ. ಸಿಬಿಎಸ್ಇ ಪರೀಕ್ಷೆಯನ್ನೂ ಮುಂದೂಡಲಾಗಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ದಿಲ್ಲಿ ಭೇಟಿ ಸಂದರ್ಭದಲ್ಲೇ ಹಿಂಸಾಚಾರ ನಡೆದಿರುವುದು ಸರಕಾರಕ್ಕೆ ಮುಜುಗರ ತಂದಿದೆ. ಸಿಖ್‌ ವಿರೋಧಿ ಗಲಭೆಯ ಬಳಿಕ ಹಲವು ದಶಕಗಳಲ್ಲಿ ರಾಜಧಾನಿ ದಿಲ್ಲಿಇಷ್ಟು ತೀವ್ರ ಪ್ರಮಾಣದ ಹಿಂಸಾಚರಕ್ಕೆ ಸಾಕ್ಷಿಯಾಗಿದ್ದು ಇದೇ ಮೊದಲು. ಪರಿಸ್ಥಿತಿ ಗಂಭೀರವಾದ ಹಿನ್ನೆಲೆಯಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಕೇರಳ ಪ್ರವಾಸ ಮುಂದೂಡಿದ್ದಾರೆ. ದೆಹಲಿ ಸಿಎಂ ಅರವಿಂದ ಕೇಜ್ರಿವಾಲ್ ಹಾಗೂ ಭದ್ರತಾ ಅಧಿಕಾರಿಗಳೊಂದಿಗೆ ಸರಣಿ ಸಭೆಗಳನ್ನು ನಡೆಸಿದ್ದಾರೆ.
from India & World News in Kannada | VK Polls https://ift.tt/32pUpZA
