ಹೊಸದಿಲ್ಲಿ: ನಾಯಕತ್ವದಲ್ಲಿ ಆಡಿದ ಬೌಲರ್‌ಗಳೆಲ್ಲಾ ಕ್ಯಾಪ್ಟನ್‌ ಕೂಲ್‌ ನಾಯಕತ್ವದ ಗುಣಗಳನ್ನು ಹಾಡಿ ಹೊಗಳುತ್ತಾರೆ. ಇದಕ್ಕೆ ಅಸಲಿ ಕಾರಣ ಏನೆಂಬುದನ್ನು ಇತ್ತೀಚೆಗಷ್ಟೇ ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ಘೋಷಿಸಿದ ಎಡಗೈ ಸ್ಪಿನ್ನರ್‌ ವಿವರಿಸಿದ್ದಾರೆ. 'ಧೋನಿ ಬೌಲರ್‌ಗಳ ನಾಯಕ', ವಿಕೆಟ್‌ ಪಡೆಯಲು ಬೌಲರ್‌ಗಳಿಗೆ ಬೇಕಿರುವ ಬೆಂಬಲವನ್ನು ಅರಿತುಕೊಳ್ಳುವ ಸಾಮರ್ಥ್ಯ ಅವರಲ್ಲಿದೆ ಎಂದು ಪ್ರಜ್ಞಾನ್‌ ಓಜಾ ಹೇಳಿದ್ದಾರೆ. ಹೀಗಾಗಿ ಡ್ರೆಸಿಂಗ್‌ ರೂಮ್‌ನಲ್ಲಿ ಬೌಲರ್‌ಗಳಿಂದ ಧೋನಿಗೆ ಅಪಾರ ಗೌರವ ಲಭ್ಯವಾಗುತ್ತಿತ್ತು ಎಂದಿದ್ದಾರೆ. ತಂಡದ ಬೌಲಿಂಗ್‌ ವಿಭಾಗದವನ್ನು ಅತ್ಯುತ್ತಮ ರೀತಿಯಲ್ಲಿ ಅವರು ನಿಭಾಯಿಸುತ್ತಿದ್ದರು ಎಂದು ಹೇಳಿದ್ದಾರೆ. "ಅವರು (ಧೋನಿ) ಬೌಲರ್‌ಗಳ ನಾಯಕ. ಒಬ್ಬ ಬೌಲರ್‌ಗೆ ತನನ್ನು ಅರ್ಥಮಾಡಿಕೊಳ್ಳುವ ನಾಯಕನನ್ನು ಬಯಸುತ್ತಾನೆ. ಬಹುತೇಕ ಎಲ್ಲ ಬೌಲರ್‌ಗಳು ಧೋನಿಯನ್ನು ಹೊಗಳುವುದೇಕೆಂದರೆ, ಅವರು ಬೌಲರ್‌ಗಳ ಮುಂದೆ ಹಲವು ದೃಷ್ಟಿಕೋನಗಳನ್ನು ಇಡುತ್ತಾರೆ. ಜೋತೆಗೆ ಫೀಲ್ಡರ್‌ಗಳನ್ನು ಎಲ್ಲಿ ನಿಲ್ಲಿಸಬೇಕು ಎಂಬುದರ ಕಡೆಗೂ ಅದ್ಭುತ ಸಲಹೆಗಳನ್ನು ನೀಡುತ್ತಾರೆ. ಒತ್ತಡದ ಪಂದ್ಯಗಳಲ್ಲೂ ನಮ್ಮಲ್ಲಿ ಸ್ಪಷ್ಟತೆ ಮೂಡುವಂತೆ ಮಾಡುತ್ತಾರೆ," ಎಂದು ಓಜಾ ವಿವರಿಸಿದ್ದಾರೆ. ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್‌ ಪರ ಆಡಿರುವ 33 ವರ್ಷದ ಎಡಗೈ ಸ್ಪಿನ್ನರ್‌ ಪ್ರಜ್ಞಾನ್‌, ಮುಂಬೈ ತಂಡದ ನಾಯಕ ರೋಹಿತ್‌ ಶರ್ಮಾ ಕೂಡ ಬೌಲರ್‌ಗಳ ನಾಯಕ ಎಂದು ಹೇಳಿಕೊಂಡಿದ್ದಾರೆ. ಧೋನಿ ನಾಯಕತ್ವದಲ್ಲಿ ತವರನಿಂಗಣದಲ್ಲಿ ಮಿಂಚಿದ್ದ ಪ್ರಜ್ಞಾನ್‌ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಭಾರತ ತಂಡದ ಪ್ರಮುಖ ವಿಕೆಟ್‌ ಟೇಕರ್‌ ಆಗಿದ್ದರು. ಆದರೆ, ವಿದೇಶದಲ್ಲಿ ಅವರಿಗೆ ಆಡುವ ಹೆಚ್ಚು ಅವಕಾಶಗಳು ಲಭ್ಯವಾಗಿರಲಿಲ್ಲ. ಇದೊಂದೇ ಅವರ ವೃತ್ತಿ ಬದುಕಿನಲ್ಲಿ ಕಾಣಿಸಿಕೊಂಡ ಕೊರತೆಯಾಗಿದೆ. "ಪ್ರತಿಯೊಬ್ಬ ಕ್ರಿಕೆಟಿಗನಿಗೂ ವಿದೇಶಿ ಪಿಚ್‌ಗಳಲ್ಲಿ ತನ್ನ ಸಾಮರ್ಥ್ಯ ಪರೀಕ್ಷಿಸಿಕೊಳ್ಳುವ ಬಯಕೆ ಇರುತ್ತದೆ. ಬ್ಯಾಟ್ಸ್‌ಮನ್‌ಗಳಿಗೆ ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ಇಂಗ್ಲೆಂಡ್‌ನಲ್ಲಿ ಹೋಗಿ ಆಡಬೇಕೆಂಬ ಬಯಕೆ ಇರುತ್ತದೆ. ಗೌತಮ್‌ ಗಂಭೀರ್‌ ಮತ್ತು ವಿವಿಎಸ್‌ ಲಕ್ಷ್ಮಣ್‌ ಅವರಂತಹ ಬ್ಯಾಟ್ಸ್‌ಮನ್‌ಗಳು ಕೂಡ ನನ್ನ ಬಳಿ ಈ ವಿಚಾರ ಚರ್ಚಿಸಿದ್ದಾರೆ. ನಮಗೆ ವಿರುದ್ಧದ ವಾತಾವರಣದಲ್ಲಿ ಆಡುವುದೇ ನೈಜ ಸವಾಲಾಗಿರುತ್ತದೆ. ಹೀಗಾಗಿ ನನಗೂ ವಿದೇಶಿ ಪಿಚ್‌ಗಳಲ್ಲಿ ಯಶಸ್ಸು ಗಳಿಸಬೇಕು ಎಂಬ ಬಯಕೆಯಿತ್ತು," ಎಂದು ಓಜಾ ಹೇಳಿದ್ದಾರೆ. ಭಾರತ ತಂಡದ ಪರ 24 ಟೆಸ್ಟ್‌ ಪಂದ್ಯಗಳನ್ನು ಆಡಿರುವ ಓಜಾ 113 ವಿಕೆಟ್‌ಗಳನ್ನು ಪಡೆದಿದ್ದಾರೆ. 47ಕ್ಕೆ 6 ವಿಕೆಟ್‌ ಪಡೆದಿರುವುದು ಅವರ ಶ್ರೇಷ್ಠ ಬೌಲಿಂಗ್‌ ಸಾಧನೆಯಾಗಿದ್ದು, ಒಟ್ಟು 7 ಬಾರಿ ಇನಿಂಗ್ಸ್‌ ಒಂದರಲ್ಲಿ ಐದು ವಿಕೆಟ್‌ ಪಡೆದ ಸಾಧನೆ ಮಾಡಿದ್ದಾರೆ. ಏಕದಿನ ಕ್ರಿಕೆಟ್‌ನಲ್ಲೂ 18 ಪಂದ್ಯಗಳಿಂದ 21 ವಿಕೆಟ್‌ ಪಡೆದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/38YRl9u
