ಮುಂಬೈ: ದೆಹಲಿ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ಅಧಿನಾಯಕಿ ಸೋನಿಯಾ ಗಾಂಧಿ ಗೃಹ ಸಚಿವ ಅವರ ರಾಜೀನಾಮೆ ಕೇಳಿದ ಬೆನ್ನಲ್ಲೇ, ಈಗ ಅಮಿತ್‌ ಶಾ ಮತ್ತು ಕೇಂದ್ರ ಸರಕಾರದ ವಿರುದ್ಧ ಬಿಜೆಪಿಯ ಮಾಜಿ ಮಿತ್ರಪಕ್ಷ ಕತ್ತಿ ಮಸೆದಿದೆ. ಈಶಾನ್ಯ ದೆಹಲಿಯಲ್ಲಿ ನಡೆದ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಕೇಂದ್ರದ ವಿರುದ್ಧ ಶಿವಸೇನೆ ವಾಗ್ದಾಳಿ ನಡೆಸಿದೆ. ಶಿವಸೇನೆ ಮುಖವಾಣಿ ಪತ್ರಿಕೆಯ ಸಂಪಾದಕೀಯದಲ್ಲಿ ದೆಹಲಿ ಗಲಭೆ ಬಗ್ಗೆ ಬರೆಯಲಾಗಿದ್ದು, ದೆಹಲಿ ಹೊತ್ತಿ ಉರಿಯುತ್ತಿದ್ದರೆ ಗೃಹ ಸಚಿವ ಅಮಿತ್‌ ಶಾ ಎಲ್ಲೂ ಕಾಣಲಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದೆ. ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್‌ ದೋವಲ್‌ ರಸ್ತೆಗಿಳಿದು ಜನರೊಂದಿಗೆ ಸಭೆ ನಡೆಸಿದ್ದು ಕಂಡುಬಂತು. ಆದರೆ, ದೆಹಲಿ ಚುನಾವಣೆಯಲ್ಲಿ ಕರಪತ್ರ ಹಂಚಿದ್ದ ಗೃಹಸಚಿವ ಅಮಿತ್‌ ಶಾರನ್ನು ಎಲ್ಲಾದರೂ ಕಂಡ್ರಾ..? ಎಂದು ಸಾಮ್ನಾ ಪ್ರಶ್ನೆ ಮಾಡಿದೆ. ಬಿಜೆಪಿಯ ಕಡು ರಾಷ್ಟ್ರೀಯತೆ ಹಾಗೂ ಕೋಮುವಾದ ದೇಶವನ್ನು 100 ವರ್ಷ ಹಿಂದಕ್ಕೆ ತೆಗೆದುಕೊಂಡು ಹೋಗಿದೆ. ದೆಹಲಿ ಹೊತ್ತಿ ಉರಿಯುತ್ತಿದ್ದರೆ ಮೋದಿ ಸರಕಾರ ಅಹಮದಾಬಾದ್‌ನಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಎದುರು ಕೈಕಟ್ಟಿ ನಿಂತಿತ್ತು ಎಂದು ಶಿವಸೇನೆ ಹೇಳಿದೆ. ಇನ್ನು, ದೆಹಲಿ ಹೈಕೋರ್ಟ್‌ ನ್ಯಾಯಮೂರ್ತಿ ವರ್ಗಾವಣೆ ಬಗ್ಗೆಯು ಸಾಮ್ನಾದಲ್ಲಿ ಬರೆಯಲಾಗಿದ್ದು, ಕೇಂದ್ರದ ನಡೆಯನ್ನು ಶಿವಸೇನೆ ಟೀಕಿಸಿದೆ. ಕೇಂದ್ರ ಸಚಿವ ಅನುರಾಗ್‌ ಠಾಕೂರ್‌, ಸಂಸದ ಪರ್ವೇಶ್‌ ವರ್ಮಾ ಮತ್ತು ಕಪಿಲ್‌ ಮಿಶ್ರಾ ಅವರ ವಿರುದ್ಧ ಎಫ್‌ಐಆರ್‌ ದಾಖಲಿಸಲು ಆದೇಶ ನೀಡಿದ್ದಕ್ಕೆ ನ್ಯಾ.ಮುರಳೀಧರ್‌ ಅವರಿಗೆ ಕೇಂದ್ರ ವರ್ಗಾವಣೆ ಶಿಕ್ಷೆ ನೀಡಿದೆ ಎಂದು ಹೇಳಿದೆ. ಈಶಾನ್ಯ ದೆಹಲಿಯಲ್ಲಿ ಸಿಎಎ ಪರ-ವಿರೋಧಿ ಗುಂಪುಗಳ ನಡುವೆ ಭಾನುವಾರದಿಂದ 4 ದಿನ ನಡೆದ ಹಿಂಸಾಚಾರದಲ್ಲಿ ಪೊಲೀಸ್‌ ಪೇದೆ ಹಾಗೂ ಐಬಿ ಅಧಿಕಾರಿ ಸೇರಿ 38 ಜನ ಸಾವನ್ನಪ್ಪಿದ್ದರು. ಗಲಭೆಯಲ್ಲಿ 200ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದು, ಈಶಾನ್ಯ ದೆಹಲಿಯಲ್ಲಿ 1 ತಿಂಗಳು ಕಾಲ ನಿಷೇಧ ಹೇರಲಾಗಿದೆ. ಗಲಭೆಗೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ಅಧಿನಾಯಕಿ ಸೋನಿಯಾ ಗಾಂಧಿ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ರಾಜೀನಾಮೆಗೆ ಆಗ್ರಹಿಸಿದ್ದರು. ಅದಲ್ಲದೇ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಅವರನ್ನು ಕಾಂಗ್ರೆಸ್‌ ನಿಯೋಗ ಭೇಟಿಯಾಗಿ ಹಿಂಸಾಚಾರದ ಬಗ್ಗೆ ದೂರು ಸಲ್ಲಿಸಿತ್ತು.
from India & World News in Kannada | VK Polls https://ift.tt/3cpBhjc
