ಬೆಂಗಳೂರು: ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ಭಾರತ ತಂಡದ ಮಾಜಿ ನಾಯಕ ಅವರ ಪುತ್ರ ಸಮಿತ್ ದ್ರಾವಿಡ್, 14 ವರ್ಷದೊಳಗಿನವರ ಬಿಟಿಆರ್‌ ಶೀಲ್ಡ್‌ ಕ್ರಿಕೆಟ್ ಟೂರ್ನಿಯಲ್ಲಿ ಅಕ್ಷರಶಃ ರನ್‌ ಹೊಳೆ ಹರಿಸಿದ್ದಾರೆ. ಕಳೆದ ಎರಡು ತಿಂಗಳ ಅವಧಿಯಲ್ಲಿ ಎರಡು ದ್ವಿಶತಕಗಳನ್ನು ಬಾರಿಸಿ ಮಿಂಚಿರುವ ಸಮಿತ್ ದ್ರಾವಿಡ್, ಇದೀಗ ಬಿಟಿಆರ್‌ ಶೀಲ್ಡ್‌ ಕ್ರಿಕೆಟ್ ಟೂರ್ನಿಯಲ್ಲಿ ಆಡಿದ 5 ಇನಿಂಗ್ಸ್‌ಗಳಿಂದ 681 ರನ್‌ ಬಾರಿಸುವ ಮೂಲಕ ತಮ್ಮ ಮಲ್ಯ ಅದಿತಿ ಅಂತಾರಾಷ್ಟ್ರೀಯ ಶಾಲಾ ತಂಡವನ್ನು ಸೆಮಿಫೈನಲ್‌ಗೆ ಮುನ್ನಡೆಸಿದ್ದಾರೆ. ಅಂದಹಾಗೆ ಕ್ರಿಕೆಟ್ ದಿಗ್ಗಜರ ಮಕ್ಕಳು ಕ್ರಿಕೆಟಿಗರಾಗಿ ಮಿಂಚಿದ ಉದಾಹರಣೆಗಳು ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಬಹಳ ಕಡಿಮೆ. ಸುನಿಲ್‌ ಗವಾಸ್ಕರ್‌ ಅವರ ಪುತ್ರ ರೋಹನ್‌ ಗವಾಸ್ಕರ್‌ ಮತ್ತು ರೋಜರ್‌ ಬಿನ್ನಿ ಅವರ ಮಗ ಸ್ಟುವರ್ಟ್‌ ಬಿನ್ನಿ ಭಾರತ ತಂಡವನ್ನು ಪ್ರತಿನಿಧಿಸಿದರಾದರೂ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಲಿಲ್ಲ. ಇದೀಗ ಸಚಿನ್‌ ತೆಂಡೂಲ್ಕರ್‌ ಅವರ ಪುತ್ರ ಅರ್ಜುನ್‌ ತೆಂಡೂಲ್ಕರ್‌ ಕ್ರಿಕೆಟ್‌ನಲ್ಲಿ ತಮ್ಮದೇ ಛಾಪು ಮೂಡಿಸುವ ಪ್ರಯತ್ನ ನಡೆಸುತ್ತಿದ್ದಾರೆ. ಇದರಲ್ಲಿ ಎಷ್ಟರ ಮಟ್ಟಿಗೆ ಯಶಸ್ಸು ಗಳಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕು. ಮತ್ತೊಂದೆಡೆ ಸದ್ದಿಲ್ಲದಂತೆ ರಾಹುಲ್‌ ದ್ರಾವಿಡ್ ಅವರ ಪುತ್ರ ಕೂಡ ಕ್ರಿಕೆಟ್ ಲೋಕದಲ್ಲಿ ಗರಿಗೆದುರುತ್ತಿದ್ದು, 14 ವರ್ಷದೊಳಗಿನವರ ಕ್ರಿಕೆಟ್‌ನಲ್ಲಿ ಭರ್ಜರಿ ಆಟವಾಡಿ ಭವಿಷ್ಯದ ತಾರೆ ಎಂಬ ಭರವಸೆ ಮೂಡಿಸಿದ್ದಾರೆ. ಕೆಎಸ್‌ಸಿಎ ಬಿಟಿಆರ್‌ ಶೀಲ್ಡ್‌ ಕ್ರಿಕೆಟ್ ಟೂರ್ನಿಯಲ್ಲಿ ಸಮಿತ್ ದ್ರಾವಿಡ್ ಸದ್ಯ ಅತ್ಯಧಿಕ ರನ್‌ ಗಳಿಸಿದ ಬ್ಯಾಟ್ಸ್‌ಮನ್‌. ಮಲ್ಯಾ ಅದಿತಿ ಅಂತಾರಾಷ್ಟ್ರೀಯ ಶಾಲಾ ತಂಡದ ಪರ ಅಬ್ಬರಿಸುತ್ತಿರುವ ಸಮಿತ್, ಐದು ಇನಿಂಗ್ಸ್‌ಗಳಲ್ಲಿ 681 ರನ್‌ಗಳನ್ನು ಬಾರಿಸಿದ್ದಾರೆ. ಇದರಲ್ಲಿ 144 ಎಸೆತಗಳಲ್ಲಿ 221* ರನ್‌ ಗಳಿಸಿರುವುದು ಅವರ ಶ್ರೇಷ್ಠ ಬ್ಯಾಟಿಂಗ್‌ ಸಾಧನೆಯಾಗಿದೆ. ಬಿಜಿಎಸ್‌ ನ್ಯಾಷನಲ್‌ ಪಬ್ಲಿಕ್‌ ಸ್ಕೂಲ್‌ ವಿರುದ್ಧ ಅವರು 26 ಫೋರ್‌ ಮತ್ತು 1 ಸಿಕ್ಸರ್‌ ಒಳಗೊಂಡ ದ್ವಿಶತಕ ಬಾರಿಸಿದ್ದರು. ಟೂರ್ನಿಯಲ್ಲಿ ತಲಾ ಒಂದು ಅರ್ಧಶತಕ ಮತ್ತು ಶತಕ ಹಾಗೂ ಎರಡು ದ್ವಿಶತಕಗಳೊಂದಿಗೆ ಅದ್ಭುತ ಎನ್ನಬಹುದಾದ 227ರ ಬ್ಯಾಟಿಂಗ್‌ ಸರಾಸರಿ ಹೊಂದಿರುವ ಸಮಿತ್ ಅವರನ್ನು ಹೊಗಳುವುದರಲ್ಲಿ ತಪ್ಪಿಲ್ಲ. ಟೂರ್ನಿಯಲ್ಲಿ 130ರ ಸ್ಟ್ರೈಕ್‌ರೇಟ್‌ನಲ್ಲಿ ಬ್ಯಾಟ್‌ ಬೀಸಿರುವ ಜೂನಿಯರ್‌ ದ್ರಾವಿಡ್, ಒಟ್ಟು 101 ಫೋರ್‌ ಮತ್ತು ಒಂದು ಸಿಕ್ಸರ್‌ ಚಚ್ಚಿದ್ದಾರೆ. ಸಮಿತ್ ಕೇವಲ ಬ್ಯಾಟ್ಸ್‌ಮನ್‌ ಮಾತ್ರವಲ್ಲ. ಉತ್ತಮ ಸ್ಪಿನ್ನರ್‌ ಎಂಬುದನ್ನು ಕೂಡ ಸಾಬೀತು ಪಡಿಸಿದ್ದು, ವಿದ್ಯಾಶಿಲ್ಪ ಅಕಾಡೆಮಿ ವಿರುದ್ಧ 35ಕ್ಕೆ 4 ವಿಕೆಟ್‌ ಪಡೆದ ಶ್ರೇಷ್ಠ ಬೌಲಿಂಗ್‌ ಸಾಧನೆಯೊಂದಿಗೆ ಟೂರ್ನಿಯಲ್ಲಿ ಒಟ್ಟು 7 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಈ ಮೂಲಕ ಮುಂದೊಂದು ದಿನ ಭಾರತ ತಂಡದ ಪರ ತಮ್ಮ ತಂದೆ ರಾಹುಲ್‌ ದ್ರಾವಿಡ್ ಮಾದರಿಯಲ್ಲೇ ಮಿಂಚುವ ಭರವಸೆ ಮೂಡಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2wboIaj
