ಹೊಸದಿಲ್ಲಿ: ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಆಕ್ರಮಣಕಾರಿ ಆನ್-ಫೀಲ್ಡ್ ವರ್ತನೆಗೆ ಹೆಸರುವಾಸಿ. ಈ ಹಿನ್ನೆಲೆಯಲ್ಲಿ ವಿಶ್ವದ ಯಾವುದೇ ಎದುರಾಳಿ ತಂಡದ ನಾಯಕರು ವಿರಾಟ್ ಬಳಿ ಕಿರಿಕ್ ಮಾಡಿಕೊಳ್ಳಲು ಮುಂದಾಗುವುದಿಲ್ಲ. ಒಂದು ವೇಳೆ ಮಾಡಿಕೊಂಡರೆ, ನಾಯಕನಿಂದ ನಿರೀಕ್ಷಿಸದಂಥ ಅತ್ಯುತ್ತಮ ಪ್ರದರ್ಶನ ಮೂಡಿಬರುತ್ತದೆ. ಆನ್-ಫೀಲ್ಡ್ ವರ್ತನೆಯಿಂದ ಸೋಶಿಯಲ್ ಮೀಡಿಯಾದಲ್ಲಿ ಆಗಾಗ ಸದ್ದು ಮಾಡುವ ಭಾರತ ತಂಡದ ನಾಯಕ , ಸ್ಥಿರ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಪ್ರಸ್ತುತ ತಲೆಮಾರಿನ ನೆಚ್ಚಿನ ಆಟಗಾರನಾಗಿ ಹೊರಹೊಮ್ಮಿದ್ದಾರೆ. ಆದರೆ, ಇದೇ ಸಮಯದಲ್ಲಿ ವಿರಾಟ್ ಕೊಹ್ಲಿ ಮೈದಾನದಿಂದ ಹೊರಗೆ ಸಂಪೂರ್ಣವಾಗಿ ವಿಭಿನ್ನ ವ್ಯಕ್ತಿ ಎಂದು ಹಾಲಿ ಹಾಗೂ ಮಾಜಿ ಆಟಗಾರರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಇತ್ತೀಚಿನ ಸಂವಾದವೊಂದರಲ್ಲಿ ಭಾರತ ತಂಡದ ಮಾಜಿ ಕ್ರಿಕೆಟಿಗ ಮತ್ತು ಸೆಲೆಕ್ಟರ್ ಸರಂದೀಪ್ ಸಿಂಗ್, ಮೈದಾನದಿಂದ ಹೊರಗೆ ಹಾಗೂ ಸೆಲೆಕ್ಷನ್ ಮೀಟಿಂಗ್ನಲ್ಲಿ ವಿರಾಟ್ ಕೊಹ್ಲಿ ನಿಜವಾದ 'ವಿನಮ್ರ' ಸ್ವಭಾವವನ್ನು ಹೊಂದಿರುತ್ತಾರೆಂದು ಬಹಿರಂಗಪಡಿಸಿದರು. "ತಂಡದ ಸೆಲೆಕ್ಷನ್ ಮೀಟಿಂಗ್ಗೆ ವಿರಾಟ್ ಕೊಹ್ಲಿ ಬಂದಾಗಲೆಲ್ಲಾ ಒಂದರಿಂದ ಒಂದೂವರೆ ಗಂಟೆಗಳ ಕಾಲ ಇರುತ್ತಾರೆ. ವಿರಾಟ್ ಉತ್ತಮ ಕೇಳುಗ. ಜನರು ಅವರ ಬಗ್ಗೆ ಏನು ಯೋಚಿಸುತ್ತಾರೆಂದು ನನಗೆ ತಿಳಿದಿಲ್ಲ" ಎಂದು ಸರಂದೀಪ್ ಸಿಂಗ್ ಸ್ಪೋರ್ಟ್ಸ್ಕೀಡಾಗೆ ತಿಳಿಸಿದರು. "ನೀವು ಅವರನ್ನು ಪಂದ್ಯಗಳಲ್ಲಿ ನೋಡಿದರೆ, ಬ್ಯಾಟಿಂಗ್ ಮತ್ತು ಫೀಲ್ಡಿಂಗ್ ಮಾಡುವಾಗ ಆತ ಆಕ್ರಮಣಕಾರಿಯಾಗಿ ಕಾಣಿಸುತ್ತಾರೆ. ಆದ್ದರಿಂದ ಅವರು ಯಾರ ಮಾತನ್ನೂ ಕೇಳುವುದಿಲ್ಲ. ಅವರು ಮೈದಾನದಲ್ಲಿ ಆಕ್ರಮಣಕಾರಿಯಾಗಿ ಕಾಣುತ್ತಾರೆ ನಿಜ, ಆದರೆ ಮೈದಾನದಿಂದ ಹೊರಗೆ ಎಲ್ಲರಿಗೂ ಇಷ್ಟವಾಗುವಂಥ ಸ್ವಭಾವ ಅವರದು. ಸೆಲೆಕ್ಷನ್ ಮೀಟಿಂಗ್ಗಳಲ್ಲಿ ಭಾಗವಹಿಸುವ ಅವರು ಪ್ರತಿಯೊಬ್ಬರ ಮಾತನ್ನು ತಾಳ್ಮೆಯಿಂದ ಆಲಿಸುತ್ತಾರೆ ಹಾಗೂ ಅಂತಿಮವಾಗಿ ತಮ್ಮ ನಿರ್ಧಾರ ಪ್ರಕಟಿಸುತ್ತಾರೆ," ಎಂದು ತಿಳಿಸಿದರು. "ಅವರ(ಕೊಹ್ಲಿ) ಮನೆಯಲ್ಲಿ ಯಾವುದೇ ಸೇವಕರು ಇಲ್ಲ. ಆದರೆ, ಅವರು ಮತ್ತು ಅವರ ಹೆಂಡತಿ(ಅನುಷ್ಕಾ ಶರ್ಮಾ) ಎಲ್ಲರಿಗೂ ಊಟ ಬಡಿಸುತ್ತಾರೆ. ವಿರಾಟ್ ಯಾವಾಗಲೂ ನಿಮ್ಮೊಂದಿಗೆ ಕುಳಿತುಕೊಳ್ಳುತ್ತಾರೆ, ನಿಮ್ಮೊಂದಿಗೆ ಸಂಭಾಷಣೆ ನಡೆಸುತ್ತಾರೆ ಮತ್ತು ನಿಮ್ಮೊಂದಿಗೆ ಭೋಜನ ಕೂಟಕ್ಕೆ ಹೋಗುತ್ತಾರೆ, ನಿಮಗೆ ಇನ್ನೇನು ಬೇಕು? ಉಳಿದ ಎಲ್ಲಾ ಆಟಗಾರರಿಗೂ ವಿರಾಟ್ ಮೇಲೆ ಹೆಚ್ಚಿನ ಗೌರವವಿದೆ. ಹಾಗಾಗಿ, ಕೊಹ್ಲಿ ಎಲ್ಲರಿಗೂ ಸುಲಭವಾಗಿ ಲಭ್ಯವಾಗುವ ವ್ಯಕ್ತಿ," ಎಂದು ಅವರು ಹೇಳಿದರು. "ಅವರು ಕ್ಯಾಪ್ಟನ್ ಆಗಿರುವುದರಿಂದ ಮೈದಾನದಲ್ಲಿ ಆ ರೀತಿ ಇರಬೇಕು. ಅವರು ಮೈದಾನದಲ್ಲಿನ ಒತ್ತಡವನ್ನು ನಿಭಾಯಿಸುತ್ತಾರೆ ಮತ್ತು ಆ ಕ್ಷಣದ ಶಾಖದಲ್ಲಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರೆ," ಎಂದು ಸರಮದೀಪ್ ಸಿಂಗ್ ಟೀಮ್ ಇಂಡಿಯಾ ನಾಯಕನ ಆಕ್ರಮಣಾಕಾರಿ ಮನೋಭಾವವನ್ನು ಬೆಂಬಲಿಸಿದರು. ಅಹಮದಾಬಾದ್ನಲ್ಲಿನ ಮೊಟೇರಾ ಕ್ರೀಡಾಂಗಣದಲ್ಲಿ ಫೆ. 24 ರಿಂದ ಆರಂಭವಾಗಲಿರುವ ಡೇ-ನೈಟ್ ಟೆಸ್ಟ್ ಪಂದ್ಯದಲ್ಲಿ ಭಾರತ ಹಾಗೂ ಇಂಗ್ಲೆಂಡ್ ತಂಡಗಳು ಮುಖಾಮುಖಿಯಾಗಲಿವೆ. ಆರಂಭಿಕ ಎರಡು ಪಂದ್ಯಗಳಲ್ಲಿ ತಲಾ ಒಂದೊಂದು ಪಂದ್ಯ ಗೆದ್ದಿರುವ ಉಭಯ ತಂಡಗಳು ಸರಣಿಯಲ್ಲಿ 1-1 ಸಮಬಲ ಕಾಯ್ದುಕೊಂಡಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3aF8jg5
