ಕಾರಟಗಿ: ಅನೈತಿಕ ಸಂಬಂಧಕ್ಕೆ ಅಡ್ಡಿಯಾಗುವ ನೆಪವೊಡ್ಡಿ ಮಗನನ್ನೇ ಕೊಲೆ ಮಾಡಿದ ಆರೋಪದಡಿ ಬಾಲಕನ ತಾಯಿ, ಅಜ್ಜ ಹಾಗೂ ತಾಯಿಯ ಪ್ರಿಯಕರನನ್ನು ಶುಕ್ರವಾರ ಬಂಧಿಸುವಲ್ಲಿ ಸ್ಥಳೀಯ ಠಾಣೆಯ ಪಿಎಸ್‌ಐ ಎಲ್‌.ಬಿ.ಅಗ್ನಿ ನೇತೃತ್ವದ ತಂಡ ಯಶಸ್ವಿಯಾಗಿದೆ. ಪಟ್ಟಣದ ನಜೀರ್‌ಸಾಬ್‌ ಕಾಲೊನಿಯ ಮಲ್ಲಿಕಾರ್ಜುನ ಹಡಪದ (12) ಮೃತ ಬಾಲಕ. ಈ ಬಾಲಕನ ತಾಯಿ ಲಕ್ಷ್ಮಿ, ಅಜ್ಜ ಸೋಮಣ್ಣ, ಪಕ್ಕದ ಮನೆಯ ಲಾಲ್‌ಸಾಬ್‌ ಬಂಧಿತ ಆರೋಪಿಗಳು. 2020, ಅ.23 ರಂದು ಮನೆಯ ಬಳಿ ಆಡುತ್ತಿದ್ದ ಬಾಲಕನನ್ನು ರಮಿಸಿದ ಅಜ್ಜ ಸೋಮಣ್ಣ, ಬೈಕ್‌ ಮೇಲೆ ಕೂಡಿಸಿಕೊಂಡು ಹೋಗಿದ್ದ. ಮೈಲಾಪುರ ಬಳಿ ಹಗ್ಗದಿಂದ ಬಾಲಕನ ಕೈಕಾಲು ಕಟ್ಟಿ ತುಂಗಭದ್ರಾ ಎಡದಂಡೆ ನಾಲೆಗೆ ಎಸೆದಿದ್ದ. ಈ ಕುರಿತ ಮಾಹಿತಿ, ಪೊಲೀಸರ ವಿಚಾರಣೆ ವೇಳೆ ಬಹಿರಂಗವಾಗಿದೆ. ಅ.24 ರಂದು ಬೆಳಗ್ಗೆ ರಾಯಚೂರು ಜಿಲ್ಲೆಯ ಬಳಗಾನೂರು ಠಾಣೆ ವ್ಯಾಪ್ತಿಯ ಉದ್ಬಾಳ ಬಳಿಯ ತುಂಗಭದ್ರಾ ಎಡದಂಡೆ ನಾಲೆಯಲ್ಲಿ ಬಾಲಕನ ಶವ ಪತ್ತೆಯಾಗಿತ್ತು. ನಾಪತ್ತೆ ಹಾಗೂ ನಿಗೂಢ ಸಾವಿನ ಕುರಿತು ಬಾಲಕನ ತಂದೆ ಕಳಕಪ್ಪ ಹಡಪದ ಬಳಗಾನೂರು ಹಾಗೂ ಕಾರಟಗಿ ಠಾಣೆಗಳಿಗೆ ಪ್ರತ್ಯೇಕ ದೂರು ನೀಡಿದ್ದರು. ನವೆಂಬರ್‌ನಲ್ಲಿ ಬಳಗಾನೂರು ಠಾಣೆಯಿಂದ ಕಾರಟಗಿ ಠಾಣೆಗೆ ಪ್ರಕರಣ ವರ್ಗಾವಣೆಗೊಂಡಿತ್ತು. ಪ್ರಕರಣದ ಹಿನ್ನೆಲೆ:ಗಂಡನ ಜತೆ ಮುನಿಸಿಕೊಂಡು ಬೇರೆ ವಾಸಿಸುತ್ತಿದ್ದ ಲಕ್ಷ್ಮಿ, ತನ್ನ ಸ್ವಂತ ಮಾವ ಹಾಗೂ ಪಕ್ಕದ ಮನೆಯ ಪ್ರಿಯಕರ ಲಾಲ್‌ಸಾಬ್‌ ಜತೆ ಅನೈತಿಕ ಸಂಬಂಧವಿಟ್ಟುಕೊಂಡಿದ್ದಳು ಎನ್ನಲಾಗಿದೆ. ಈ ಸಂಬಂಧಕ್ಕೆ ಮಗ ಅಡ್ಡಿಯಾಗುತಿದ್ದಾನೆ ಎಂಬ ನೆಪವೊಡ್ಡಿ ಮಾವ ಹಾಗೂ ಪ್ರಿಯಕರನ ಜತೆ ಸೇರಿಕೊಂಡು ಮಗನ ಕೊಲೆಗೆ ಸಂಚು ರೂಪಿಸಿದ್ದಳು ಎಂಬ ಸಂಗತಿ ಪ್ರಾಥಮಿಕ ತನಿಖೆ ವೇಳೆ ಬಯಲಾಗಿದೆ. ಬಾಲಕನ ನಿಗೂಢ ಸಾವಿನ ಕುರಿತು ಸಮಗ್ರ ತನಿಖೆ ನಡೆಸಬೇಕು. ಅಪರಾಧಿಗಳನ್ನು ಬಂಧಿಸುವಂತೆ ಆಗ್ರಹಿಸಿ, ತಾಲೂಕು ಹಡಪದ ಸಮಾಜದ ಬಾಂಧವರು, ಕಾರಟಗಿ ಠಾಣೆಗೆ ದೂರು ನೀಡಿದ್ದನ್ನು ಇಲ್ಲಿ ಸ್ಮರಿಸಬಹುದು. ಈ ದೂರು ಆಧರಿಸಿ, ಪ್ರಕರಣದ ಬೆನ್ನು ಹತ್ತಿದ ಪೊಲೀಸರು, ಆರೋಪಿಗಳನ್ನು ವಶಕ್ಕೆ ಪಡೆದು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
from India & World News in Kannada | VK Polls https://ift.tt/3r8GUt6
