ಅಹಮದಾಬಾದ್‌: ಆರ್‌ ಅಶ್ವಿನ್‌ ಟೆಸ್ಟ್ ಕ್ರಿಕೆಟ್ ವೃತ್ತಿ ಜೀವನದಲ್ಲಿ 400 ವಿಕೆಟ್ ಪಡೆದ ಭಾರತದ ನಾಲ್ಕನೇ ಬೌಲರ್ ಎಂಬ ಸಾಧನೆಯನ್ನು ಗುರುವಾರ ಇಂಗ್ಲೆಂಡ್ ವಿರುದ್ಧ ಪಂದ್ಯದಲ್ಲಿ ಮಾಡಿದರು. ಪಂದ್ಯದ ಬಳಿಕ ಮಾತನಾಡಿದ ಟೀಮ್‌ ಇಂಡಿಯಾ ನಾಯಕ , ಅಶ್ವಿನ್‌ ಅವರನ್ನು ' ಆಧುನಿಕ ದಂತಕತೆ' ಎಂದು ಬಣ್ಣಿಸಿದರು. ಇಂಗ್ಲೆಂಡ್ ವಿರುದ್ಧ ಮೂರನೇ ಟೆಸ್ಟ್ ಪಂದ್ಯದ ಎರಡನೇ ದಿನ ಜೋಫ್ರ ಆರ್ಚರ್ ವಿಕೆಟ್ ಪಡೆಯುತ್ತಿದ್ದಂತೆ ಈ ಮೈಲುಗಲ್ಲು ಸ್ಥಾಪಿಸಿದರು. ಪಂದ್ಯದಲ್ಲಿ ಒಟ್ಟು 7 ವಿಕೆಟ್ ಕಿತ್ತ ಅಶ್ವಿನ್‌, ಟೆಸ್ಟ್ ವೃತ್ತಿ ಜೀವನದಲ್ಲಿ 401 ವಿಕೆಟ್‌ಗಳನ್ನು ತನ್ನ ಖಾತೆಗೆ ಹಾಕಿಕೊಂಡರು. ಪೋಸ್ಟ್‌-ಮ್ಯಾಚ್‌ ಪ್ರೆಸೆಂಟೇಷನ್‌ನಲ್ಲಿ ಮಾತನಾಡಿದ ನಾಯಕ ವಿರಾಟ್‌ ಕೊಹ್ಲಿ, ಸಹ ಆಟಗಾರನನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದರು. "ಇಷ್ಟು ದಿನಗಳ ಕಾಲ ಭಾರತ ತಂಡಕ್ಕಾಗಿ ಅಶ್ವಿನ್‌ ಏನು ಮಾಡಿದ್ದಾರೆಂಬುದನ್ನು ನಾವು ಕಣ್ಣಾಡಿಸಬೇಕಾದ ಅಗತ್ಯವಿದೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ ಅವರು 'ಆಧುನಿಕ ದಂತಕತೆ'. ಅಶ್ವಿನ್‌ ಅವರಂಥ ಆಟಗಾರ ನಮ್ಮ ತಂಡದಲ್ಲಿದ್ದಾರೆಂಬುದು ಒಬ್ಬ ನಾಯಕನಾಗಿ ನನಗೆ ತುಂಬಾ ಸಂತೋಷವಾಗಿದೆ," ಎಂದರು. ತಮ್ಮ ವೃತ್ತಿಜೀವನದ 77ನೇ ಟೆಸ್ಟ್ ಪಂದ್ಯವಾಡಿದ ಹಿರಿಯ ಆಫ್‌ ಸ್ಪಿನ್ನರ್‌, 400 ವಿಕೆಟ್ ದಾಖಲೆ ಮಾಡಿದ ವಿಶ್ವದ 16ನೇ ಬೌಲರ್ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ. "400 ವಿಕೆಟ್ ಸಾಧನೆ ಮಾಡಿರುವುದು ಅದ್ಭುತ ಅನುಭವ ನೀಡಿದೆ. ಸ್ಟೇಡಿಯಂನಲ್ಲಿದ್ದ ಎಲ್ಲಾ ಪ್ರೇಕ್ಷಕರು ಎದ್ದು ನಿಂತು ನನಗೆ ಚಪ್ಪಾಳೆ ತಟ್ಟಿ ಗೌರವ ಸಲ್ಲಿಸಿದ್ದಾರೆ. ಪಂದ್ಯದ ಗೆಲುವಿನಿಂದ ನನಗೆ ಇನ್ನಷ್ಟು ಸಂತೋಷವಾಯಿತು. ಕಳೆದ 2-3 ತಿಂಗಳುಗಳಲ್ಲಿ ಏನಾಗಿದೆ ಎಂಬುದರ ಹಿಡಿತವನ್ನು ನಾನು ನಿಜವಾಗಿಯೂ ಪಡೆಯಲು ಸಾಧ್ಯವಿಲ್ಲ. ಇದು ಸ್ವಪ್ನಮಯ ಓಟ ಮತ್ತು ಕಾಲ್ಪನಿಕ ಕಥೆಯಾಗಿದೆ, " ಎಂದು ಅಶ್ವಿನ್‌ ತಿಳಿಸಿದರು. "ಇದೆಲ್ಲವೂ ಆತ್ಮ ವಿಶ್ವಾಸವಾಗಿದೆ. ಆಸ್ಟ್ರೇಲಿಯಾ ಪ್ರವಾಸದಲ್ಲಿ ನಾನು ಆರಂಭಿಸುತ್ತೇನೆಂದು ಭಾವಿಸಿರಲಿಲ್ಲ. ಆದರೆ, ರವೀಂದ್ರ ಜಡೇಜಾ ಗಾಯದಿಂದ ಹೊರ ನಡೆದಾಗ ಎಲ್ಲಾ ಜವಾಬ್ದಾರಿ ನನ್ನ ಮೇಲೆ ಬಿತ್ತು. ಅದರಂತೆ ನಾನು ಉತ್ತಮ ಪ್ರದರ್ಶನ ತೋರಲೇಬೇಕಾದ ಸನ್ನಿವೇಶ ಎದುರಾಯಿತು. ಅಂದುಕೊಂಡಂತೆ ಎಲ್ಲವೂ ಸಕಾರವಾಯಿತು," ಎಂದರು. ಇಂಗ್ಲೆಂಡ್ ವಿರುದ್ಧ ಪಿಂಕ್‌-ಬಾಲ್‌ ಟೆಸ್ಟ್ ಪಂದ್ಯಕ್ಕೂ ಬರುವ ಮುನ್ನ ಅಶ್ವಿನ್‌ 400 ವಿಕೆಟ್‌ಗಳನ್ನು ಪೂರೈಸಲು ಇನ್ನು ಆರು ವಿಕೆಟ್ ಅಗತ್ಯವಿತ್ತು. ಶ್ರೀಲಂಕಾ ಸ್ಪಿನ್‌ ದಂತಕತೆ ಮುತ್ತಯ್ಯ ಮುರಳಿಧರನ್‌ ಬಳಿಕ ಟೆಸ್ಟ್ ಕ್ರಿಕೆಟ್‌ನಲ್ಲಿ ವೇಗವಾಗಿ 400 ವಿಕೆಟ್ ಪಡೆದ ವಿಶ್ವದ ಎರಡನೇ ಬೌಲರ್ ಎಂಬ ಸಾಧನೆಗೆ ಅಶ್ವಿನ್‌ ಭಾಜನರಾದರು. ಮುತ್ತಯ್ಯ ಮುರಳಿಧರನ್‌ ಈ ಸಾಧನೆಯನ್ನು 72ನೇ ಪಂದ್ಯದಲ್ಲಿ ಮಾಡಿದ್ದರು. ಭಾರತ ತಂಡದ ಮಾಜಿ ನಾಯಕ ಅನಿಲ್‌ ಕುಂಬ್ಳೆ(619), ಕಪಿಲ್‌ ದೇವ್‌ (434) ಹಾಗೂ ಹರಭಜನ್ ಸಿಂಗ್(417) 400 ವಿಕೆಟ್ ಪಡೆದಿರುವ ಭಾರತದ ಇನ್ನುಳಿದ ಬೌಲರ್‌ಗಳಾಗಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3stKu18
