ಹೊಸದಿಲ್ಲಿ: ಇಂಧನ ದರ ಬೆಲೆ ಏರಿಕೆ, ಇ-ವೇ ಬಿಲ್‌ ಹಾಗೂ ಅವ್ಯವಸ್ಥೆ ವಿರೋಧಿಸಿ ಅಖಿಲ ಭಾರತ ವರ್ತಕರ ಒಕ್ಕೂಟವು (ಸಿಎಐಟಿ) ಶುಕ್ರವಾರ ಭಾರತ ಬಂದ್‌ಗೆ ಕರೆ ನೀಡಿದೆ. ಸುಮಾರು 40 ಸಾವಿರ ವಾಣಿಜ್ಯ ಸಂಘಟನೆಗಳು ಬೆಂಬಲ ನೀಡಿದ್ದು ಮುಂಜಾನೆಯಿಂದಲೇ ಕೆಲ ರಾಜ್ಯದಲ್ಲಿ ಬಂದ್ ಆಚರಿಸಲಾಗುತ್ತಿದೆ. ಹಲವೆಡೆ ಸಿಎಐಟಿ ಬಂದ್ ಕರೆಗೆ ಅಂಗಡಿ ಮುಂಗಟ್ಟುಗಳನ್ನು ಬಂದ್ ಮಾಡಿ ಬೆಂಬಲ ಸೂಚಿಸಿದರೆ ಇನ್ನು ಕೆಲವೆಡೆ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಬಿಜೆಪಿಯೇತರ ರಾಜ್ಯಗಳು ಬಿಟ್ಟರೆ ಮತ್ತೆಲ್ಲೂ ಅಷ್ಟೇನೂ ಬಂದ್ ಬಿಸಿ ತಟ್ಟಿಲ್ಲ. ಇನ್ನು ದೇಶದ 1500 ನಗರ ಹಾಗೂ ಪಟ್ಟಣಗಳಲ್ಲಿ ಧರಣಿ ಹಾಗೂ ಪ್ರತಿಭಟನೆಗಳು ನಡೆಯಲಿವೆ ಎಂದು ಸಿಎಐಟಿ ತಿಳಿಸಿದೆ. ಅದಲ್ಲದೆ, ದೇಶಾದ್ಯಂತ ರಸ್ತೆ ತಡೆ ಪ್ರತಿಭಟನೆ ನಡೆಸಲು ಭಾರತೀಯ ಸಾರಿಗೆ ಕ್ಷೇಮಾಭಿವೃದ್ಧಿ ಸಂಘ (ಎಐಡಬ್ಲ್ಯುಟಿಎ) ತೀರ್ಮಾನಿಸಿದೆ. ಭಾರತ ಬಂದ್ ಘೋಷಣೆಯಿಂದಾಗಿ ಸರಕು ಸಾಗಣೆ ಹಾಗೂ ಹಲವು ಸೇವೆಗಳಲ್ಲಿ ವ್ಯತ್ಯಯವಾಗಲಿದೆ. ಲಾರಿಗಳ ಮುಷ್ಕರ! ತೈಲ ಬೆಲೆ ಹೆಚ್ಚಳ ಹಾಗೂ ಟೋಲ್‌ ಶುಲ್ಕ ಏರಿಕೆ ಸೇರಿ ದಂತೆ ನಾನಾ ಸಮಸ್ಯೆಗಳ ಪರಿಹಾರಕ್ಕೆ ಆಗ್ರಹಿಸಿ ಶುಕ್ರವಾರ ಲಾರಿ ಮಾಲೀಕರ ಸಂಘ ಬಂದ್ ನಡೆಸಲು ನಿರ್ಧರಿಸಿವೆ. ಹೀಗಾಗಿ 20 ಲಕ್ಷ ಟ್ರಕ್‌ಗಳು ರಸ್ತೆಗೆ ಇಳಿಯುವುದಿಲ್ಲ. ''ಡೀಸೆಲ್‌ ಬೆಲೆ ಹೆಚ್ಚಳದಿಂದಾಗಿ ಮಾಲೀಕರು ನಷ್ಟಕ್ಕೆ ಒಳಗಾಗುತ್ತಿದ್ದಾರೆ. ಗುತ್ತಿಗೆ ಅವಧಿ ಮುಗಿದ ಬಳಿಕವೂ ಟೋಲ್‌ ಸಂಗ್ರಹ ಮಾಡಲಾಗುತ್ತಿದೆ. ವಿಮೆ ಹೆಚ್ಚಳ ಮಾಡಿರುವುದು ಮಾಲೀಕ-ರಿಗೆ ಹೊರೆಯಾಗುತ್ತಿದೆ. ವಾಹನ-ಗಳ ಬಿಡಿಭಾಗಗಳ ದರವೂ ಹೆಚ್ಚಳವಾಗಿರುವುದು ಕೂಡ ಆತಂಕಕ್ಕೆ ಕಾರಣವಾಗಿದೆ. ಅದೇ ರೀತಿ ಹೊಸ 'ಗುಜರಿ ನೀತಿ'ಯಿಂದಲೂ ಮಾಲೀಕರಿಗೆ ನಷ್ಟವಾಗಲಿದೆ,'' ಎಂದು ಲಾರಿ ಮಾಲೀಕರ ಸಂಘ ಆರೋಪಿಸಿವೆ. ಕೃಷಿ ಸಚಿವಾಲಯಕ್ಕೆ ಮುತ್ತಿಗೆ! ಇನ್ನು ಕೃಷಿ ಕಾಯಿದೆಗಳ ವಿರುದ್ಧ ರೈತರು ನಡೆಸುತ್ತಿರುವ ಹೋರಾಟ ಮೂರು ತಿಂಗಳು ಪೂರೈಸುತ್ತಿರುವ ಹಿನ್ನೆಲೆಯಲ್ಲಿ ಶುಕ್ರವಾರ (ಫೆ.26) ಕೃಷಿ ಸಚಿವಾಲಯಕ್ಕೆ ಮುತ್ತಿಗೆ ಹಾಕಲು ರೈತ ಸಂಘಟನೆಗಳು ತೀರ್ಮಾನಿಸಿವೆ. ''ಮೂರು ತಿಂಗಳಿನಿಂದ ದಿಲ್ಲಿಗಡಿ-ಗಳಲ್ಲಿ ರೈತರು ಪ್ರತಿಭಟನೆ ನಡೆಸುತ್ತಿದ್ದರೂ ಕೇಂದ್ರ ಸರಕಾರ ಮೌನ ವಹಿಸಿದೆ. ಹೀಗಾಗಿ ಪ್ರತಿಭಟನೆ ಮತ್ತಷ್ಟು ತೀವ್ರ-ಗೊಳ್ಳಲಿದೆ ಎನ್ನುವುದನ್ನು ತೋರಿಸಲು ಕೃಷಿ ಸಚಿವಾಲಯಕ್ಕೆ ಮುತ್ತಿಗೆ ಹಾಕಲಾಗುವುದು ಮತ್ತು ಕೃಷಿ ಸಚಿವ ನರೇಂದ್ರ ಸಿಂಗ್‌ ತೋಮರ್‌ ಅವರಿಗೆ ಘೇರಾವ್‌ ಹಾಕಲಾಗುವುದು,'' ಎಂದು ಕಿಸಾನ್‌ ಕಾಂಗ್ರೆಸ್‌ ಉಪಾಧ್ಯಕ್ಷ ಸುರೇಂದ್ರ ಸೋಳಂಕಿ ತಿಳಿಸಿದ್ದಾರೆ. ಹೋರಾಟಕ್ಕೆ ಜಾಗತಿಕ ಬೆಂಬಲ ಪಡೆಯುವ ಸಲುವಾಗಿ ವೆಬಿನಾರ್‌ಗಳನ್ನು ಆಯೋಜಿಸಲೂ ರೈತ ಸಂಘಟನೆಗಳು ತೀರ್ಮಾನಿಸಿವೆ. ಟಿಕಾಯತ್‌ ಬಂಧನ ಸಾಧ್ಯತೆ! ದಿಲ್ಲಿಗಡಿಗಳಲ್ಲಿನಡೆಯುತ್ತಿರುವ ರೈತರ ಪ್ರತಿಭಟನೆಯ ಮುಂದಾಳತ್ವ ವಹಿಸಿರುವ ನಾಯಕರ ಪೈಕಿ ಒಬ್ಬರಾದ ಭಾರತೀಯ ಕಿಸಾನ್‌ ಸಂಘದ (ಬಿಜೆಯು) ಮುಖಂಡ ರಾಕೇಶ್‌ ಟಿಕಾಯತ್‌ಗೆ ಬಂಧನ ಭೀತಿ ಎದುರಾಗಿದೆ. ಮಧ್ಯಪ್ರದೇಶದಲ್ಲಿ ಮಾರ್ಚ್ 8ರಂದು ನಿಗದಿಯಾಗಿರುವ ರೈತ ಸಮಾವೇಶಗಳಲ್ಲಿ ಭಾಗವಹಿಸಲು ಟಿಕಾಯತ್‌ ಭೇಟಿ ನೀಡುತ್ತಿದ್ದು, ಇದೇ ವೇಳೆ ಅವರ ಬಂಧನವಾಗುವ ಸಾಧ್ಯತೆಯಿದೆ. ಯಾಕೆಂದರೆ, 2012ರಲ್ಲಿ ಹತ್ಯೆಗೆ ಯತ್ನ ಹಾಗೂ ದಂಗೆಗೆ ಪ್ರಚೋದನೆ ನೀಡಿದ ಪ್ರಕರಣವೊಂದರ ಸಂಬಂಧ ಆರೋಪಿ ಟಿಕಾಯತ್‌ ಬಂಧನಕ್ಕೆ ಸ್ಥಳೀಯ ಕೋರ್ಟ್‌ವೊಂದರ ವಾರಂಟ್‌ ಜಾರಿಯಲ್ಲಿದೆ. 2016ರಲ್ಲೇ ಅನುಪ್ಪುರ್‌ ಜಿಲ್ಲಾಕೋರ್ಟ್‌ನಿಂದ ಈ ವಾರಂಟ್‌ ಜಾರಿಯಾಗಿತ್ತು. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅನುಪ್ಪುರ್‌ ಪೊಲೀಸ್‌ ವರಿಷ್ಠಾಧಿಕಾರಿ ಮಂಗಿಲಾಲ್‌ ಸೋಳಂಕಿ ಅವರು, ''2012ರಲ್ಲಿ ಬಂಧನದ ಬಳಿಕ ಜಾಮೀನಿನ ಮೇಲೆ ಟಿಕಾಯತ್‌ ಬಿಡುಗಡೆ ಆಗಿತ್ತು. ಕೋರ್ಟ್‌ ವಿಚಾರಣೆ ನಡೆಯುತ್ತಿದೆ. ಬಂಧನ ವಾರಂಟ್‌ ಜಾರಿಯಲ್ಲಿದೆ,'' ಎಂದಿದ್ದಾರೆ.
from India & World News in Kannada | VK Polls https://ift.tt/3suBPeE
