ನಾಗಪ್ಪ ನಾಗನಾಯಕನಹಳ್ಳಿ, ಬೆಂಗಳೂರು ಬೆಂಗಳೂರು: ಪೆಟ್ರೋಲ್‌, ಡೀಸೆಲ್‌ ಬೆಲೆಯು ಗಗನಮುಖಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಸಿಲಿಕಾನ್‌ ಸಿಟಿಯ ಜನರು ಪರಿಸರ ಸ್ನೇಹಿ ಎಲೆಕ್ಟ್ರಿಕ್‌ ವಾಹನಗಳ ಖರೀದಿಗೆ ಒಲವು ತೋರುತ್ತಿದ್ದಾರೆ. ಅಲ್ಲದೆ, ಟ್ಯಾಕ್ಸಿಯನ್ನೇ ನೆಚ್ಚಿಕೊಂಡು ಜೀವನದ ಬಂಡಿ ಸಾಗಿಸುತ್ತಿರುವ ಬಹುತೇಕ ಚಾಲಕರು ವಿದ್ಯುತ್‌ ಚಾಲಿತ ಕಾರುಗಳನ್ನು ಖರೀದಿಸುತ್ತಿದ್ದಾರೆ. ಹೀಗಾಗಿಯೇ, ನಗರದ ರಸ್ತೆಗಳಲ್ಲಿ ಹೆಚ್ಚಿನ ಎಲೆಕ್ಟ್ರಿಕ್‌ ಟ್ಯಾಕ್ಸಿಗಳು ಕಂಡುಬರುತ್ತಿವೆ. ಇಂಧನ ಚಾಲಿತ ವಾಹನಗಳಿಗೆ ಹೋಲಿಸಿದರೆ, ಇ-ವಾಹನಗಳ ಪ್ರಯಾಣ ವೆಚ್ಚ ಅಗ್ಗ. ಈ ಮೊದಲು ಕಂಪನಿಗಳಷ್ಟೇ ತಮ್ಮ ಉದ್ಯೋಗಿಗಳಿಗೆ ಸಾರಿಗೆ ಸೌಲಭ್ಯ ಕಲ್ಪಿಸಲು ಇ-ಕಾರುಗಳನ್ನು ಖರೀದಿಸಿದ್ದವು. ಇದೀಗ ಟ್ಯಾಕ್ಸಿ ಚಾಲಕರು ಸಹ ಎಲೆಕ್ಟ್ರಿಕ್‌ ಕಾರುಗಳನ್ನು ಖರೀದಿಸಿ, ಪ್ರಯಾಣಿಕರಿಗೆ ಸೇವೆ ಒದಗಿಸುತ್ತಿದ್ದಾರೆ. ಸಾರಿಗೆ ಇಲಾಖೆಯ ಅಂಕಿ-ಅಂಶಗಳ ಪ್ರಕಾರ ನಗರದಲ್ಲಿತಿಂಗಳಿಗೆ ಅಂದಾಜು 400 ವಾಹನಗಳು ಹೊಸದಾಗಿ ನೋಂದಣಿಯಾಗುತ್ತಿವೆ. ರಾಜಧಾನಿಯಲ್ಲಿಜ.18ರವರೆಗೆ 17,450 ಇ-ವಾಹನಗಳು ನೋಂದಣಿಯಾಗಿ ರಸ್ತೆಗಿಳಿದಿವೆ. 10 ಆರ್‌ಟಿಒ ಕಚೇರಿಗಳಲ್ಲಿ ನೋಂದಣಿಯಾಗಿರುವ ಎಲೆಕ್ಟ್ರಿಕ್‌ ವಾಹನಗಳ ಪೈಕಿ ದ್ವಿಚಕ್ರ ಮತ್ತು ಕಾರುಗಳದ್ದೇ ಸಿಂಹಪಾಲು. ಉದ್ಯಾನನಗರಿಯಲ್ಲಿ2020ರ ಮೇ ಅಂತ್ಯದವರೆಗೆ ನೋಂದಣಿಯಾಗಿರುವ ವಾಹನಗಳ ಒಟ್ಟು ಸಂಖ್ಯೆ 85.63 ಲಕ್ಷ. ಇಂದಿರಾನಗರ, ಜಯನಗರ, ಎಲೆಕ್ಟ್ರಾನಿಕ್‌ ಸಿಟಿ ಕಚೇರಿಗಳಲ್ಲಿಅತ್ಯಧಿಕ ಇ-ವಾಹನಗಳು ನೋಂದಣಿಯಾಗಿವೆ. ರಾಜ್ಯದಲ್ಲಿಒಟ್ಟು 26,209 ಎಲೆಕ್ಟ್ರಿಕ್‌ ವಾಹನಗಳಿವೆ. ಪೆಟ್ರೋಲ್‌, ಡೀಸೆಲ್‌ ಚಾಲಿತ ವಾಹನಗಳಿಗಿಂತ ಎಲೆಕ್ಟ್ರಿಕ್‌ ವಾಹನಗಳ ಬೆಲೆ ದುಬಾರಿ. ಆದರೆ, ವಾಹನಗಳ ಮಾದರಿ ಮತ್ತು ವಿನ್ಯಾಸದಲ್ಲಿಸಾಕಷ್ಟು ಆಯ್ಕೆಗಳಿವೆ. ಮೊಬೈಲ್‌ ಮಾದರಿಯಲ್ಲಿಯೇ ಇ-ವಾಹನಗಳನ್ನೂ ಚಾರ್ಜ್ ಮಾಡಿಕೊಳ್ಳಬಹುದು. ಕೆಲವೊಂದು ಮಾಡೆಲ್‌ ದ್ವಿಚಕ್ರ ವಾಹನಗಳಿಗೆ ಸರಕಾರ ಸಬ್ಸಿಡಿ ನೀಡುತ್ತಿದೆ. ಪ್ರತಿ ಕಿ.ಮೀ ಸಂಚಾರಕ್ಕೆ 50 ಪೈಸೆ ವೆಚ್ಚ: ಇ-ವಾಹನಗಳು ಎರಡು ಬ್ಯಾಟರಿಗಳನ್ನು ಹೊಂದಿರುತ್ತವೆ. ಒಮ್ಮೆಗೆ ಎರಡೂ ಬ್ಯಾಟರಿಗಳನ್ನು ಚಾರ್ಜ್ ಮಾಡಿಕೊಳ್ಳಬಹುದು. ನಾಲ್ಕೈದು ತಾಸು ಚಾರ್ಜ್ ಮಾಡಿದರೆ ಬೈಕ್‌ಗಳು ಕನಿಷ್ಠ 80 ಕಿ.ಮೀ ಮೈಲೇಜ್‌ ನೀಡುತ್ತವೆ. ಇದಕ್ಕೆ 4 ಯೂನಿಟ್‌ ವಿದ್ಯುತ್‌ ಬೇಕಾಗುತ್ತದೆ. ಬೆಸ್ಕಾಂ ಪ್ರತಿ ಯೂನಿಟ್‌ಗೆ 7.28 ರೂ. ನಿಂದ 8.09 ರೂ. ದರ ವಿಧಿಸುತ್ತಿದೆ. 8 ರೂ. ಲೆಕ್ಕಚಾರದಂತೆ 4 ಯೂನಿಟ್‌ಗೆ 32 ರೂ. ಆಗುತ್ತದೆ. ಎಲೆಕ್ಟ್ರಿಕ್‌ ದ್ವಿಚಕ್ರ ವಾಹನಗಳಲ್ಲಿ ಪ್ರತಿ ಕಿ.ಮೀ ಸಂಚಾರಕ್ಕೆ ಕೇವಲ 50 ಪೈಸೆ ಖರ್ಚಾಗುತ್ತದೆ. ನಗರದಲ್ಲಿಸದ್ಯ ಪ್ರತಿ ಲೀಟರ್‌ ಪೆಟ್ರೋಲ್‌ ದರವು 93 ರೂ. ಇದ್ದು, ಬೈಕ್‌ಗಳು ಪ್ರತಿ ಲೀ.ಟರ್‌ಗೆ ಗರಿಷ್ಠ 50 ಕಿ.ಮೀ ಮೈಲೇಜ್‌ ನೀಡುತ್ತವೆ. ಹೀಗಾಗಿ, ಪೆಟ್ರೋಲ್‌ ಚಾಲಿತ ಬೈಕ್‌ಗಳಲ್ಲಿಸಂಚರಿಸಲು ಪ್ರತಿ ಕಿ.ಮೀ ಗೆ ಸುಮಾರು 2 ರೂ. ವ್ಯಯವಾಗುತ್ತದೆ. ಇದಲ್ಲದೇ ತೈಲ ಬದಲಾವಣೆ ಹಾಗೂ ಇನ್ನಿತರೆ ಖರ್ಚುಗಳು ಸಹ ಇರುತ್ತವೆ. ವಿದ್ಯುತ್‌ ಚಾಲಿತ ವಾಹನಗಳಲ್ಲಿತೈಲ ಬದಲಾವಣೆಯ ರಗಳೆ ಇರುವುದಿಲ್ಲ. ಎಲೆಕ್ಟ್ರಿಕ್‌ ಹವಾನಿಯಂತ್ರಿತ ಕಾರುಗಳನ್ನು ಐದು ತಾಸು ಚಾರ್ಜ್ ಮಾಡಿದರೆ, ಕನಿಷ್ಠ 100 ಕಿ.ಮೀ ಮೈಲೇಜ್‌ ನೀಡುತ್ತವೆ. ಬ್ಯಾಟರಿಯನ್ನು ಪೂರ್ಣ ಪ್ರಮಾಣದಲ್ಲಿಚಾರ್ಜ್ ಮಾಡಲು 5 ಯೂನಿಟ್‌ನಷ್ಟು ವಿದ್ಯುತ್‌ ಬೇಕಾಗುತ್ತದೆ. ಇದಕ್ಕೆ 8 ರೂ. ಲೆಕ್ಕದಲ್ಲಿ40 ರೂ. ಆಗುತ್ತದೆ. ಅದೇ ಪೆಟ್ರೋಲ್‌ ಚಾಲಿತ ಕಾರುಗಳು ಒಂದು ಲೀಟರ್‌ಗೆ ಗರಿಷ್ಠ 20 ಕಿ.ಮೀ ಮೈಲೇಜ್‌ ಕೊಡುತ್ತವೆ. 100 ಕಿ.ಮೀ ಕ್ರಮಿಸಲು 5 ಲೀಟರ್‌ನಷ್ಟು ಪೆಟ್ರೋಲ್‌ ಬೇಕಾಗಲಿದ್ದು, 465 ರೂ. ವೆಚ್ಚವಾಗುತ್ತದೆ. ಹೀಗಾಗಿಯೇ, ಬಹುತೇಕರು ಖರೀದಿಯತ್ತ ಮುಖ ಮಾಡುತ್ತಿದ್ದಾರೆ. ಟ್ಯಾಕ್ಸಿ ಓಡಿಸುವ ಚಾಲಕರಿಗೆ ಹೆಚ್ಚಿನ ಲಾಭ ತಂದು ಕೊಡುತ್ತವೆ. 136 ಚಾರ್ಜಿಂಗ್‌ ಕೇಂದ್ರಗಳ ಸ್ಥಾಪನೆ: ಬೆಂಗಳೂರು ವಿದ್ಯುತ್‌ ಸರಬರಾಜು ಕಂಪನಿಯು(ಬೆಸ್ಕಾಂ) ನಗರದಲ್ಲಿಇ-ವಾಹನಗಳನ್ನು ಚಾರ್ಜ್ ಮಾಡಿಕೊಳ್ಳಲು 70 ಸ್ಥಳಗಳಲ್ಲಿ136 ಚಾರ್ಜಿಂಗ್‌ ಕೇಂದ್ರಗಳನ್ನು ಸ್ಥಾಪಿಸಿದೆ. ಇನ್ನು 140 ಚಾರ್ಜಿಂಗ್‌ ಕೇಂದ್ರಗಳ ನಿರ್ಮಾಣಕ್ಕೆ ಸಿದ್ಧತೆ ನಡೆಸಿದೆ. ಇದಲ್ಲದೇ ಎಲೆಕ್ಟ್ರಿಕ್‌ ವಾಹನಗಳ ಡೀಲರ್‌ಗಳು ಕೂಡ ಚಾರ್ಜಿಂಗ್‌ ಕೇಂದ್ರಗಳ ವ್ಯವಸ್ಥೆ ಕಲ್ಪಿಸಿದ್ದಾರೆ. ಆದರೂ, ಎಲ್ಲಕಡೆ ಚಾರ್ಜಿಂಗ್‌ ಕೇಂದ್ರಗಳು ಇಲ್ಲ. ಹೀಗಾಗಿ, ಬಹುತೇಕರು ಇ-ವಾಹನಗಳ ಖರೀದಿಗೆ ಹಿಂದೇಟು ಹಾಕುತ್ತಿದ್ದಾರೆ. ಅಷ್ಟೇ ಅಲ್ಲ; ಮೂರು ವರ್ಷಕ್ಕೊಮ್ಮೆ ಬ್ಯಾಟರಿಗಳನ್ನು ಬದಲಾಯಿಸಬೇಕಿದೆ. ದ್ವಿಚಕ್ರ ವಾಹನಗಳ ಬ್ಯಾಟರಿ ಬೆಲೆ 24 ಸಾವಿರ ರೂ. ಇದೆ. ಇ-ವಾಹನಗಳ ಖರೀದಿಗೆ ಗ್ರಾಹಕರು ಮುಂದಾಗದಿರುವುದಕ್ಕೆ ಇದು ಕೂಡ ಪ್ರಮುಖ ಕಾರಣವಾಗಿದೆ. ಯೂನಿಟ್‌ ವಿದ್ಯುತ್‌ ದರವೆಷ್ಟು?
- ನಿಧಾನಗತಿಯ ಚಾರ್ಜಿಂಗ್‌ಗೆ ಪ್ರತಿ ಯೂನಿಟ್‌ಗೆ 7.28 ರೂ.
- ಕ್ಷಿಪ್ರಗತಿಯ ಚಾರ್ಜಿಂಗ್‌ಗೆ 7.42 ರೂ.
- ಅತಿವೇಗದ ಜಾರ್ಜಿಂಗ್‌ಗೆ 8.09 ರೂ.
| ಆರ್‌ಟಿಒ ಕಚೇರಿ | ದ್ವಿಚಕ್ರ ವಾಹನ | ತ್ರಿಚಕ್ರ ವಾಹನ | ಕಾರುಗಳು |
| ಬೆಂಗಳೂರು ಕೇಂದ್ರ | 779 | 0 | 1090 |
| ಬೆಂಗಳೂರು ಪಶ್ಚಿಮ | 735 | 45 | 280 |
| ಬೆಂಗಳೂರು ಪೂರ್ವ | 3166 | 75 | 1641 |
| ಬೆಂಗಳೂರು ಉತ್ತರ | 427 | 14 | 525 |
| ಬೆಂಗಳೂರು ದಕ್ಷಿಣ | 1693 | 33 | 1145 |
| ಜ್ಞಾನಭಾರತಿ | 162 | 7 | 128 |
| ಯಲಹಂಕ | 144 | 20 | 102 |
| ಎಲೆಕ್ಟ್ರಾನಿಕ್‌ ಸಿಟಿ | 3134 | 62 | 616 |
| ಕೆ.ಆರ್‌.ಪುರಂ | 977 | 17 | 219 |
| ಚಂದಾಪುರ | 67 | 14 | 133 |
| ಒಟ್ಟು | 11,284 | 287 | 5879 |
from India & World News in Kannada | VK Polls https://ift.tt/3aOVQ9V
