ಹಾಸನ: ಕೋ ವ್ಯಾಕ್ಸಿನ್‌ ಪಡೆದಿದ್ದ ಹಾಸನದ ಖಾಸಗಿ ಆಸ್ಪತ್ರೆ ಡಿ ದರ್ಜೆ ಸಿಬ್ಬಂದಿ ದಿಢೀರ್‌ ಮೃತಪಟ್ಟಿದ್ದಾರೆ. ಬೇಲೂರು ಮೂಲದ ಸುರೇಶ್‌(43) ಮೃತರು. ಹಾಸನದ ಸಿಎಸ್‌ಐ ಮಿಷನ್‌ ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದ ಸುರೇಶ್‌ 20 ದಿನಗಳ ಹಿಂದೆ ಕೋವ್ಯಾಕ್ಸಿನ್‌ ಲಸಿಕೆ ಪಡೆದಿದ್ದರು. ಈ ಲಸಿಕೆ ಅಡ್ಡ ಪರಿಣಾಮದಿಂದಲೇ ಸುರೇಶ್‌ ಸಾವನ್ನಪ್ಪಿದ್ದಾರೆ ಎಂದು ಕುಟುಂಬದವರು ಆರೋಪಿಸಿದ್ದಾರೆ. ಅರೋಗ್ಯವಾಗಿದ್ದ ಸುರೇಶ್‌ ದಿಢೀರ್‌ ಸಾವು ಕುಟುಂಬ ಸದಸ್ಯರ ಅನುಮಾನಕ್ಕೆ ಕಾರಣವಾಗಿದೆ. ಕಳೆದ 15 ವರ್ಷಗಳಿಂದ ಮಿಷನ್‌ ಆಸ್ಪತ್ರೆಯಲ್ಲಿಡಿ ಗ್ರೂಪ್‌ ನೌಕರನಾಗಿ ಕೆಲಸ ಮಾಡುತ್ತಿದ್ದ ಸುರೇಶ್‌ ಗುರುವಾರ ರಾತ್ರಿ ಊಟ ಮಾಡಿ ಮಲಗಿದ್ದರು. ಶುಕ್ರವಾರ ಬೆಳಗ್ಗೆ ಇದ್ದಕ್ಕಿದ್ದಂತೆ ಅಸ್ವಸ್ಥರಾಗಿದ್ದರು. ಬೆಳಗ್ಗೆ ಮಿಷನ್‌ ಆಸ್ಪತ್ರೆಗೆ ಕರೆತಂದು ಪರೀಕ್ಷಿಸುವ ವೇಳೆ ಮೃತಪಟ್ಟಿದ್ದರು. ಸಾವಿನ ಬಗ್ಗೆ ಸೂಕ್ತ ತನಿಖೆ ನಡೆಸಲು ಸಂಬಂಧಿಕರು ಒತ್ತಾಯಿಸಿದ್ದಾರೆ. ಕೊರೊನಾ ನಿರೋಧಕ ಶಕ್ತಿ ಹೊಂದಿರುವ ಕೋವ್ಯಾಕ್ಸಿನ್‌ನನ್ನು ಭಾರತ್‌ ಬಯೋಟೆಕ್‌ ಹಾಗೂ ಐಸಿಎಂಆರ್‌ ಜಂಟಿಯಾಗಿ ತಯಾರಿಸಿದೆ. ಭಾರತದಲ್ಲಿ ಆರೋಗ್ಯ ಕಾರ್ಯಕರ್ತರಿಗೆ ಈ ಔಷಧ ನೀಡಲಾಗುತ್ತಿದೆ.
from India & World News in Kannada | VK Polls https://ift.tt/37O7srK
