ಹೊಸದಿಲ್ಲಿ: ಏಷ್ಯಾದ ಅತಿ ಶ್ರೀಮಂತ ಅನ್ನೋ ಹೆಗ್ಗಳಿಕೆಗೆ ಮತ್ತೆ ಉದ್ಯಮಿ ಪಾತ್ರರಾಗಿದ್ದಾರೆ. ಏಷ್ಯಾ ಖಂಡದಲ್ಲೇ ಅತೀ ಶ್ರೀಮಂತ ವ್ಯಕ್ತಿ ಅನ್ನೋ ಕಿರೀಟ ಭಾರತದ ಮೂಲದ ಮುಕೇಶ್ ಅಂಬಾನಿ ಮುಡಿಗೇರಿದೆ. 8000 ಕೋಟಿ ಅಮೆರಿಕನ್ ಡಾಲರ್ಗೂ ಹೆಚ್ಚು ಆಸ್ತಿಯೊಂದಿಗೆ ರಿಲಯನ್ಸ್ ಇಂಡಸ್ಟ್ರೀಸ್ ಅಧ್ಯಕ್ಷ ಮುಕೇಶ್ ಅಂಬಾನಿ ಮತ್ತೆ ಆ ಸ್ಥಾನಕ್ಕೆ ಬಂದು ಕೂತಿದ್ದಾರೆ. ಚೀನಾದ ಬಾಟಲ್ ನೀರಿನ ಕಂಪೆನಿ ಮಾಲೀಕರಾದ ಝೋಂಗ್ ಶನ್ಷನ್ರನ್ನು ಪಕ್ಕಕ್ಕೆ ಸರಿಸಿ, ಮುಕೇಶ್ ನಂಬರ್ ಒನ್ ಆಗಿ ಹೊರಹೊಮ್ಮಿದ್ದಾರೆ. ಬ್ಲೂಮ್ಬರ್ಗ್ ಬಿಲಿಯನೇರ್ಸ್ ಸೂಚ್ಯಂಕದಂತೆ, ಅಂಬಾನಿ 8000 ಕೋಟಿ ಅಮೆರಿಕನ್ ಡಾಲರ್ ಹೊಂದಿದ್ದಾರೆ ಅಂದರೆ ಭಾರತದ ರೂಪಾಯಿ ಲೆಕ್ಕದಲ್ಲಿ 5,84,000 ಕೋಟಿ ರೂಪಾಯಿಗೂ ಹೆಚ್ಚು. ಚೀನಾದ ಶ್ರೀಮಂತ ಉದ್ಯಮಿ ಝೋಂಗ್ ಶನ್ಷನ್ ಸಂಪತ್ತು 2,200 ಕೋಟಿ ಅಮೆರಿಕನ್ ಡಾಲರ್ ಕುಸಿದು, 7660 ಕೋಟಿ ಯುಎಸ್ಡಿಗೆ ಇಳಿದಿದೆ. ಇತ್ತ ಮುಕೇಶ್ ಅಂಬಾನಿ ತಮ್ಮ ಸಾಮ್ರಾಜ್ಯವನ್ನು ಎನರ್ಜಿಯಿಂದ ತಂತ್ರಜ್ಞಾನದ ಮತ್ತು ಇ-ಕಾಮರ್ಸ್ ಕಡೆಗೆ ವಿಸ್ತರಿಸುತ್ತಾ ಇದ್ದಾರೆ. ಕೊರೊನಾ ಸಮಯದ ಬಳಿಕ ಅವರ ವಹಿವಾಟು ಹೆಚ್ಚಿದೆ. ಇನ್ನು ಕಳೆದ ವರ್ಷ ರಿಲಯನ್ಸ್ ಡಿಜಿಟಲ್ ಮತ್ತು ರೀಟೇಲ್ ಉದ್ಯಮದ ಷೇರಿನ ಪಾಲು 2700 ಕೋಟಿ ಅಮೆರಿಕನ್ ಡಾಲರ್ನಷ್ಟು ಗೂಗಲ್, ಫೇಸ್ಬುಕ್ ಮತ್ತಿತರ ಜಾಗತಿಕ ಕಂಪೆನಿಗಳಿಗೆ ಮಾರಾಟ ಮಾಡಿದ್ದರು. ಇದರಿಂದಾಗಿ ಅಂಬಾನಿ ಆಸ್ತಿಯಲ್ಲಿ 1800 ಕೋಟಿ ಅಮೆರಿಕನ್ ಡಾಲರ್ ಹೆಚ್ಚಾಯಿತು. ತೈಲದಿಂದ ರಾಸಾಯನಿಕದ ತನಕ ರಿಲಯನ್ಸ್ ಇಂಡಸ್ಟ್ರೀಸ್ ಉದ್ಯಮ ವ್ಯವಹಾರವು ಕಳೆದ ಹಣಕಾಸು ವರ್ಷದಲ್ಲಿ 60 ಪರ್ಸೆಂಟ್ ಗೂ ಹೆಚ್ಚು ಆದಾಯ ತಂದಿದೆ. ಇದರಿಂದಾಗಿ ಇನ್ನಷ್ಟು ಹೂಡಿಕೆದಾರರನ್ನು ಸೆಳೆಯಲು ಹಾಗೂ ಸೌದಿ ಅರೇಬಿಯನ್ ಆಯಿಲ್ ಕಂಪೆನಿಗೆ ಪ್ರಸ್ತಾವಿತ ಷೇರು ಪಾಲು ಮಾರಾಟ ಮಾಡಲು ನೆರವಾಗುತ್ತದೆ. ಮುಕೇಶ್ ಅಂಬಾನಿ ಅಲಿಬಾಬ ಸಂಸ್ಥೆಯ ಮುಖ್ಯಸ್ಥ ಜ್ಯಾಕ್‌ ಮಾ ಅವರನ್ನು ಹಿಂದಿಕ್ಕಿ ಕಳೆದ ಎರಡು ವರ್ಷಗಳಲ್ಲಿ ಬಹುತೇಕ ಸಮಯ ಏಷ್ಯಾದ ಅತ್ಯಂತ ಶ್ರೀಮಂತ ಎನಿಸಿಕೊಂಡಿದ್ದವರು. ಆದರೆ ನಂತರ ಝೋಂಗ್ ಶನ್ಷನ್ ಕಳೆದ ವರ್ಷ ಕೊನೆಗೆ ಅಂದರೆ ಡಿಸೆಂಬರ್‌ಗೆ ಅತೀ ಶ್ರೀಮಂತ ಪಟ್ಟವನ್ನು ತನ್ನದಾಗಿಸಿಕೊಂಡಿದ್ದರು. ಆದರೆ ಚೀನಾದ ಷೇರು ಮಾರುಕಟ್ಟೆಯಲ್ಲಿ ಅಷ್ಟೇನೂ ಉತ್ಸಾಹ ಇಲ್ಲದ ಹಿನ್ನೆಲೆ ಝೋಂಗ್ ಶನ್ಷನ್ ಆದಾಯದ ಮೇಲೂ ಪೆಟ್ಟು ಬಿದ್ದಿತ್ತು. ಆದರೆ ಇತ್ತ ಭಾರತದ ಮುಕೇಶ್ ಅಂಬಾನಿಯ ವಹಿವಾಟಿಗೆ ಕೊರೊನಾದ ಬಳಿಕ ಉತ್ತಮ ಸ್ಪಂದನೆ ಸಿಕ್ಕಿದೆ.
from India & World News in Kannada | VK Polls https://ift.tt/2NNjWJg
