ಬೆಂಗಳೂರು: ಚಲಾವಣೆಗೆ ಯತ್ನಿಸುತ್ತಿದ್ದ ಯುವಕನನ್ನು ಬಂಧಿಸಿರುವ ಚಿಕ್ಕಜಾಲ ಠಾಣೆ ಪೊಲೀಸರು, ಆತನಿಂದ 500, 100 ರೂ. ಮುಖಬೆಲೆಯ 1.40 ಲಕ್ಷ ರೂ. ಖೋಟಾ ನೋಟುಗಳನ್ನು ವಶಪಡಿಸಿಕೊಂಡಿದ್ದಾರೆ. ರಾಜಸ್ಥಾನ ಮೂಲದ ರವಿ ಅಲಿಯಾಸ್‌ ರವಿ ಸಿಂಗ್‌ (24) ಬಂಧಿತ ಆರೋಪಿಯಾಗಿದ್ದು, ಈತನಿಂದ 500 ರೂ. ಮುಖಬೆಲೆಯ 100 ನೋಟುಗಳು ಹಾಗೂ 100 ರೂ. ಮುಖಬೆಲೆಯ 90 ನೋಟುಗಳೂ ಸೇರಿದಂತೆ 1.40 ಲಕ್ಷ ರೂ. ಖೋಟಾ ನೋಟುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಕೃತ್ಯದಲ್ಲಿ ಭಾಗಿಯಾಗಿದ್ದ ಬಂಧಿತ ರವಿ ಸಹಚರ ವಿಕ್ರಂ ಸಿಂಗ್‌ ಪತ್ತೆಗೆ ಶೋಧ ನಡೆಸಲಾಗುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು. ರಾಜಸ್ಥಾನದಿಂದ ಕೆಲಸ ಅರಸಿಕೊಂಡು ಬಂದಿದ್ದ ರವಿ, ಬ್ಯಾಟರಾಯನಪುರದಲ್ಲಿ ಮೊಬೈಲ್‌ ರಿಪೇರಿ ಕೆಲಸ ಮಾಡಿಕೊಂಡು ವಾಸಿಸುತ್ತಿದ್ದ. ಇತ್ತೀಚೆಗೆ ಸಹಚರ ನೀಡಿದ್ದ ಖೋಟಾ ನೋಟುಗಳನ್ನು ಸಾದರಹಳ್ಳಿ ಗೇಟ್‌ ಬಳಿ ಚಲಾವಣೆ ಮಾಡಲು ಯತ್ನಿಸುತ್ತಿದ್ದ ವೇಳೆ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದಾನೆ. ವಿಕ್ರಂ ಸಿಂಗ್‌ ಎಂಬಾತ ರವಿಗೆ ಖೋಟಾನೋಟುಗಳನ್ನು ನೀಡಿ ಚಲಾವಣೆ ಮಾಡುವಂತೆ ಹೇಳಿದ್ದ. ಅವನ ಸೂಚನೆಯಂತೆ ಚಲಾವಣೆ ಮಾಡಲು ಯತ್ನಿಸಲಾಗುತ್ತಿತ್ತು ಎಂದು ವಿಚಾರಣೆ ವೇಳೆ ಆರೋಪಿ ಹೇಳಿದ್ದಾನೆ. ಆರೋಪಿ ವಿರುದ್ಧ ಚಿಕ್ಕಜಾಲ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
from India & World News in Kannada | VK Polls https://ift.tt/303LEE5
