ಅರವಿಂದ ಹೆಬ್ಬಾರ್‌ ಮುಂಡಾಜೆ ಮಂಗಳೂರು: ಅಡಕೆ ಹಾಗೂ ಕಾಳುಮೆಣಸು ಬೆಳೆಗಾರರಿಗೆ ಸಿಗುವ ಹವಾಮಾನ ಆಧಾರಿತ ಬೆಳ್ತಂಗಡಿ ತಾಲೂಕಿನ ಹಲವು ರೈತರಿಗೆ ಬೆಳೆ ಸಮೀಕ್ಷೆಯ ಅಡಚಣೆಯಿಂದ ಇನ್ನೂ ಜಮೆಯಾಗಿಲ್ಲ. ಜು.1ರಿಂದ ಜೂ.30ರ ತನಕ ಕಾಲಾವಧಿ ಹೊಂದಿರುವ ಬೆಳೆವಿಮೆ ಆಯಾ ಪ್ರದೇಶದಲ್ಲಿ ಬಿದ್ದ ಮಳೆಯ ಆಧಾರದಲ್ಲಿ ಹೆಕ್ಟೇರ್‌ ಒಂದಕ್ಕೆ ಗರಿಷ್ಠ 1,28,000ರೂ.ಗಳ ತನಕ ಸಿಗುತ್ತದೆ. ಇದಕ್ಕೆ 6,475 ರೂ. ವಾರ್ಷಿಕ ಕಂತು ಪಾವತಿಸಬೇಕು. ಈ ವಿಮೆ ರಬ್ಬರ್‌ ಬೆಳೆಗೆ ಅನ್ವಯಿಸುವುದಿಲ್ಲ. ಹಲವಾರು ಕಾರಣಗಳಿಂದ ಈ ಬಾರಿ ತೀರ ತಡವಾಗಿ ಅಂದರೆ ಜನವರಿ ತಿಂಗಳಲ್ಲಿ ಅಡಕೆಗೆ ಹೆಕ್ಟೇರ್‌ ಒಂದಕ್ಕೆ ಕೇವಲ 69,780ರೂ.ಗಳಷ್ಟು ಮಾತ್ರ ಜಮೆಯಾಗಿದೆ. ಹೆಚ್ಚಿನ ಕೃಷಿಕರ ಖಾತೆಗೆ ಹಣ ಜಮೆಯಾಗಿದ್ದರೂ, ಕೆಲವು ಕೃಷಿಕರು ತಾಂತ್ರಿಕ ಎಡವಟ್ಟುಗಳಿಂದ ಮೊತ್ತ ಜಮೆಯಾಗದೆ ಇಲಾಖೆಗಳಿಗೆ ಅಲೆಯುವುದು ಅನಿವಾರ್ಯವಾಗಿದೆ. ಬೆಳೆ ವಿಮೆ ಕಂತು ಜಮೆ ಮಾಡುವ ಸಂದರ್ಭ ಅಡಕೆ ಕೃಷಿ ಇರುವ ಸರ್ವೆ ನಂಬರ್‌ನ ಪಹಣಿ ಪತ್ರಗಳನ್ನು ನೀಡಲಾಗುತ್ತದೆ. ಇದರ ಆಧಾರದ ಮೇಲೆ ಖಾತೆಗಳಿಗೆ ಹಣ ಜಮಾ ಆಗುತ್ತದೆ. ಬೆಳೆ ವಿವರದ ಗೊಂದಲ ಕಂದಾಯ ಇಲಾಖೆಯಿಂದ ಬೆಳೆ ಸಮೀಕ್ಷೆ ನಡೆಸಿ ಬೆಳೆ ವಿವರ ದಾಖಲಿಸಿದ್ದು, ಹಲವಾರು ಸಮಸ್ಯೆಗಳಿಗೆ ಕಾರಣವಾಗಿದೆ. ಒಬ್ಬನೇ ಕೃಷಿಕನಿಗೆ ಅಡಕೆ ಹಾಗೂ ರಬ್ಬರ್‌ ಕೃಷಿ ಬೇರೆ ಬೇರೆ ಸರ್ವೆ ನಂಬ್ರದಲ್ಲಿ ಇರುತ್ತದೆ. ಕಂದಾಯ ಇಲಾಖೆ ವತಿಯಿಂದ ನಡೆದ ಸಮೀಕ್ಷೆಯಲ್ಲಿ ಎಡವಟ್ಟು ಉಂಟಾಗಿ ಕೆಲವೊಂದು ರೈತರ ಸರ್ವೆ ನಂಬ್ರಗಳಲ್ಲಿ ರಬ್ಬರ್‌ ಬದಲು ಅಡಕೆ, ಅಡಕೆ ಇರುವ ಸರ್ವೆ ನಂಬ್ರದಲ್ಲಿ ರಬ್ಬರ್‌ ಎಂದು ಬೆಳೆ ವಿವರ ನಮೂದಾಗಿದೆ. ಇದರಿಂದ ವಿಮಾಕಂತು ಪಾವತಿಸುವಾಗ ಅಡಕೆ ಕೃಷಿಯ ಸರ್ವೆ ನಂಬ್ರ ಕೊಟ್ಟ ಎಲ್ಲ ರೈತರ ಆ ಸರ್ವೆ ನಂಬ್ರಗಳಲ್ಲಿ ರಬ್ಬರ್‌ ಬೆಳೆ ವಿವರ ಕಂಡುಬರುತ್ತಿದೆ. ಇದರಿಂದ ಬೆಳೆ ವಿವರ ತಾಳೆಯಾಗದೆ ವಿಮಾ ಕಂಪನಿಗಳು ವಿಮಾ ಮೊತ್ತವನ್ನು ಜಮೆ ಮಾಡದೆ ತಡೆಹಿಡಿದಿವೆ. ಈ ಬಗ್ಗೆ ಗ್ರಾಮಕರಣಿಕರ ಮೂಲಕ ದೂರು ಸಲ್ಲಿಸಲಾಗಿದ್ದರೂ, ಇನ್ನೂ ಕೂಡ ತಿದ್ದುಪಡಿ ಆಗದಿರುವುದು ವಿಪರ್ಯಾಸ. ಹೀಗೊಂದು ಪ್ರಕರಣ 2018-19 ನೇ ಸಾಲಿನ ಮುಂಡಾಜೆ ಗ್ರಾಮದ ಕಡಂಬಳ್ಳಿ ನಿವಾಸಿ ಕೃಷಿಕರೊಬ್ಬರು ಜೂನ್‌ ತಿಂಗಳಲ್ಲಿ ಬೆಳೆ ವಿಮೆ ಮೊತ್ತ ಪಾವತಿಸಿ ಅಡಕೆ ತೋಟದ ಸರ್ವೆ ನಂಬರ್‌ ಇರುವ ಪಹಣಿ ಪತ್ರ ನೀಡಿ ವಿಮೆಯ ಕಂತು ಪಾವತಿಸಿದ್ದರು. ಬಳಿಕ ಕಂದಾಯ ಇಲಾಖೆ ವತಿಯಿಂದ ಬೆಳೆ ಸಮೀಕ್ಷೆ ನಡೆದಿತ್ತು. ಆ ಸಮಯದಲ್ಲಿ ಅವರ ಅಡಕೆ ತೋಟದ ಸರ್ವೆ ನಂಬ್ರದಲ್ಲಿ ರಬ್ಬರ್‌ ಬೆಳೆ ಎಂದು ಬೆಳೆ ವಿವರ ನಮೂದಾಗಿತ್ತು. ರಬ್ಬರ್‌ ಬೆಳೆ ಇರುವ ಪಹಣಿ ಪತ್ರದ ಸರ್ವೆ ನಂಬ್ರದಲ್ಲಿ ಅಡಕೆ ಎಂದು ಬೆಳೆ ವಿವರ ಕಂಡುಬರುತ್ತಿತ್ತು. ಇದರಿಂದ ಇವರಿಗೆ ಆ ವರ್ಷದ ಬೆಳೆ ವಿಮೆ ಮೊತ್ತ ಇನ್ನೂ ಸಿಕ್ಕಿಲ್ಲ. 2019-20ರ ಜೂನ್‌ ತನಕ ಕಾದು ಪಹಣಿ ಪರಿಶೀಲಿಸಿ ಕಳೆದ ಬಾರಿ ಅಡಕೆ ತೋಟ ಎಂದು ಬೆಳೆ ವಿವರವಿದ್ದ ಪಹಣಿ ಪತ್ರ ನೀಡಿ ವಿಮಾಕಂತು ಪಾವತಿಸಿದ್ದರು. ಇವರು ವಿಮೆ ಕಂತು ಪಾವತಿಸಿದ ಬಳಿಕ ಪಹಣಿ ಪತ್ರ ತಿದ್ದುಪಡಿಗೊಂಡು, ಮತ್ತೆ ಎಡವಟ್ಟು ಉಂಟಾಗಿ ಬೆಳೆ ವಿಮೆ ನೀಡುವ ಸಮಯ ಇವರು ಕಂತು ಪಾವತಿಸುವಾಗ ನೀಡಿದ ಪಹಣಿ ಪತ್ರ ಮತ್ತೆ ತಾಳೆಯಾಗದೆ 2019-20ನೇ ಸಾಲಿನಲ್ಲೂ ಇವರಿಗೆ ಬೆಳೆ ವಿಮೆ ಗಗನ ಕುಸುಮವಾಗಿದೆ. ನಾನು ಕಳೆದ ಎರಡು ವರ್ಷಗಳಿಂದ ಬೆಳೆ ವಿಮೆ ಕಂತು ಪಾವತಿಸಿದ್ದೇನೆ. ಬೆಳೆ ಸಮೀಕ್ಷೆ ಸಮಯ ಪಹಣಿ ಪತ್ರದಲ್ಲಿ ಬೆಳೆ ವಿವರ ತಪ್ಪಾಗಿ ನಮೂದಾಗಿದೆ. ಇಲಾಖೆಯ ಎಡವಟ್ಟಿನಿಂದ ನಾನು ಎರಡು ವರ್ಷಗಳಿಂದ ಬೆಳೆ ವಿಮೆಯ ಮೊತ್ತ ಪಡೆಯಲು ಅನರ್ಹನಾಗಿದ್ದೇನೆ ಈ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಅರ್ಜಿ ಸಲ್ಲಿಸಿದ್ದರೂ ಇದುವರೆಗೂ ಯಾವುದೇ ಪ್ರಯೋಜನ ಸಿಕ್ಕಿಲ್ಲ. ಗಜಾನನ ವಝೆ,ಕೃಷಿಕ, ಮುಂಡಾಜೆ. ತಾಂತ್ರಿಕ ಸಮಸ್ಯೆಗಳಿಂದ ಬೆಳೆ ವಿವರ ಬದಲಾವಣೆ ಆಗಿರುವ ಸಾಧ್ಯತೆ ಇದೆ. ಈ ಬಗ್ಗೆ ಆಯಾ ಗ್ರಾಮಲೆಕ್ಕಿಗರ ಮೂಲಕ ಅರ್ಜಿಸಲ್ಲಿಸಿದರೆ ಸಹಾಯಕ ಕಮಿಷನರ್‌ ಮಾರ್ಗದರ್ಶನದಲ್ಲಿ ತಿದ್ದುಪಡಿ ಮಾಡಿಸಿಕೊಳ್ಳಬಹುದು. ರಮೇಶ್‌ ಬಾಬು, ತಹಸೀಲ್ದಾರ್‌(ಪ್ರಭಾರ), ಬೆಳ್ತಂಗಡಿ ಬೆಳೆ ವಿವರ ತಾಳೆಯಾಗದ ಕೃಷಿಕರಿಗೆ ನಿಗದಿತ ದಿನಾಂಕದೊಳಗೆ ಆಕ್ಷೇಪಣೆ ಸಲ್ಲಿಸಲು ಅವಕಾಶ ನೀಡಲಾಗಿದೆ. ಎಚ್‌.ಆರ್‌. ನಾಯಕ್‌ ಉಪ ನಿರ್ದೇಶಕರು, ತೋಟಗಾರಿಕೆ ಇಲಾಖೆ ದ.ಕ.
from India & World News in Kannada | VK Polls https://ift.tt/37MKwcm
