ಬೀದರ್‌: ಅನಧಿಕೃತ ಸ್ಫೋಟಕಗಳನ್ನು ಅಜಾಗರೂಕತೆಯಿಂದ, ಅಸುರಕ್ಷಿತವಾಗಿ ಇಟ್ಟುಕೊಂಡಿರುವ ಹಿನ್ನೆಲೆಯಲ್ಲಿ ಬೀದರ್‌ ತಾಲೂಕಿನ ಸುಲ್ತಾನಪುರ ಶಿವಾರದ ಜಿ.ಕೆ.ಕನ್ಸ್ಟ್ರಕ್ಷನ್ ಕಂಪೆನಿಯ ಮಾಲೀಕ, ಟಿಪ್ಪರ್‌ಗೆ ಸಂಬಂಧಿಸಿದಂತೆ ಯಾದಗಿರಿಯ ಭೈರಾಪುರ ತಾಂಡಾದ ಶಂಕರ ಗೋವಿಂದ ಚವ್ಹಾಣ್‌, ವಿಜಯಪುರದ ಸಿಂದಗಿಯ ಟಿಪ್ಪರ್‌ ಚಾಲಕ ಮಹಾದೇವ್‌ ಪಾಂಡು ರಾಠೋಡ್‌, ಕಂಪೆನಿಯ ಮ್ಯಾನೇಜರ್‌ ಸೂರ‍್ಯಕಾಂತ ಗಣಪತಿ ಹೆಡಗಾಪುರ ವಿರುದ್ಧ ಬೀದರ್‌ ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಖಚಿತ ಮಾಹಿತಿ ಮೇರೆಗೆ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿದಾಗ ಟಿಪ್ಪರ್‌ನಲ್ಲಿ ಸ್ಫೋಟಕಗಳನ್ನು ಸಂಗ್ರಹಿಸಿ ಇಟ್ಟಿರುವ ವಿಷಯ ಬೆಳಕಿಗೆ ಬಂದಿದೆ. ಸ್ಫೋಟಕ ವಸ್ತುಗಳಾಗಿದ್ದರಿಂದ ಸುರಕ್ಷತೆಯ ಕ್ರಮದಿಂದಾಗಿ ಕಲಬುರಗಿಯ ಬಿಡಿಡಿಎಸ್‌ ತಂಡದವರನ್ನು ಕರೆಯಿಸಿ, ಪಂಚರನ್ನು ಕರೆದೊಯ್ದು ಪರಿಶೀಲಿಸಿದಾಗ ಅನಧಿಕೃತ ಸ್ಫೋಟಕಗಳು ಇರುವುದು ಖಚಿತಪಟ್ಟಿದೆ. ಈ ವೇಳೆ, ಸಿಕಿಂದರಾಬಾದ್‌ ಐಡಿಯಲ್‌ ಇಂಡಸ್ಟ್ರೀಯಲ್‌ ಲಿಮಿಟೆಡ್‌ ಕಂಪೆನಿಯ ತಲಾ 25 ಕೆಜಿ ತೂಕವುಳ್ಳ 67 ಜಿಲೆಟಿನ್‌ ಸ್ಲರ್ರೀ ಎಕ್ಸ್‌ಪ್ಲೋಸಿವ್‌ ಬಾಕ್ಸ್‌ಗಳಿದ್ದು, ಪ್ರತಿ ಬಾಕ್ಸ್‌ನಲ್ಲಿ 9 ಟೂಬುಗಳು ಸೇರಿ ಒಟ್ಟು 603 ಟೂಬುಗಳು ಪತ್ತೆಯಾಗಿವೆ. ನಾನ್‌ ಎಲೆಕ್ಟ್ರಿಕ್‌ ಡೆನೆನಾಟರ್‌ (ಎನ್‌ಇಡಿ) 500 ಹಾಗೂ 2500 ಮೀಟರ್‌ ಕಾರ್ಡಕ್ಸ್‌ ಮತ್ತು ಒಂದು ಟಿಪ್ಪರ್‌ನ್ನು ಪಂಚನಾಮೆಯ ಮೂಲಕ ಜಪ್ತಿ ಮಾಡಲಾಗಿದೆ. ಪ್ರಕರಣ ಸಂಖ್ಯೆ 13/2021 ಕಲಂ 9 (ಬಿ)(1)(ಬಿ) ಎಕ್ಸ್‌ಪ್ಲೋಸಿವ್‌ ಆಕ್ಟ್ 1884 ಜತೆ 186, 336 ಐಪಿಸಿ ಪ್ರಕಾರ ಪ್ರಕರಣ ದಾಖಲಿಸಿಕೊಂಡು, ತನಿಖೆ ಕೈಗೊಳ್ಳಲಾಗಿದೆ.
from India & World News in Kannada | VK Polls https://ift.tt/3aWzkvP
