ಅಹಮದಾಬಾದ್‌: ಇಂಗ್ಲೆಂಡ್‌ ವಿರುದ್ಧ ಮೂರನೇ ಹಾಗೂ ಪಿಂಕ್‌ ಬಾಲ್‌ ಟೆಸ್ಟ್ ಪಂದ್ಯದಲ್ಲಿ ಭಾರತ ತಂಡದ ಹಿರಿಯ ಆಫ್‌ ಸ್ಪಿನ್ನರ್ 400 ವಿಕೆಟ್‌ಗಳ ಮೈಲುಗಲ್ಲು ಸ್ಥಾಪಿಸಿದರು. ಆ ಮೂಲಕ ದೇಶ ಹಾಗೂ ವಿಶ್ವದಾದ್ಯಂತ ಮಾಜಿ ಹಾಗೂ ಹಾಲಿ ಕ್ರಿಕೆಟಿಗರ ಮೆಚ್ಚುಗೆಗೆ ಪಾತ್ರರಾದರು. ಪಂದ್ಯದ ಬಳಿಕ ಫೀಲ್ಡಿಂಗ್‌ ಕೋಚ್‌ ಜತೆ ಬಿಸಿಸಿಐ ಟಿ.ವಿ ಸಂದರ್ಶನದಲ್ಲಿ ಮಾತನಾಡಿದ ಅಶ್ವಿನ್, ಕ್ರಿಕೆಟಿಗನಾಗಿ ಜೆರ್ಸಿ ಹಾಕುತ್ತೇನೆಂದು ಕನಸಿನಲ್ಲಿಯೂ ಅಂದುಕೊಂಡಿರಲಿಲ್ಲ ಎಂಬ ಮಹತ್ವದ ಸಂಗತಿಯನ್ನು ಬಹಿರಂಗಪಡಿಸಿದ್ದಾರೆ. "ನಿಜ ಹೇಳಬೇಕೆಂದರೆ ನಾನು ಆಕಸ್ಮಿಕವಾಗಿ ಕ್ರಿಕೆಟಿಗನಾಗಿದ್ದೇನೆ. ನಾನು ಮೊದಲು ಕ್ರಿಕೆಟ್ ಪ್ರೇಮಿಯಾಗಿದ್ದೆ, ನಂತರ ವೃತ್ತಿ ಪರ ಕ್ರಿಕೆಟಿಗನಾಗಿ ಮಾರ್ಪಟ್ಟಿದ್ದೇನೆ. ಕನಸಿನೊಂದಿಗೆ ನಾನು ಜೀವಿಸುತ್ತಿದ್ದೆ, ಹಾಗಾಗಿ, ಮುಂದೊಂದು ದಿನ ಭಾರತ ತಂಡದ ಜೆರ್ಸಿ ಧರಿಸಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡುತ್ತೇನೆಂದು ಎಂದಿಗೂ ಊಹಿಸಿರಲಿಲ್ಲ," ಎಂದು ಹೇಳಿದರು. "ನಾನು ಪ್ರತಿ ಬಾರಿ ಆಟವನ್ನು ಮುಗಿಸಿದಾಗ ಮತ್ತು ತಂಡಕ್ಕೆ ಗೆಲುವಿನ ಫಲಿತಾಂಶವನ್ನು ನೀಡಿದರೆ, ನನಗೆ ಆಶೀರ್ವಾದ ನೀಡಲಾಗುತ್ತಿದೆ ಎಂದು ನಾನು ಭಾವಿಸುತ್ತೇನೆ. ಆದರೆ, ಕೋವಿಡ್‌-19 ಲಾಕ್‌ಡೌನ್‌ ಸಮಯದಲ್ಲಿ ಭಾರತಕ್ಕಾಗಿ ಆಡುತ್ತಿರುವ ನಾನು ಎಷ್ಟು ಅದೃಷ್ಟಶಾಲಿ ಎಂಬುದು ನನಗೆ ಮನವರಿಕೆಯಾಗಿತ್ತು," ಎಂದರು. "ಐಪಿಎಲ್‌ ಟೂರ್ನಿ ಮುಗಿಸಿಕೊಂಡು ವಾಪಸ್‌ ಆದ ಬಳಿಕ ಆಸ್ಟ್ರೇಲಿಯಾದಲ್ಲಿ ಆಡುತ್ತೇನೆಂದು ಎಂದೂ ಭಾವಿಸಿರಲಿಲ್ಲ. ಈ ಕಾರಣಕ್ಕಾಗಿಯೇ ನನ್ನ ಜೀವನದಲ್ಲಿ ನಡೆದ ಎಲ್ಲವೂ ಕೊಡುಗೆ ಎಂದೇ ಭಾವಿಸುತ್ತೇನೆ. ಯಾವುದೇ ಪಂದ್ಯ ಆಡಿದರೂ ನಾನು ಅದನ್ನು ತುಂಬಾ ಪ್ರೀತಿಸುತ್ತೇನೆ. ಅದಕ್ಕ ತಕ್ಕಂತೆ ಪಂದ್ಯ ಕೂಡ ನನಗೆ ಪ್ರತಿಫಲ ನೀಡುತ್ತದೆ," ಎಂದು ಹೇಳಿದರು. ಲಾಕ್‌ಡೌನ್‌ ಸಂದರ್ಭದಲ್ಲಿ ತಮ್ಮ ವೈಯಕ್ತಿಕ ಪ್ರದರ್ಶನದ ಸುಮಾರು ವಿಡಿಯೋಗಳನ್ನು ನೋಡಿದ ಬಳಿಕ ಆಟವನ್ನು ಅರ್ಥ ಮಾಡಿಕೊಳ್ಳುವುದರಲ್ಲಿ ತುಂಬಾ ಬೆಳವಣಿಗೆ ಸಾಧಿಸಿದ್ದೇನೆ ಎಂದು ಅಶ್ವಿನ್ ತಿಳಿಸಿದರು. "ಕೋವಿಡ್‌-19 ಲಾಕ್‌ಡೌನ್‌ ಸಮಯದಲ್ಲಿ ಮನೆಯಲ್ಲಿಯೇ ಸಮಯ ಕಳೆಯುತ್ತಿದ್ದೆ. ಈ ವೇಳೆ ನಾನು ಸುಮ್ಮನಿರದೆ ನನ್ನ ಹಳೆಯ ಪಂದ್ಯಗಳ ಪ್ರದರ್ಶನದ ವಿಡಿಯೋಗಳನ್ನು ಬಹಳ ಹತ್ತಿರದಿಂದ ವೀಕ್ಷಿಸಿದೆ. ಇದರಿಂದ ಆಟವನ್ನು ಇನ್ನಷ್ಟು ಅರ್ಥ ಮಾಡಿಕೊಳ್ಳಲು ಸಾಧ್ಯವಾಯಿತು. ಎಲ್ಲದಕ್ಕಿಂತ ಮುಖ್ಯವಾಗಿ ಸಚಿನ್‌ ತೆಂಡೂಲ್ಕರ್‌ ಅವರ ಚೆಪಾಕ್‌ ಅಂಗಳದಲ್ಲಿನ ಶತಕವನ್ನು ಯೂಟ್ಯೂಬ್‌ನಲ್ಲಿ ವೀಕ್ಷಿಸಿದ್ದೆ," ಎಂದರು ನಿಮ್ಮ ವೃತ್ತಿ ಜೀವನದಲ್ಲಿ ಎಂಎಸ್ ಧೋನಿ ಪಾತ್ರದ ಬಗ್ಗೆ ಆರ್‌ ಶ್ರೀಧರ್‌ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅಶ್ವಿನ್, "ಎಂಎಸ್ ನನಗಿಂತ ಹೆಚ್ಚಿನದನ್ನು ಹೊಂದಿದ್ದಾರೆಂದು ನಾನು ಭಾವಿಸುತ್ತೇನೆ. ನನ್ನ ಆರಂಭಿಕ ವೃತ್ತಿಜೀವನದ ಬಹುಪಾಲು ಭಾಗ ನಾನು ಈ ಎಲ್ಲದರಲ್ಲೂ ಉತ್ತಮವಾಗಿರಲಿಲ್ಲ. ಆ ವೇಳೆ ಎಂಎಸ್ ಧೋನಿ ಸ್ಟಂಪ್‌ಗಳ ಹಿಂದಿನಿಂದ ಸಾಕಷ್ಟು ತಿದ್ದಿದ್ದಾರೆ. ಈಗ ನಾನು ಪ್ರತಿ ಕ್ಷಣವನ್ನೂ ಪ್ರೀತಿಸುತ್ತೇನೆ ಎಂದರೆ ಇದರಲ್ಲಿ ಮಾಜಿ ನಾಯಕನ ಕೊಡುಗೆ ಕೂಡ ಇದೆ," ಎಂದು ಅಶ್ವಿನ್ ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2NIFEye
